اوزاقدان کلیمانجارو داغلارینا
بنزیر. یاخینلاشاندا گؤرورسوز کی بالاجا تپه‌ایدی. بو اینسانلارین عؤمرودور. 10
یاشلی اوشاغا دئسن کی 60 ایل ده یاشایاجاق, نظرینه چوخ گلر, آما 70 یاشیندا بیریندن
سوروشسان کی عؤمرون نئجه کئچدی, دئیر: بیر گؤز قیرپیمیندا.
کناریمیزدا ائله آداملار وار کی
بوتون ایشلرینه واختلاری اولار. بونا گؤره عؤمر حسرتی یئمزلر. بونلار همان
آداملاردیلار کی واختین ارزیشین داها چوخ بیلیرلر و واختلارینا برنامه تؤکورلر.
ایستیروق اؤرگه‌دک کی نئجه واختیزدان دوزگون ایستیفاده ائده‌سیز تا گله‌جکده عؤمر
حسرتی یئمیه‌سیز.
یازین, یازین, یازین
یازماق چوخلی دردلرین درمانیدیر.
گاهدان آدام حؤصله‌سیز اولاندان یازماغینان حالی دوزه‌لر, حیرصلی اولسا یازماق
حیرصینی سویوردار, آما بونلاردان علاوه یازماق سیزه واختی مودیریت ائله‌ماقدا کؤمک
ائدر.
گونون فیلان ساعتینده نه ایش
گؤمگیزی بیلمک اوچون مجبور اولورسوز سبدده‌کی کارتلاری اویان بویان ائلیه‌سیز و
اونلارین بیرینی یئرینه گتیرماغا اینتیخاب ائلیه‌سیز.
بو معطل اولماقلار چوخ
گؤروشمه‌سه‌لر ده هامیسین بیر یئره ییغسان چوخ واخت ائلر. یر آیری طرفدن سیز
مجبورسوز گونده‌لیق ایشلریزی ذهنیزده مرور ائده‌سیز کی بو سیزین فیکریزی
داغیلدار.
آما ایشلریزی اولویت اساسیندا بؤلسز
اونلاری تئزراق یئرینه گتیره بیلرسیز و واختیزی صرفه‌لی ایشلتمیش
اولارسیز.
حتماً بیلیرسیز کی سبددن منظوروموز
ذهیزدیر کی برنامه‌اینن دولودور. آما سیز اونلاری کاغاذ اوستونه یازساز هم ذهنیز
دینجلیغا یئتیشر و هم واختیز صرفه‌لی گئدر.
برنامه‌نی جوزئیاتی‌اینن یازین و
همیشه آز بیر واخت گؤزلنمه‌ین حادیثه‌لره قویون. یاخجی بیر برنامه اودور کی
اینعیطافلی اولا, یعنی اگر احساس ائله‌دیز کی ایشلرین یئرین دگیشمه‌لیسیز فورآ بو
ایشی گؤره بیله‌سیز.
هر موفقیتین جایزه‌سی
وار
برنامه‌زین هر بیر یئرینده موفق
اولساز, اؤزوزه جایزه وئرین. اساس بودور کی گونده‌لیق برنامه‌ده اؤزوزون تشویقی
اوچون بیر واخت نظرده آلاسیز.
بیر دؤکتور تانیرام کی باشی چوخ
شولوقدور. او بیر مودت اولار کی اؤزونه گونده‌لیق برنامه یازیر. او اؤزونو تشویق
ائله‌ماقدان اؤترو سئودیگی سریالین سی‌دی‌لرین آلیب و هر هانسی گون کی ایشلرین
دوزگون یئرینه یئتیره‌بیله اوتوروب او سریالا باخار.
سوروشورسوز کی برنامه‌سی دوزگون
قاباغا گئتمه‌سه نه اولار؟ هئچ نه ! سی‌دی‌لری ایشکابدا قالار و او سریال عوضینه
دالی قالمیش ایشلرینی گؤرر.
ذهنیزی بیر ایشده موتمرکیز
ائدین
شاید گوجوز چاتا کی نئچه ایشی بیر
یئرده گؤره‌سیز مثلاً هم تیلیفونلا دانیشاسیز و هم پالتار اوتولویه‌سیز و آیری
ایشلر, آما یاخجیسی بودور کی بو یولو ایمتحان ائله‌میه‌سیز و تکجه بیر ایشی
گؤره‌سیز. هر ایش قورتولاندان سونرا آیری ایشین باشینا گئده‌سیز.
خطّین آخیری هارادی؟
جماعتین ضرب‌الاجل‌دن زهله‌سی گئدر,
چون فیکیرلرین نیگران ائلر و چالیشارلار الده اولان واختدان نهایت ایستیفاده‌نی
ائله‌سینلر. آما سیز اؤزوز اوچون آخیر خط موشخص ائدین و موطمئین اولون کی بیر مودت
سونرا اونا عادت ائلیه‌جاقسیز.
و یادیزدا اولسون کی همیشه هر ایش
اوچون لازیم اولان واختدان بیر آز ایضافه واخت آییرین. مثلاً بیر ساعتلیق ایشه بیر
روبع ایضافه واخت قویون. نیه کی وسطده گؤزلَنیلمه‌ین ایش قاباغا گلسه و دوستوز زنگ
وورسا برنامه‌ز بیر بیرینه دَیمه‌سین.
بؤیوک و اوزاق هدفلر تعین
ائدین
اؤزوز اوچون اوزون مودت برنامه‌لر
یازین. بو ایشلرین بعضیسی بیر هفته‌ده نتیجه‌یه چاتار و بعضیسی بیر آیا و یا بیر
ایله و بعضیسی نئچه ایله. اوزون مودت برنامه‌لره اینانماق باعیث اولار هم سیز قیسا
مودت برنامه‌لریزده منطیقلی اولاسیز و هم سیزده چالشماغا انگیزه یارالدار.
سیز هر زادین مسئولو دئییلسیز
یبر موفق برنامه‌چی او دئییل کی
قیسا بیر زماندا هر ایشی اؤزو گؤره؛ بلکه او کسدیر کی بیلر برنامه‌نین هر قیسمتی
کیمین عؤهده‌سیندن گلر. مثلاً ایستیرسیز ائو اوچون بیر برنامه تؤکه‌سیز, لازیم
دئییل کی هر ایشی اؤزوز گؤره‌سیز. گرک باخیب گؤره‌سیز کی کیمین الیندن نه ایش
گلر.
شاید بو مسئولیتلر کیچیک اولالار و آز
واخت آپارالار, آما فایداسی بوردادیر کی همن بو بالاجا واختلار بیر یئره ییغیشاندا
گونلر دریاسینا چئوریلر کی سیزین عؤمروزه حسابلانیر.