سلامت نيوز: گونده‌ليق خبرلرين آراسينده
و اورگي اينجيدن ايختيلاس و سوءايستيفاده ايبهاملارين يانيندا اونداكي اؤلكه‌نين
بيرينجي قضايي مقامينا هوجوم اولور و بؤيوكلر دينميرلر، اونداكي غارتگرلر و
سويقونچولار اؤزلرين خطرده گؤروب اؤزلرين قورتارماقدان اؤترو سويو بولانديريرلار،
جاميعه‌نين افكاري بو چال-چاپدا مات و حئيران، ائله فاجيعه‌لر گؤرور كي جاميعه‌ده
كي خشونتين سرچشمه‌سي و اونو صعودي حالتده چوخالماسينا سبب اولور.
دؤرد ياشلي قاتيل كي توپاچاينان ايكي
ياشلي عم‌قيزيسين اولدورور و بو قتل اونون اوچون بير اويون حدّينده قالير. بير آتا
كي توّهومون اوْجوندا چوخ فجيع صورتده آلتي ياشلي قيزين اؤلدورور و روانگردان
مادّه‌لرين اثرينده اونون نامشروع اولماق توّهومو وار. بير آنا كي اوشاغين شيطان
بيلير و بيله‌سين اؤلدورور و بونلارين هاميسيندان وحشتلي و قورخمالي اوچ اوشاغين
آتالاري‌نين الي‌اينن اؤلمه‌سيدير كي كئچن بير آيين ايچينده جاميعه‌ميزده باش
وئريب.
خشونتين گون به گون چوخالماسي اونون
جاميعه‌ده اينعيكاس تاپماسي‌نين نتيجه‌سيدير، اونداكي اوچ كرمانشاهلي اوشاغين
اؤلدورولمه‌سي فيلمي كي اونلاردان بيري‌نين موبايلي‌اينن گؤتورولوب جماعتين
حئيرتلي گؤزلري‌نين قاباغيندا اينترنته قويولور، نئجه خشونتين آزالماسيني گؤزله‌ماق
اولار؟
فاجيعه‌لر و قتل‌لرين خبرلريني
آراشديرماميش و عيلّتلريني آچيقلاماميش داغيتماق بير طرفدن و وحشتلي عكسلر و
فيلملرين بلوتوثونان الدن اله دولانماسي و ايندي كرمانشاهدا كي جينايتين اينترنتده
كي فيلمي بونو نيشان وئرير كي خشونتي سئومك بو صحنه‌لرين تاماشاسينا باعيث اولور.
بو عكس و فيلملري داغيدانلارين مقصدي خبر وئرماق دئييل چون اگر بئله اولسايدي بو
وظيفه‌نين رسالتي ايجاب ائدير كي بعضي صحنه‌لر اوشاقلار و نوجوانلارين گؤزونه دگمه‌سين.
بونا گؤره رفتار پاتالوژيسي باخيمدان بوجور ايشلر تكجه خشونت سئومه ناهنجارليغيني
نيشان وئرير و بو صحنه‌لرين تاماشاچيلاري‌دا ايكي دسته‌ديلر؛ يا كونجكاوليقدان و
خبر بيلمكدن اؤترو اونلارا باخيرلار و يا وحشتلي صحنه‌لره باخماقدان لذت
آپاريرلار. هر ايكي صورتده خانيواده‌لر و فرهنگي نهادلار و رسانه‌لرين وظيفه‌سي
ايجاب ائدير كي يوبانماميش و جنايتين ساييسي بوندان آرتيق چوخالماميش بير ايش گؤره‌لر.
كارشيناسليق و آراشديرماق، عيلّتلري
سايماق و قاباغين آلماق يوللارين دئماق، قيسا مودت يوللارديلار. قضاوت و تحقيق
حريمينه تجاووز ائدنلره جواب وئرماق، جاميعه‌يه افسورده‌ليغي و وحشليغي تحميل ائله‌ين
ايتّيفاقلارين قاباغين آلماغا لاب اصلي يولدور.
منبع: خبرآنلاين
مجید ابهری