فارسین وئردیغی خبره گؤره شرقی آذربایجانین ولی فقیه نماینده‌سی فرهنگ وزیری‌نین معاونی اینن گؤروشده دئدی: اسلامی ارشاد و فرهنک وزارتی‌نین بوینوندا بؤیوک و آغیر مسئولیتلر وار، بو مسئولیتلرین بیر سیراسی آیری وزارتلر و نهادلارینان بیر مسیرده‌دیر.
او، فرهنگ حوزه‌سینده موازی ایشلماقدان اوزاق اولماغا اشاره ائله‌ییب آرتیردی: قرآنی فعالیتلر، ارشاد، اوقاف، اسلامی تبلیغات و ... مختلف نهادلارین موازی ایشلدیغی زمینه‌لردندیر. آما بو نهادلاری هدایت ائله‌ییب بیر مسیرده قرار وئرن یوخدور.
تبریز امام جمعه‌سی آرتیردی: اوقاف دئییر: مسجدلرین مسئولیتی بیزینندیر. تبلیغات سازمانی‌دا مسجدلرین انجمن اسلامیلاری‌نین ایشلرینه یئتیشیر، بسیجین‌ده پایگاه مقاوتی وار، اسلامی ارشاد دا مسجدلرین فرهنگی- هنری کانونو و کتابخانالارینی دولاندیریر. دوغرودان بللی دئییل مسجدلرین اصلی متولیسی کیمدیر؟ بو نهادلارین آراسیندا حتماً هماهنگلیق اولمالیدیر.
او بونو دئماغینان کی مسجدلرین مشکل‌لری تکجه بیر نهاد توسطی اینن برطرف اولمالیدیر آرتیردی: انتظاریمیز وار نظامین یوخاری سطحلرینده بو مسأله‌یه چاره دوشونولسون، مملکتین فرهنگی بودجه‌سی او قدر آزدیر کی موازی ایشلماغا و بودجه هدر وئرماغا یئر یوخدور.
تبریز امام جمعه‌سی ادامه‌ده مجازی فضایا نظارتین آرتمالی اولدوغونا اشاره ائله‌ییب دئدی: مجازی فضا مدیریت اولمالیدیر. انتظاریمیز وار اینترنتی سایتلار کامل اشرافینان نظارته آلینسین. چوخلو خبر سایتلاری وار کی ارشاد طرفیندن مجوزلری یوخدور.