تبریز سنجیش موزه‎سی، تبریز کلانشهرینین غنی موزه‎لریندن بیریسی اولاراق ده‎یرلی گنجینه‎لری ساخلاماقدادیر. بئش میلیون ایللیک آغاج کؤتویو اونلارین بیریسیدیر.

بو آغاج کؤتویو سئنوزویک زامانین پلیوسن دؤنمینه عاییددیر و بیر ایل قاباق بیر یئربیلیمچی (زمین‌شناس) طرفیندن مغان‌ین پارس‎آبادیندا بیر یئردن آلینیب تبریزه گتیریلیبدیر.

بو گزارشه اساساً، بو کؤتویون جینسی، زامان زامان سیلیسله‌شیب و کؤتئک داشلاشیب فوسیلله‎شیبدیر. هابئله، بو آغاجین آوندلری و جداره‏لری اورگانیک ماده‏لری جذب  ائدرک برکیییب و ائشیک لایه‏سی دمیر پاسی رنگی آلیبدیر.

سلماسی ائوینه مشهور اولان تبریز سنجیش موزه‎سینده، ایران‌ین ایلک زامان، آغیرلیق، برق، سو و بنزین اؤلچمه آلتـلری ساخلانیلیر. قدیم سلماسی تیکینتیسینین 160 ایلدن چوخ قیدمتی وار و قاجار زامانینا عاییددیر.

بو موزه‎ده، مختلف عصرلردن، قیزیلچی ظریف ترازوسوندان میوه و تره‎بار مئیدانلارینین بؤیوک قاپانلارینا قدر مختلیف آغیرلیق اؤلچمه آلتـلری، هم ده چکی داشلاری و ایلک نفت اؤلچمه قابلاری ساخلانیلیر.

اسطرلاب، سماوی کۆره کیمی نجوم آلتـلری، سوهاوابیلیم (هواشناسی) آلتـلری و مختلف قطب‎نما بو موزه‎ده ساخلانیلیر.

بو موزه‏نین تیکینتیسی شاد فضالی اولوب اوچ ضیلعده، 650 مئتیر مربع حیط و 875 مئتیر مربع زیربنادا ایکی طبقه‎ده تیکیلیبدیر.