شرقی آذربایجان استانداری بحران مدیر کلّی بو اوستاندا اولان سئلین نتیجه‌سینده ایندی‌یه قدر 30 نفرین جسدی‌نین تاپیلماسینا اشاره ائله‌ماغینان دئدی: بحران مدیریتی عضولری بوتون امدادرسان دستگاهلارین کؤمگی اینن آختاریش و نجات عملیاتینی انجام وئریرلر.
دونین یاغیشی نتیجه‌سینده شرقی آذربایجانین مختلف منطقه‌لرینده سئل گلدی.
هرچند اوستانین هواشناسی اداره‌سی بو سئلین گله‌جاغینی قاباقجادان خبر وئرمیشدی آما یاغیش تأثیرینده تبریز شهرینده و شرقی آذربایجانین مختلف منطقه‌لرینده سئل چوخلو خسارتلره و تلفاتا سبب اولدو.
تبریز شهرینده عباسی خیابانی‌نین آخرینده 5 ائو سئل اثرینده تخریب اولدو آما خوشبختلیغینان ائولرین تئز بوشالماسی نتیجه‌سینده بو بئش ائوده جانی تلفات اولمادی.
آما آیری منطقه‌لرین وضعی داها پیس اولدو. گلن سئلین تأثیرینده اکین ساحه‌لرینه و مال داوارا چوخلو خسارت دَیدی. صوفی چای، موغانجیق و سهندین جنوبونداکی اوچ چایین طغیانی نتیجه‌سینده کؤرپولر تخریب اولوب منطقه‌نین یولو باغلاندی.
آذر شهر، اوسکو، هشتری، عجب شیرده ده اوخشار حادثه‌لر باش وئریب.
بوتون اکیپلر آختاریش و نجات عملیاتینا مشغولدولار و ایکی هلیکوپتر و نئچه دیری تاپان ایت بو عملیاتدا استفاده اولونور و بو عملیاتین ایتنلرین آخر نفرین تاپانا قدر ادامه‌سی اولاجاق.
بو فاجعه‌یه گؤره یکشنبه گونو فروردین آیین 27-سی شرقی آذربایجاندا عمومی عزا اولوندو.