موخدیره ماده‌لرینن موباریزه سیتادی
دبیری‌نین قائم مقامی دئدی: مترونو سو توتاندا بوتون مسئول‌لار و
دستگاهلار بسیج اولدولار کی آز مودّتده عئیبلر و ناقیصلیقلار آرادان گئدسین. آما
تأسوفله اعتیاد سئلی کی اؤلکه‌میزین نوجوانلار و جوانلارین تهدید ائلیر و بیر-بیر
آغزینا آلیر, هامی دیلین گیزله‌دیب و هر کس آیریسینی مسئول بیلیر.
طاها طاهري موخدّیره
ماده‌لرله موباریزه گونونده دئدی: موخدیره ماده‌لرله موباریزه اوچون, گرک جماعتین
هامیسی و مسئول‌لار ال-اله وئره‌لر و بو یولدا هر کس اؤزونو آیریلاریندان مسئول‌راق
بیله.
طاهری آرتیردی: ایندیلیکده
بونونلا کی ایجازه وئرمیریک هئچ مؤعتادین آیاغی زیندانا چاتسین, 100 مین نفر
قاچاقچی و موخدیره ماده ترانزیتچی‌سی زیندانلاردا وار و 100 مین نفر ده خیردا
قاچاقچی تانینیب.
او آرتیردی: کئچن ایکی ایل
یاریمدا 6000 ماشین و نئچه مین موتور و موبایل گوشیسی بو زمینه‌ده توقیف اولوب. بو
شوک گتیرن آمار و اؤلکه‌میزین گوندن-گونه آرتان موعتادلارین ساییسی, بس ائلر کی
هامیمیز بو عظمتلی سئلین قاباغیندا دایانماغا بسیج اولاق. او دئدی: موقدس ایسلامی
نیظامین قودرتی هئچ زمینه‌ده و هئچ کسه گیزلین دئییل آما سوروشماغا یئر وار کی
اعتیاد دئوی نه‌قدر قودرتلی و بؤیوکدور کی ایسته‌یه ایسلامی نیظامی دیزه
چؤکدوره؟
طاهری آرتیردی: بیلمه‌لیوق
کی موخدیره ماده‌اینن ساواشماق جهانی ایستیکبارینان ساواشماق معناسیندادیر. چونکی
او سسیز و حرکتسیز دونیا جوانلاری‌نین محو اولماسینا تاماشا ائلیر و اؤزو ده بو
مسأله‌یه کؤمک ائدیر.
موخدیره ماده‌لرینن موباریزه
سیتادی دبیری‌نین قائم مقامی دئدی: 12 مین نفر موخدّیره ماده‌سی دوزلدنین
افغانیستانا وارید اولماسینا مانع اولان اولمایاندا بو نتیجه‌نی آلماق اولار کی
بونلار هامیسی قاباقجادان طراحلیق اولموش سئناریودور کی خاص اؤلکه‌لرین داغیتماسی
اوچوندور.
او دئدی: دونیانین باشا
باشیندا موخدیره ماده‌نین توتولماسی آمارین یوزده 92 -سی ایراندا اولور و بو اونا
خاطیردیر کی موقدس ایسلامی نیظام ارزیشلره صادیقدیر.