اؤلکه‌نین توریزم مشورت شوراسی‌نین عضوی دئدی: تبریز شهری اؤلکه‌ده یوخاری طبّی موقعیتینه گؤره, تخصوصی مرکزلرین دوزلمه‌سی و توسعه‌سی‌اینن اؤلکه‌نین سلامت توریستی قوطبینه چئوریلیر.

تراب محمدی تبریزده فارس خبرنیگاری‌اینن دانیشیقدا دئدی: شرقی آذربایجانین سلامت توریزمی زمینه‌سینده بالقوه ایمتیازلاری وار کی بو ایمتیازلارین اوستونده موتمرکیز اولسا, موفق صورتده درمان توریزمی عرصه‌سینه آددیم آتار.

او بونو دئماغینان کی ایندیلیقدا شرقی آذربایجان, اؤلکه‌نین درمان توریزمی زمینه‌سینه بیر قوطب ساییلیر, اوستاندا تخصوصی طبّی مرکزلرین دوزلمه‌سی و توسعه‌سیندن خبر وئردی.

محمدی بین‌المیللی ایقامت و درمان مرکزی کیمی «آی پی سی» مرکزی‌نین دوزلمه‌سیندن خبر وئردی و آرتیردی: بو مرکزین آچیلماسی‌اینن, اوستانا گلن درمان توریستلرین داها ایقامت موشکوللری اولمایاجاق.

اؤلکه‌نین توریزم مشورت شوراسی‌نین عضوی بونا ایشاره ائله‌ماغینان کی همسایا اؤلکه‌لر او جومله‌دن ترکیه و آذربایجاندان هر ایل چوخلی موسافیر درمان اوچون تبریزه گلیرلر, بو طرحین ایجراسینی, تبریزین درمان توریزمی قوطبینه چئوریلمه‌سینده موهوم آددیم بیلدی.

محمدی آرتیردی: درمان خرجی چوخلی اؤلکه‌لرده مخصوصاً اوروپادا چوخ باهادیر و آی پی سی مرکزین دوزلمه‌سی درمان هزینه‌سینی آزالتماق اوچون معمول یوللارداندیر.

شرقی آذربایجانین فرهنگی میراث, ال ایشلری و توریزم ایداره‌سی‌نین مودیر کولّی بین‌المیللی درمان مرکزلری‌نین توریزم زمینه‌سینده‌کی نقشینه ایشاره ائدیب دئدی: اوستانین مخصوص موقعیتینه گؤره درمانی توریزمه دیقّت ائله‌ماق چوخ ضروری گؤروشور.