اصلي توركي اولان و روس ديلينه‌ده يول
تاپان «قونقا» سؤزونون معناسي چرخ و تكردير كي همان غربيلرين ترامواسي ساييلير و
1280 هيجري قمري ايلينده نئچه نفر تبريزلي خيّير اينسانين هيمّتي و «قاسم خان امير
تومان»ين چاليشماسي‌اينن تبريزده دوزلدي. قاسم خان امير تومان فرانسه‌نين سن‌سير
دانيشگاهيندا درس اوخوموش و تبريزين بيرينجي شهرداري اولاندان سونرا، قورقوشوم
چاپخانا، برقي چيراق و تيليفونو اؤلكه‌ده بيرينجي دفعه اولاراق تبريزه گتيردي.
بو نقليه وسيله كي بيناسي قويولان گوندن
اوروپا اؤلكه‌لريندن ايلهام آلماغينان «تراموا» آدلانميشدي، آذربايجانين تزار
روسيه‌سي طرفيندن ايشغال اولان زماني اونلارين بو وسيله‌دن ايستيفاده ائله‌ماقلارينا
گؤره ياواش ياواش قونقا آدلاندي. روسلار 1288 هيجري شمسي ايلين ارديبهشتين 9-وندان
1296-جي ايلينه جن آذربايجاني ايشغال آلتيندا ساخلاديلار.
قونقا 1320-نين شهريورينه‌جن ايشليردي و
بو زماندا آذربايجانين شوروي قوشونو طرفيندن ايشغال اولماغينان هميشه‌ليق ايشدن
توشدو.
اؤز زمانيندا يوخاري اهميتي اولان بو
وسيله تبريزلي‌لر اوچون نقليّه وسيله‌سيدي و ايندي ده دوزلمه‌سيندن 110 ايل كئچمه‌سينه
باخمياراق، اونون موجسمه‌سي توريستلرين ديقتيني جلب ائلير.
شكسيز تبريزده قونقانين دوزلتمه‌سي و
يولا سالماسي شهرين بوگون كي موديرلرينه اولگو اولا بيلر كي لاب آز هزينه‌اينن و
يوخاري هيمّت و عزمينن ائليه بيلديلر شهر ايچينده حمل و نقل مسأله‌سين
راحاتلادالار و جماعتين وقت و انرژيسينده قناعت ائده‌لر.
قونقانين يولا سالماسيندا ديقت ائله‌مه‌لي
مسأله بوراسيدير كي او زمانين بؤيوكلري‌نين چاليشماقلاري شهر زيبيل‌لريني ييغماق‌ايدي
كي شهرين ديك چوخور اولماسي زيبيل‌لرين داشيماسين چتينله‌ديردي و زيبيل‌لري دؤرد
آياقلي‌لارينان‌دا داشيماق چتين اولوردو.
بونا خاطير آت ترامواسي خطيني قورماق لاب
ياخجي يوليدي كي وارطان آدلي بير پئيمانكار اونون موقدماتي ايشلرين گؤردو و البته
تاريخي سندلره گؤره اونون شاسي‌‌سي روسيه‌دن گتيريلميشدي.
قونقادان اوّلده، دمير يولوندان منصور
چاهارراهيناجن زيبيل و شهرين نوخاله‌لرين ييغماغا و هابئله چوخورلاري دولدورماغا
ايستيفاده اولورودو كي سونرالار شاسي‌نين اوستونه اوتاق قوشولدو و شهر ايچينده
موسافير داشيماغا دا ايستيفاده اولدو.
قونقا واگونلاري‌‌نين تورموزلاري واريدي
و دال قاباغيندا آتلارين جيلوون باغلاماغا يئري واريدي و قونقا خطّين آخيرينه
چاتاندا آتلاري قاباقدان آچيب دالي‌يا باغلارديلار.
بو گون قونقا مئيداني او زماندان قالان
ياديگاردير كي حقيقتده قونقانين آخير ايستگاهي ساييليردي و او منطقه‌ده قيرميزي
رنگده بير ايصطبل دوزلتميشديلر كي آتلاري اوردا ساخلارديلار.
تبريزين ياشلي جماعتيندن بيري قونقا
بيليطي‌نين ساتماسينا ايشاره ائديب دئيير: بو بيليطلرين قيمتي هر نفره بير
عابّاسي(ريالين اوندان بيري)ايدي كي بيليط ساتان كيف الينده دولانيب ساتاردي.
88 ياشيندا اولان يعقوب عليزاده آرتيرير:
هر كس بيليطسيز قونقايا مينسه‌ايدي كي چوخراق اوشاقلار بو ايشي گؤررديلر سوروجو
شاللاغي‌اينن اولارين اللريندن ائله ووراردي كي نئچه هفته‌يه‌جن يئري قالاردي.
او بونو دئماغينان كي قونقا تبريزين او
زمانكي قيافه‌سيني بير جور مودئرنيزه ائله‌ميشدي، دئدي: البته او زمانلار هامي
قونقايا ميننمزدي و بو وسيله بير جور لوكس وسيله ساييليردي.
عليزاده آرتيردي: 1320-جي ايلين سياسي
حاديثه‌لري جريانيندا كي روس قوشونو تبريزه گلدي، قونقا ياواش ياواش ايشدن توشدو.
آما قونقانين ايشدن توشماغي‌نين اصلي
عيلّتي بو ايدي كي روسلار چاليشديلار اونو ميكانيكي ائله‌سينلر آما باشارانماديلار
چون كي روسلارين دوزلتديقلاري موتوررون پروانه‌سي‌نين اولماماسينا گؤره موتور
قيزديريردي.
تاريخي سندلر و او زماني گؤرن آداملارين
دئديغينا گؤره، آز مودّتدن سونرا روسلار قونقانين آتلارين آپارديلار و رئيل‌لر
نئچه ايل قالديلار و 1324-جو ايلده خيابانلار آسفالت اولاندا اونلاري‌دا
ييغيشديرديلار.
بويون، سحرلر گونون چيخماغي‌اينن تبريز
جماعتي‌نين گؤزلري قونقا مئيدانينداكي اولان قونقا موجسمه‌سينه ساتاشير كي
قديم زمانلاردا او اينسانلارين تازا طرحلرين يادا سالير كي اؤز آراميش و
آساييشلرين جماعتين ريفاهيندا خولاصه ائله‌ميشديلر. او كسلر كي ايللر بويودور
توپراق آلتيندا قاليبلار آما قالارگي اثرلري جماعتين گؤزلرين تومارلير و اونلارا
غورور گتيرير.
قونقا موجسمه‌سي اصلي‌سيندن اوندا بير
بؤيوك اولاراق تبريزين هونرمند و موجسمه‌دوزلدني «احد حسيني»نين الي‌اينن 1382-جي
ايلينده دوزليب و قونقا مئيدانينا قويولوب.
گوزاريشي يازان: سیدیحیی مرتضایی