خانیواده و ائولری 40 درصددن چوخ ضرر
گؤرن سربازلارا 3 آیلیق ایضطیراری مورخصلیق وئریلیر.
سیلاحلی نیرولارین کول سیتادی‌نین
اینسانی منبعلر ایداره‌سی‌نین جانشینی, موعظم اینقیلاب رهبری و کول قوّه‌لر
فرماندهی‌نین شرقی آذربایجانین زلزله‌زده منطقه‌لری سربازلاری باره‌ده تصویب
ائله‌دیغی جوزئیاتینی تشریح ائله‌دی.
موسی کمالی ایسنا اینن دانیشیقدا
دئدی: خانیواده‌لری اهر, ورزقان, هریس و کلیبرده یاشایان و اؤزلری اوردان اعزام
اولان سربازلارا (آموزش حالیندا اولانلارا) کی خانیواده و ائولری 40
درصددن چوخ ضرر گؤروب 3 آیلیق ایضطیراری مورخصلیق وئریلیر.
هابئله زلزله خبرین ائشیدندن سونرا
مورخصلیق آلمامیش خیدمتی ترک ائدنلر ده جان و مال ضرری گؤرسه‌لر (ائولری‌نین 40
درصد و آرتیغین خراب اولماسی) دئییلن مورخصلیق اونلارا دا شامیل اولور و بقیه کی
ائولرینه یولوخوب اونلارین سالیم اولمالاریندان موطمئین اولدولار گرک 10 گوندن
سونرا خیدمته قاییتسینلار و بو 10 گون اونلارا ایستحقاقی مورخصلیق حساب
اولاجاق.
کمالی‌نین دئدیگینه گؤره, او
سربازلار کی سکونت یئرلری زلزله‌زده منطقه‌ده اولا و خانیواده و ائولری ضرر گؤرموش اولا (40 درصد و یوخاری)
خانیواده‌لری‌نین ساکین اولدوغو منطقه‌نین لاپ یاخین نیظامی و یا اینتیظامی یگانینا
مونتقیل اولاجاقلار.
سیلاحلی نیرولارین کول سیتادی‌نین
اینسانی منبعلر ایداره‌سی‌نین جانشینی بونو دئماغینان کی اهر، ورزقان، هريس و كليبر
شهریستانلاری‌نین مشمول‌لاری‌نین اعزامی بو ایلین بهمن آیی‌نین 30-یناجن یعنی آلتی
آی دالی دوشور, دئدی: موسلح نیرولار دا ایختیصاص تاپمیش نیرولارینی 1392-جی ایلین
تیرین 20-جن نیظامی آموزشدن سونرا خانیواده‌لری ساکین اولان منطقه‌نین لاپ یاخین
نیظامی و اینتظامی مرکزینده ایشه آلاجاق. اونون دئدیگینه گؤره, کول قوّه‌لر
فرماندهی‌نین تصویبینه گؤره, عمومی وظیفه, سیپاه, بخشدار و شهر یا کند یا بخشین
ایسلامی شوراسی‌نین نوماینده‌لر و منطقه‌نین دادسیتانی بیر هیأت تشکیل وئریب,
سیلاحلی نیرولارین کول سیتادی‌نین ضوابیطی اساسیندا ضرر چکمیش خانیواده‌لرین
اوشاقلاری‌نین معافیتلری باره‌ده تصیم توتاجاقلار.
کمالی آرتیردی: موعافلیق او کسلره
شامیل اولاجاق کی خانیواده‌لری‌نین هامیسی و یا حداقل ایکی نفر درجه بیر
فامئل‌لریندن الدن وئرمیش اولالار. و بیر ده او کسلر کی خانیواده سرپرستلری الدن
گئدیب و یا زلزله اثرینده اؤز ایشلرینی دولاندیرا بیلمه‌مک وضعیّته دوشموش اولا,
اگر اوستاندا خانیواده‌نی سرپرستلیق ائدن آیری اولاد اولمایا.
او آرتیردی: ائولی اوشاقلی سربازلار
کی عیال‌لارین و یا اوشاقلارین زلزله‌ده الدن وئره‌لر و یا عیال‌لاری زلزله
اثرینده معلول اولوب خانیواده ایشلرینی دولاندیرماقدان عاجیز اولا, و او ائولی
سربازلار کی عیال‌لاری‌نین آتا و آنالاری الدن گئده (هر ایکیسی) و سرپرستسیز
اولالار, و او ائولی سربازلار کی ائولری اوتورمالی اولمایا و آرادان
گئتمیش حسابلانا دا موعاف اولاجاقلار.