سلامت نیوز: مجلیسین حقوقی و قضایی کومسیونون سؤز دانیشانی اؤلکه‌میزده بوشانما سایی‌نین چوخلوغونا ایشاره ائدیب دئدی: اخیر ایللرده بعضی زوجلارین موشترک یاشاییشی‌نین متوسیطی 6 آیا چاتیب و بو, مسئوللار اوچون بیر هوشداردیر کی گرک اونون عیلّتلرینی آختاریب تاپالار.

محمدعلی اسفنانی میلّت ائوی‌اینن دانیشیقدا دئدی: آمارلار گؤرسه‌دیر کی بیزیم اؤلکه, بوشانما و طلاق سایی‌سیندا چوخ پیس وضعیتده قرار تاپیب و مسئوللارا جیدّی شوک وارید اولمالیدیر کی بو باره‌ده دوغرودان بیر ایش گؤرسونلر, نییه کی بو مسأله کونفرانس و جلسه قویماغینان حل اولماز.

او آرتیردی: طلاقین ایندی‌کی آماری موشترک یاشاییشدا واقعی زلزله‌دیر؛ نییه کی هر گون یوزلرجه خانیواده معنوی جهتدن داغیلیر و موتأسیفانه مسئوللار بو باره‌ده هئچ عملی ایش گؤرمورلر.

او بونا ایشاره ائله‌ماغینان کی بعضی جوانلارین ائولنماق باره‌سینده‌کی فیکیرلری و باخیشلاری اصلاً منطیقلی, علمی و واقعی دئییل, آرتیردی: موتأسیفانه بعضی زوجلار بیر-بیرلرینه تکلیف گؤزو ایله باخیرلار و بو دا باعیث اولور موشکوللر و ایختیلافلار قاباغا گلسین. آما اگر زوجلار اؤزلرینه قاییل اولان حقّین موقابیلینده اؤزلری اوچون بیر تکلیف‌ده بویونلارینا آلسالار؛ ایختیلاف شیدّتلی اولماز.

او دئدی: بئله‌لیغینان بوشانمانین چوخالماسی‌نین بیر عامیلی زوجینین اؤز حقوقلاری و تکلیفلرینه آگاه اولماماقلاریدیر. او ایشسیزلیق و کیفایت قدر گلیرین اولماماسینی طلاقین چوخالماسی‌نین آیری عامیلی بیلیب دئدی: طلاقین چوخالماسی‌نین آیری عامیلی‌ده موخدّیره ماده‌لرین چوخالماسی و آیری ایجتیماعی موشکوللرین اولماسیدیر کی خانیواده‌یه صدمه وورور و موشترک یاشاییشی آرادان آپاریر.