بين‌الميللي ال ايشلري نومايشگاهين
قورولماسي‌اينن ايپك يولو تبريزدن كئچير.
شرقي آذربايجانين ال ايشلري فني شوراسي‌نين
رئيسي دئدي: داخيلي و خاريجي هونرمندلرين مخصوصاً ايپك يولو اؤلكه‌لرين هونرمندلري‌نين
حضوري‌اينن، تبريزده بين‌الميللي ال ايشلري نومايشگاهي قورولور.
فارسين تبريزدن وئرديغي گوزاريشه گؤره،
تراب محمدي تبريزده ال ايشلري كارگاهيندان گؤروشده خبرنيگارلارينان دانيشيقدا بو
نومايشگاهين زمانينا ايشاره ائديب دئدي: بو ال ايشلري نومايشگاهي نئچه خاريجي
اؤلكه و اؤلكه‌ميزين بوتون اوستانلاريندان هونرمندلري‌نين حضوري‌اينن تبريزين بين‌الميللي
نومايشگاهيندا قورولاجاق. محمدي آيدينلاتدي: بو نومايشگاهدا مالزي، برنئي، تركيه،
آذربايجان و تاجيكستان كيمي اؤلكه‌لرين هونرمندلري حاضير اولاجاق.
او داخيلي هونرمندلرين بو نومايشگاهدا
فعال شيركت ائتمه‌لينه ايشاره ائديب، آرتيردي: اؤلكه‌ميزين هر اوستاني اوچ ساتيش
غورفه‌سي و بير جانلي ال ايشلر ايجرا غورفه‌سي‌اينن بو نومايشگاهدا شيركت ائده‌جك.
اوستانين فرهنگي ميراث، توريسم و ال
ايشلري كول موديري ايدامه‌ده دئدي: شرقي آذربايجانين موختليف ال ايشلري ريشته‌لري
او جومله‌دن: گوموش ايشله‌مه، سيراميك، ورني، تخته ايشلري، باتيك چاپي، سونّتي
سرّاجليق، تذهيب، كيليم، ممقان تيكمه‌سي، داش يونما، شوشه بوياماسي و آيري فعال
ريشته‌لر بو نومايشگاهدا اولاجاق.
او هر اؤلكه‌نين فرهنگينده ال ايشلريني
اصلي يئر صاحيبي بيليب دئدي: تبريزين ايپك يولو اؤلكه‌لري آراسيندا دايانماسيني
نظرده آلماقلا بو يولون اؤلكه‌لري‌نين ال ايشلريندن نومايشگاه قورماق، شرقي
آذربايجان و ايرانين ايپك يولو تيجارتينده موهوم نقشيني احيا ائليه‌بيلر.
او خاطيرلادي: ايپك يولو ال ايشلري بين‌الميللي
نومايشگاهي، خاريجي اؤلكه‌لر و بوتون اوستانلارين هونرمندلري‌نين حضوري‌اينن بو
ايلين تير آيي‌نين بيريندن دؤردونه‌جن تبريز بين‌الميللي نومايشگاهين اميركبير
سالونوندا قورولاجاق.