ایپک یولو ایجلاسی‌نین ایکینجی بین‌المیللی ییغینجاغی اون‌بئش اؤلکه‌دن 800
تاجیر و بازرگانین حضوری‌اینن تبریزین پتروشیمی تالاریندا ایشه باشلادی.
شرقی آذربایجان اوستاندارین برنامه‌ریزلیق موعاوینی بو ییغینجاغین باشلاماسی
حاشیه‌سینده فارس خبرنیگارینن دانیشیقدا 15 اؤلکه‌دن دولتی مقاملار و تاجیرلر و
تولید ائلیه‌نلرین بو ییغینجاقدا اولماقلاریندان خبر وئردی.
او هابئله 800 داخیلی صنعتی و بازرگانی واحیدین بو ییغینجاقدا حاضیر اولماقلاریندان
خبر وئردی و آرتیردی: بو ییغینجاقدا اولانلار 10 تخصوصی پانل‌ده تیجاری موذاکیره‌لر
ائلیه‌جاقلار.
مسجدی خبر وئردی کی ایپک یولو ییغینجاغیندا موشاریکت ائدن هیأتلری ال
ایشلری نوماییشگاهی, خاریجی سرمایا قویما شهرکی و آراز آزاد منطقه‌سیندن گؤروش
ائلیه‌جاقلار.
او بو ییغینجاغین
اصلی هدفینی شرقی آذربایجانین بین‌المیللی رابیطه‌لرین گئنیشلندیرمک عنوان ائله‌ییب
آرتیردی: عین حالدا چالیشیروق اوستاندا تولید اولان محصول‌لارا تازا بازارلار
تاپاق و لازیم اولان دستگاهلاری ییغینجاقدا اولان اؤلکه‌لردن آلاق.
مسجدی ایپک یولونون
احیا ائله‌ماغین بو ییغینجاغین آیری موهوم هدفلریندن ساییب دئدی: ایپک یولو
ایقتیصادی جنبه‌سیندن سونرا فرهنگی جهتدن‌ده چوخ اهمیتی وار و بو یولون احیاسی
میلّتلر آراسینداکی رابیطه‌یه کؤمک ائدر.
ایپک یولونون قاباقکی
ایکی ییغینجاغی ترکیه‌نین «ترابزون» شهرینده قورولوب و ایکینجی ییغینجاقدا شرقی
آذربایجان هیأتی‌نین پیشنهادی اساسیندا, بو ییغینجاغین اوچونجو دؤره‌سی تبریزده
اولدو.