شرقی آذربایجانین فرهنگی
میراث, ال ایشلری و توریزم ایداره‌سی‌نین مودیر کولّی دئدی: خاروانانین جوشون
قالاسیندا آختارمالاردا میلاددان قاباق بیرینجی مین ایللیغا مربوط اولان ساخسیلار
تاپیلیب.
فارس خبرگوزاریسی‌نین ورزقاندان
وئردیغی گوزاریشه گؤره, تراب محمدی خاروانانین جوشون قالاسیندان گؤروش ائلیه‌نده
ورزقان و خاروانا منطقه‌سی‌نین قالالارینا ایشاره ائدیب دئدی: خاروانا ورزقان و
دیزمار منطقه‌سی‌نین قدیمی شهرلریندن ایدی و لاپ چیچکنمه واختی سلجوقلار زامانی
ایدی. بو شهرین قیدمتینه گؤره اوردا چوخلی تاریخی اثرلر و قالالار وار.
او آرتیردی: جوشون قالاسی 26
کیلومتر فاصیله‌اینن ورزقانین غربینده و جوشون کندی‌نین 6 کیلومترلیغیندا و
قره‌داغین تاریخی دیزمار محالیندا بیر اوجا داغین باشیندا یئرله‌شیر.
محمدی بونا ایشاره
ائله‌ماغینان کی بو قالادا آختارمالاردا میلاددان قاباق بیرینجی مین ایللیغا و
ایسلامین اوّلیه عصرلرینه مربوط اولان ساخسیلار تاپیلیب, دئدی: جوشون قالاسی بیر
اوجا داغین باشیندا و گؤزل بیر داغلیق منطقه‌ده ورزقانین شیمال غربینده یئرله‌شیب
کی قالانین اوجالیغی دریا اوزوندن 1800 متر حدودوندادیر.
او "علی بیگ" و "آغجه"
قالالارینی خاروانا منطقه‌سی‌نین آیری تاریخی اثرلریندن دئییب و آرتیردی: علی بیگ
قالاسی خاروانا شهری محدوده‌سینده قره‌داغین دیزماریندا و کامتال داغی‌نین اتگینده
و حیفاظت اولموش منطقه‌ده یئرله‌شیر.
محمدی دئدی: باستانشیناسی
ایش بیلنلرین تحقیقینه گؤره, فتحعلی شاه زمانی خاروانا روسلار طرفیندن ایشغال اولور
و خاروانا اهلی اولان علی بیگ آدیندا بیر نفر بو قالانی تعمیر ائدیر و اوردا
روسلارین علئیهینه موباریزه ائلیر.
او آرتیردی: آغجه قالا 40
کیلومتر فاصیله‌اینن ورزقانین غربینده‌دیر و اونون اطرافیندا اوزی، کلم، بالوجه و
طویل کندلری واردیر.
فرهنگی میراث, ال ایشلری و
توریزم ایداره‌سی‌نین مودیر کولّی دئدی: آغجه قالا, قیز قالاسی آدینا دا
مشهوردیر.
محمدی خاروانین تاریخی
سابیقه‌سینه ایشاره ائدیب دئدی: خاروانا شهری ورزقانین و دیزمار منطقه‌سی‌نین قدیمی
یئرلریندندیر.
او آرتیردی: خاروانا
شهری‌نین تاریخی موقعیتیندن علاوه کی تاریخی بینالار اونو گؤرسه‌دیر, موناسیب طبیعی
موقعیتی‌ده وار کی بیر توریستی یئره تبدیل اولا بیلر.
او دئدی: خاروانانین گؤزل
داغلیق منطقه‌ده اولدوغونا گؤره هر ایل چوخلی تور, دولانماق اوچون جوشون قالاسی و
گول‌آخیرا گلیرلر.
اؤلکه‌نین توریزم مشورت
شوراسی‌نین عضوی بو منطقه‌نین آیری جاذیبه‌لرینه ایشاره ائدیب دئدی: هابئله یئددی
چشمه منطقه‌سی‌نین جنگللری, چیچکلی, ونیستان و کرینگان جنگللری, موشک‌عنبر و گولر
خاروانا یایلاقلاری, پیر سقا, زرآباد سدّی, خاروانانین حیاطلی کروانسراسی, سقندلین
میخی خطلی کتیبه‌سی و 1002 ایللیق قبیر داشی بو قدیمی شهرین گؤرمه‌لی
یئرلریندندیر.
ورزقان شهریستانی ایکی مرکزی
و خاروانا بخشلریندن تشکیل تاپیر و بو شهریستان شرقدن اهره, غربدن مرند و شبستره و
شیمالدان کلیبر و جلفایا و جنوبدان تبریزه دایانیر.