مرند شهرداري فرانسه‌لي‌لرينن تئلئكابين
قوشماسي اوچون تفاهومنامه‌دن خبر وئردي.
سیدرضا هاشمی مرندده فارس خبرنيگاري‌اينن
دانيشيقدا دئدي:اوچونجو سرمايا قويما ييغينجاغيندا، داخيلي و خاريجي شيركتلرينن
تفاهومنامه ايمضالاماقدا شرقي‌آذربايجان ايكينجي روتبه‌ني گتيريب.
او دئدي: مرند شهري اوروپا آسيا ترانزيت
يولونون اوستونده اولماغينا گؤره موختليف زمينه‌لرده ايقتيصادي و سرمايا جذب ائله‌ماق
بؤلومونده، ايش و ايشتيغال يارالتماقدا موهوم نقش اوينايا بيلر.
هاشمي بونا ايشاره ائله‌ماغينان كي ايكي
آيين ايچينده شهرداري‌نين هيمّتي و فرمانداري و شهر شوراسي‌نين حيمايتلري‌اينن
موختليف عومراني-خدماتي و فرهنگي بؤلوملرده 84 دن آرتيق طرح ايجرا اولوب كي عزيز
مرندلي‌لر بونو ياخيندان لمس ائديبلر. و بو طرحلر شرقي آذربايجانين مؤحترم
اوستانداري‌نين حضوري‌اينن ايفتيتاح اولوب.
او هابئله عومراني و خدماتي طرحلرين
ايجراسيندا نئچه بؤيوك تفريحي طرحين ايجرا اولماسين ايسته‌ييب دئدي: اگر بير يئره
يئتيشاق كي مرندي ييخيب تازادان دوزلتماق لازيم اولا بو ايشي گؤره‌روق تا مرند
شهري اوستان سطحينده داخيلي و خاريجي توريستلرين جذبينده اؤز اصلي يئرين تاپسين.
مرندين شهرداري، نئچه داخيلي و فرانسه‌لي
شيركت‌اينن، توريستي منطقه‌لر «ميشو» و «يومورو تپه»ده تئلئكابين دوزلتماق، بوغدا
ساتان مئيدانين توسعه طرحي، بؤيوك موسافير ترمينالين يولا سالماسي، بؤيوك
تيجاري-خدماتي و مسكوني مركزي‌نين 21 طبقه‌ده يارالتماسي، موتوري پاركين
يارالتماسي و قديم شهرداري بيناسي‌نين شومالي ضيلعين توسيعه‌سي اوچون ايمضالانان
تفاهومنامه‌دن خبر وئريب دئدي: بو طرحلرين ايجراسي اوچون اوست-اوسته 96 ميليارد
تومن هزينه اولاجاق.
او آيدينلاتدي: خانيملارا مخصوص پاركين دوزلتمه‌سينه
اوّليّه ايشلر گؤرولوب كي موطاليعه‌نين قورتولماسي‌اينن، تئزليغينان بوطرح مرندده
باشلاياجاق.
هاشمي ايدامه‌ده دئدي: مرند شهرداريسي
جامع شهري موديريّتين ايكينجي نوماييشگاهيندا اؤز قودرتلي حضوري‌اينن اوستان
شهرداريلاري ايچري‌سينده ائليه بيلدي اوستان مسئول‌لاري و گؤروشچولرين ديقتيني جلب
ائليه.