هر کس احساس ائله‌سه کی اونا توهین اولوب فوراً اؤزوندن دیفاع ائلر؛ حقیقتده توهین اینسانی مجبور ائلر کی تحمّول ائتدیگی روحی ضربه‌نین جوبرانیندا عکس‌العمل گؤرستسین. پس هر توهینین نتیجه‌سی بیر عکس‌العمل‌دیر کی بو حمله‌نین اوجو توهین ائدن شخصه و موقعیّته متوجیه اولار.

بو شراییطده اینسانلارین قاباغیندا چوخ یول یوخدور, پس گرک تحمول ائله‌دیقلاری دردین تلافیسی اوچون بیر ایش گؤره‌لر. توهین ائدنین قودرتی و منزیلتی برابر اولسا, عکس العمل نیشان وئرماق ائله‌ده چتین ایش دئییل. اینسان احساس ائدنده کی اؤز همنوعی طریفندن اونا توهین اولوب و هر ایکیسی‌نین‌ده موقعیتی بیردیر, توهینین قاباغیندا اونا توهین ائلر و یا حتّی فیزیکی حمله ائلر. خیابانلاردا گؤردوغوموز داعوا دالاشلار ائله بو مسأله‌نین نتیجه‌سیدیر؛ بیری قیشقیریب و آیریسی اونون جوابیندا یامان دئییب؛ بیر شوفئر تورموز ووروب و آیری شوفئر اونون بو ایشینه تئز تئز سیقنال چالماغینان جواب وئریر. سونراکی آددیمدا اونلارین بیری باشین جامدان ائشیگه چیخاردیب و یامان دئییب. حتّی ایش اورا یئتیشه بیلر کی 2 نفر بیر-بیرینی تانیمادان ال به یخه اولالار و بیر-بیرلرین کؤتکلیه‌لر.

آما قاپی همیشه بیر دابانی اوسته دولانماز؛ بعضاً اینسان احساس ائلر اونا توهین اولوب آما اؤزوندن دیفاع ائله‌ماغا گوجو یوخدور. بو حالتده کی ضعیف بیر طرف قودرتلی طرفین موقابیلینده قالیر, باعیث اولار جریان بیر آز چتینلشسین. مثلاً اگر ایش صاحیبی ایشچی‌یه توهین ائله‌سه, موسلماً ایشچی‌نین دیفاع اوچون گوجو اولمایاجاق و ایشین الدن وئرماق قورخوسو باعیث اولاجاق اؤزوندن دیفاع ائله‌مه‌سین. بو شراییط خانیواده‌ کیچیکلرینده ده باش وئره بیلر. معمولاً خانیواده موحیطینده اوشاقلارا توهین اولسا اؤزلریندن دیفاع ائلیه‌ بیلمزلر, اونا گؤره همیشه اؤز موقعیّتلریندن ناراضی اولارلار. بو دولانیش بیر حالدا تشکیل تاپار کی قودرتلی‌لر و بؤیوکلر بونا دوشونمزلر کی اللری آلتینداکی ضعیفلر اولا بیلر توهینلرین جوبرانینا بیر ایشلر گؤرسونلر.

بیر شخص, اوشاق, ایشچی و یا . . . ضعیف موقعیّتده قالاندا کی توهینی تحمول ائله‌ماقدان سونرا آیری چاره‌سی اولمایا, بو شراییطین ایدامه‌سی‌اینن ایچینده بیر غضبه دوچار اولار کی نه اینکی آرادان گئتمز بلکه گوندن گونه گوجله‌نر؛ بیر غضب کی ایللر سونرا ناهنجار شراییط قاباغا گتیرر. اشخاصدا یارانان بو خشملرین نتیجه‌سی فاجیعه‌یه چئوریله بیلر و یا شخصی عوض آچماغا مجبور ائلیه بیلر.

موجروملرین چوخونون یاشاییشین آراشدیرماق گؤرسه‌دیر کی اونلار اوشاقلیقلاریندا توهین معرضینده اولوبلار و اؤزلریندن دیفاع ائلیه بیلمه‌ییبلر اونا گؤره بؤیوکلوکده بیر جورم نقشه‌سی چکیب ایچلرینده کی ایللر بویو تالانیب قالمیش غضبی بوشالدیبلار. اوشاقلیق دوره‌سی بعضیلرین نظرینه موهوم اولماسا و خانیواده‌لرده جیدی توتولماسا دا اوشاقلارینان اولان رفتار اونلاری داها یاخشی و یا داها پیس گله‌جگه حاضیرلاییر.