جام جم آنلاين: بؤيوك تهران راهنمايي و
رانندگي پوليسي‌نين رَييسي پايتختده گئجه خيلافلاري‌نين حلقه‌سيني دارلتماقدان و
تهراندا ويراژ وئرمگينن ضربتي برخورد ائله‌مكدن خبر وئريب دئدي: بو طرحين بيرينجي
گئجه‌سينده 250 ماشين ياتيريلدي و حودوداً 300 ماشين‌دا جريمه اولدو.
سردار حسين رحيمي ايسناينان دانيشيقدا،
بونا ايشاره ائله‌مگينن كي موتأسيفانه گئجه ساعت 22 دن سونرا بير تعداد جوان
پايتختين اوتوبانلارين اؤزلرينه جولانگاه ائديرلر و خطرلي ايشلر، كورس قويماق و
ويراژ وئرمك و بو كيمي ايشلر گؤرورلر، آرتيردي: بونا توجّه ائله‌مگينن كي جماعت
بيزدن تهرانين اوتوبانلارين خطرلي ائله‌ين بوجور تخلّوفلارينان برخورد ائله‌مگي
ايستيرلر، مهرين يئددي‌سيندن بو ضربتي طرح ايجرايا قويولوب.
او بونو بيان ائله‌مگينن كي بو طرحده
ويراژ وئرمك، غير موجاز سورعت و سيبقت، غير موجاز دؤنمه و . . . كيمي خيلافلارينان
برخورد اولور، دئدي: بو طرحين ايجراسي جيدّي صورتده باشلانيب و بوجور شوفرلر بيلمه‌ليديلر
كي اوتوبانلار بئله ايشلرين يئري دئييل و قطعاً پوليس بو افرادينان شيدّتلي برخورد
ائليه‌جك و ايجازه وئرميه‌جك بونلارين حركتلري جماعتين جانين خطره سالا.
تهران راهور پوليسي‌نين رَييسي دئدي:
رانندگي خيلافلارينا يئتيشمگين تازا قايدالارينا گؤره، غير موجاز سورعت و سيبقت و
ويراژ موريدلرينده تصديقي آلماق، ماشيني ياتيرتماق و اؤزلري‌نين روحي و رواني
ساغلامليغيني تست ائله‌مك اوچون مربوط اولان مقاملارا موعرفي ائله‌مگي نظرده
توتولوب.
او تازا الكول، موخدّيره مواد و
روانگردان تست دستگاهلارين آلينماسيندان خبر وئريب دئدي: بو دستگاهلار تئزليگينن
اوتوبان پوليسي‌نين ايختياريندا اولاجاق و خطرلي ايشلر گؤرن و الكولي و روانگردان
ماده‌لريندن ايستيفاده ائله‌مگه مشكوك اولانلاردا، همان يئرده تست اولاجاقلار.