یالانچی بیری اینن ائولنمیسیز؟ بئله اولسا رابطه‌لریزده اعتمادسیزلیق، غضب و آچیلیق موج وورور و دلیلی بو یالانچیلیقدیر. بو مطلبی اوخوساز یالانچی حیات یولداشینان نه ائتمه‌لی اولدوغوزو بیلرسیز.
حیات یولداشیزین سیزه یالان دئماغین سببینی درک ائله‌ماق بیر آز چتین اولا بیلر. آیری طرفدن ائولندیغیز زمان بیر بیریزله عشق، وفالی اولماق و صداقت پیمانی باغلاییرسیز. بو یالان دانیشماقلار سیزده خیانت معرضینده اولماق کیمی بیر حسّ یارادا بیلر. حیات یولداشیزین یالان دئدیگینی بیلدیغیز زمان اؤز عکس‌العملیزی‌ده نظرده آلمالیسیز. چونکی سیزین رفتاریز اونو داها آرتیق‌دا یالان دانیشماغا وادار ائله‌یه بیلر.
حیات یولداشیزین یالان دانیشماسی‌نین سببی اوتانماق و یا دردسردن قاچماق اولسا آیری بیر شئیدیر، سیزین ناراحتلیغیزین قاباغینی آلماق اوچون یالان دانیشماسی آیری مسأله‌دیر. اونون یالان دانیشماقدان مقصدینی بیلسز، مقابلینده نه ائده‌جاغیز باره‌ده یاخجی تصمیم توتا بیلرسیز.
انسانلار نه‌دن یالان دانیشیر؟
ظاهراً یالان دانیشماق بیزیم سیستم برنامه‌میزده وار و ائله یاشاییشیمیزین اول ایللریندن باشلاییر. حتی ایکی یاشلی اوشاق کلمه‌لرین نه گوجه صاحب اولدوغونو بیلدیگی زمان یالان دانیشا بیلیر!
اولا بیلر یالاندان منظور آیریسینی اذیت ائله‌ماق اولمایا آما معمول نتیجه‌سی بودور. بعضی انسانلار اؤزلریندن مدافعه ائتمک اوچون یالان دانیشیرلار. بعضیلری اؤزلرینی مجازاتدان و اختلافدان قاچیرتماق اوچون و یا بیر موقعیته چاتماق اوچون یالان دانیشیرلار.
چوخوموز یالان دانیشاریق. مثلاً یولداشیمیز تازا آلدیغی لباسین گؤزل اولمادیغینا رغماً اونلارین چوخ گؤزل اولدوغونو دئییریک. بیز استخدام مصاحبه‌لریمیزده ایشه آلینماق احتمالینی چوخالتماق اوچون یالان دانیشیروق.
بیز طبیعی اولاراق اطرافیمیزین رفتارلارینی تقلید ائدیریک. یالانین طبیعی بیر مسأله کیمی قبول اولوندوغو محیطده بویا باشا چاتمیش اولساق، اولا بیلر بؤیویندن سونرا اونلار کیمی رفتار ائدک.
آما تکجه سیز یالانین نه‌قدری‌نین قبول اولا بیله‌جاغی باره‌ده تصمیم توتورسوز. مخصوصاً مسأله‌نین حیات یولداشیزینان باغلی اولدوغو زمان. مثلاً بیر آغا خانیمیسینا بللی بیر ساعتده ائوه چاتاجاغینی دئییر. آما منطقی حالتده او ساعتده ائوه چاتماسی ممکن دئییل. بو کیشی‌نسین تکجه مشکلی زمانین دوز تخمین وورا بیلمیه‌جاغیدیر. یوخسا یالان دانیشماق نیتینده دئییل.
حیات یولداشیزینان رفتاردا بو مسأله‌نی نظرده آلمالیسیز. انجام وئرماق نیتینده اولمایان بیر ایشی دئیَن کیشی اینن زمان مدیریتی باشارمایان کیشی‌نین فرقی واردیر.
بعضاً یالان الیندن او قدر بئزیرسیز کی نه ائده‌جاغیز باره‌ده تصمیم توتا بیلمیرسیز. بو زمانلار یاخشی اولار بیر خانواده مشاوری اینن مشورت ائلیه‌سیز.
هر یالانا منفی باخمایین. هر زادی بررسلیق ائله‌یندن سونرا تصمیم توتون. اولا بیلر حیات یولداشیز سیزی سوپریز ائله‌ماق ایسته‌ییر. مثلاً ایکینجی ایش تاچیب و آخشاملار اونا گؤره یوبانیر و اونون پولو اینن سیزه بیر هدیه آلماق ایسته‌ییر.
رفتاریزی دَییشین
مواظب اولون سیزین رفتاریز حیات یولداشیزی داها آرتیق یالان دانیشماغا تشویق ائله‌مه‌سین. مثلاً یولداشلاری اینن داغا گئتدیب قاییتدیغی زمان اونون دوستلاریندان نه قدر متنفر اولدوغوزو دئدیغیز زمان اونون تشویق ائلیرسیز گلن دفعه اونلارینان گئدنده سیزه یالان دانیشسین.
حیات یولداشیزین اعتمادینی جلب ائده‌بیلسز و اونون خیالینی اؤزوز باره‌ده راحت ائله‌سز او بیر داها سیزه یالان دانیشمایاجاق. پس لازمدیر بیر بیرزه آچیق میدان وئره‌سیز و اونون هر ایشینی گودمیه‌سیز.