آذربایجان مطبوعات و طنز آتاسی‌نین
وفاتی‌نین ایل دؤنومو عرفه‌سینده, اوستاد حمید آرش آزاد تالاری تبریزین شهر و
شهردارلیق موزه‌سینده آچیلدی.
مهرین گوزاریشینه گؤره,
روزنامه‌چی, موترجیم, طنز یازان, ناغیل یازان و هونرمند رحمتلیق اوستاد آرش آزادین
یادیگارلاری خانیواده‌سی طرفیندن تبریزین شهر و شهردارلیق موزه‌سینه اهدا اولوب کی
همشهریلر و تبریز وآذربایجان هونر و تاریخینی سئونلرین گؤروش معرضینده
اولسون.
بو تالاردا اوستادین مجموعه
اثرلری (چاپ اولان و ترجومه اولان کیتابلار), تقدیرنامه‌لری, ال یازیلاری و او
مرحومون قدیمی عکسلری نوماییشه قویولوب.
رحمتلیق اوستاد حمید آرش آزاد
1327-جی ایلین دی آیی‌نین 4-ده تبریز کوچه‌باغ دربندینین کوره‌باش محله‌سینده
دونیایه گلمیشدی.
او جیدّی اولاراق
روزنامه‌چیلیغی 1369-جو ایلیندن فروغ آذربایجان روزنامه‌سیندن –کی سونرالار آدی
مهدآزادی‌یه چئوریلدی- باشلادی و هائله آیری روزنامه‌لرله همکارلیقدان سونرا
1379-جو ایلیندن رحمته گئده‌نه قدر (1389) امین روزنامه‌سی‌اینن همکارلیق
ائله‌دی.
اوستاد حمید آرش آزاد هابئله
1374-جو ایلیندن «گل آقا» مؤسیسه‌سی‌اینن همکارلیغا باشلادی و اؤز طنز اثرلرینی شعر
و نثر صورتده «گل آقا» هفته‌لیغی و «اوشاقلار . . . گل آقا» آیلیغیندا چاپ
ائتدیردی.
او گل آقادا «پیوسته
همکارلار»ین بیریدی کی داییمی و جیدّی همکارلیغی واریدی. و اثرلری بو آدلارینان چاپ
اولوردو:
«گول اوْغلان»، «قیزیلباش»،
«طوطی بالاسی»، «بیگلر بیگی»، « تبریزلی وروجک »، «کوله لئیلک»، «خان‌دایی»،
«کوره‌باشی اوشاغی»، «آراز» و...
او بیرینجی یازیچی‌ایدی کی
«گل آقا»-دا تورکی دیلینده طنز شعر یازدی.
اوستاد حمید آرش آزاد اعتماد
ملی روزنامه‌سیله‌ده همکارلیغی واریدی.
اوستاد آرش آزاددان ایندیه‌قدر بو
ترجومه کیتابلار چاپ اولوب: «تورپاق دلیسی» طالب آب آیدینین اثری, «یاغی» یاشار
کمالین اثری, «قانلی دره قوردلاری» دورسون چاملیجانین اثری, و «آلفا سیّاره‌سی‌نین
موسافیرلری» امیل پتایانین اثری و اونلاردان علاوه میرزه علی اکبر صابیرین «هوپ هوپ
نامه»سینی کرئیل الیفباسیندان کؤچوروب چاپا یئتیریب.
اوستادین تورکی و فارسی
شعرلریندن «جیزیغیندان چیخما بالا» و «جولو- جولویه قالمادی» کیتابلارینا ایشاره
ائتمک اولار.
ایندی‌ده اونلارجا طنز ناغیل
و ایکی میندن چوخ قطعه سیاسی-ایجتیماعی طنز شعر چاپ اینتیظاریندادیر.
اوستادین سون کیتابی "اوخو
آت یایین گیزلت!" آدی‌اینن 1390-دا چاپ اولدو.
او اؤز عصری‌نین آدلیم و
مطرح یازیچیلار و شاعیرلری ایله ایرتیباطی واردی کی او جمله‌دن بونلاری آد آپارماق
اولار: رحمتلیق اوستاد یحیی شیدا ، رحمتلیق کیومرث صابری ، رحمتلیق عمران صلاحی ،
ابراهیم افشار و آیریلاری.
1377-جی ایلینده شرقی
آذربایجان فستیوالیندا و بیر دفعه‌ده 1384-جو ایلده زنجان
فستیوالیندا زنجان, اردبیل, شرقی و غربی آذربایجان اوستانلاری‌نین طنزچیلر ایچینده
بیرینجی مقامی اله گتیرمیشدی. و نئچه سراسری طنز, شعر, مقاله و جدول ریشته‌لریننده
یوخاری مقاملار گتیرمیشدی.
هابئله 1389-جو ایلین
تیرینده اؤلکه‌نین شیمال غرب مطبوعات و خبرگوزاریلر فستیوالیندا, اوستاد حمید آرش
آزاد بو فستیوالین باش مقاله ریشته‌سی‌نین بیرینجی روتبه‌سین اله گتیرماق ضیمنینده,
ایللر بویو روزنامه‌چیلیق یولوندا چکدیغی زحمتلره گؤره بیر آغ‌ساققال و تجروبه‌لی
کیمی تجلیل اولدو.
او رحمتلیق نهایتده 35 ایل
هونر و فرهنگ زمینه‌سینده چالشماقدان سونرا 1389-جو ایلین موردادین ایرمی اوچونده
ناخوشلوق اثرینده دونیایا گؤز یومدو.