تازا اينتيظامي نهاد مودرن موجروملر اينن
موباريزه‌ده
«فتا» پوليسي اينترنت موجروملري‌نين
جنگينه گلير
فيشينگ (اينترنتي بؤرك قويماق)، جعل،
اينترنتي اوغورلوق، هك و نوفوذ، سازمانلاشميش كامپيوتري جورملر، پورنوگيرافي
(سوءاخلاقي موريدلر) و افرادين خوصوصي حريمينه تجاووز ائتمك، مجازي فضانين موهوم
جورملريندندير.
فارس خبرگوزاريسي‌نين تبريزدن وئرديگي
گوزاريشه گؤره، شرقي آذربايجان ايطّيلاعات تبادول و توليد فضاسي‌نين رييس پوليسي،
خبرنيگارلارينان دانيشيقدا دئدي: «فتا» پوليسي مودرن و سونّتي جورملرينن موقابيله
ائله‌ماغين ايرتيباطي پرده‌سيدير.
محمد حدادي دئدي: ايطّيلاعات تبادول و
توليد فضاسي (فتا) پوليسي تازا بير پوليسدير كي بوگونكي جاميعه‌نين ضرورتلري و
بشري جاميعه‌نين پيشرفت عرصه‌سينده اينترنتدن گئنيش صورتده ايستيفاده ائله‌مه‌سي،
اوندان تؤره‌نن تهديدلر و آسيبلره خاطير، ايسلامي ايران جومهوريس‌نين اينتيظامي
نيروسي زيرمجموعه‌سينده ايطّيلاعاتين تبادول و توليد فضاسي‌نين امنيّتيني تأمين
ائله‌مك اوچون 89-نجو ايلينده مركزده و اونون تبعينده 90-نجي ايلين اوّل‌لرينده
اوستانلارين مركزلرينده او جومله‌دن شرقي آذربايجان اوستانيندا فعاليته باشلادي.
او دئدي: اوردان كي جماعتين چوخو مجازي
فضاينان تانيشليقلاري يوخدور، بو فضاداكي آسيبلر حقيقي فضادان چوخ اولور و جاميعه‌ني
جوبران اولمايان خطرلرينن اوز به اوز ائلير.
حدادي اينترنت و مجازي فضانين موهوم
جورملري‌نين توضيحينده دئدي: فيشينگ(اينترنتي بؤرك قويماق)، جعل، اينترنتي
اوغورلوق، هك و نوفوذ، سازمانلاشميش كامپيوتري جورملر، پورنوگيرافي (سوءاخلاقي
موريدلر) و افرادين خوصوصي حريمينه تجاووز ائتماقدان آد آپارماق اولار. او فتا
پوليسي‌نين هدفلريني ديني و ميلّي كيمليغي، جاميعه‌نين اينساني و ايسلامي
ارزيشلري، خوصوصي حريمين و شرعي آزادليقلارين ساخلانماسي عونوان ائله‌دي.
بو اينتيظامي مقام ايدامه وئردي:
ايندي اينترنتي جورملره يئتيشماق بئله‌دي كي جورمدن سونرا موجرومو تشخيص وئريب
قضايي مرجعلره عريضه تنظيم اولور و قضايي دستوري‌اينن بو پوليسين كارشيناسلاري
مسأله‌ني آراشديريب و اگر استحفاظي حوزه‌ده تانينسالار قضايي مرجعين هماهنگي‌ليغي‌اينن
دستگير اولارلار و اگر آيري اوستانلاردا اولسالار يئنه لازيم اولان قضايي
هماهنگليقلار انجام تاپار و اگر اؤلكه‌نين ائشيگينده اولسا اينترپولا ايرجاع
اولار.