بعضیلر هوشلو انسانلار مشکل‌سوز انسانلار تصور ائله‌ییرلر کی هر هانسی مشکلو چوخ راحات حل ائله‌یه بیلرلر. آما حقیقت بئله دئییل.
هوشلو انسانلار نه قدر ده هوشلو اولسالار نهایتده انساندیلار. حتی اولا بیلر اونلارین مشکل‌لری آیریلارینا گؤره داها چوخ اولسون. سیزین اوچون هوشلولره مخصوص نئچه مشکلو بوردا گتیرمیشوق. بو مشکل‌لر سیزده ده اولسا بیلین کی هوشوز اوبیریلره گؤره یوخاریدیر.
1. معمولی دانیشیقلار حوصله‌زی آپاریر
کئف احوال ائله‌ماق و گونده‌لیق سؤزلری دانیشماق سیزه داریخدیرا بیلر. آخی سیزین ذهنیز داها بؤیوک ایده‌لرینن دولودور. سیز واختیزین تلف اولدوغونو دوشونورسوز و اؤزوزو فایداسیز دانیشیقلارین ایچینده بوغولان بیر شخص کیمی گؤرورسوز. سیز اؤزوزه بیر هم فکر و یولداش آختاریرسیز آما اونو چوخ آز زمانلار اله گتیره بیلیرسیز.
2. دانیشماقدان چوخ، دوشونورسوز
سیزین بئینیز ائله قورولوب کی بیر مسأله‌نین مختلف یول‌لارین یوخلاییر. بونا گؤره بیر مسأله‌ده نظریزی دئماغا معمولی انسانلاران داها چوخ زمانا احتیاجیز اولور.
چوخ احتمالا جوابیزین بیر او قدر ده دقیق اولمادیغینی دوشوندوغوز زمان اصلاً اونو مطرح ائله‌مه‌یه‌سیز. و ظاهرده سس‌سیز و دانیشمایان بیر شخص کیمی جلوه‌لنه‌سیز.
3. گونده‌لیق ایشلریز سیزه تکراری و یوروجو گلیر
سیزین بئینیز تازا و بوروشوق مسأله‌لرینن مشغول اولماق ایستیر آما گونده‌لیق گؤردوغوز ایش سیزه ساده گلیر و داریخدیریر.
4. بعضاً ایش گؤرماغا و عمل ائله‌ماغا انگیزه‌ز اولمور
چوخ ایشله‌ین و فعال انسانلارینان دولو بیر دونیادا کی ایشله‌ماق، ایده وئرماقدان داها مطلوب اولور، اولا بیلر ذهنیز او قدر بؤیوک ایده‌لرینن مشغول اولا کی عمل ائله‌ماق یادیزدان چیخا. متأسفانه بو مسأله‌نی چوخلاری تنبل‌لیق کیمی بیلیرلر و بو مسأله سیزی ناراحات ائلیر.
5. اجتماعی رابطه‌لرده ناشی ساییلیرسیز
انسانلارینان بحث ائله‌ین زمان مطمئن اولمادیغیز مطلبی دئمه‌سیز و بعضاً حق اولدوغوز موضعلری مطمئن اولمادیغیز اوچون شک اینن مطرح ائلرسیز و بو دا باعث اولار جماعت سیزی اجتماعی رابطه‌لرده ضعیف بیر شخص گؤرسونلر.
6. چوخ چتین عاشق اولارسیز
سیز عشق سفریز معمولی جماعتدن بیر آز چتین اولور. سیز داها آرتیق محافظه‌کار و داها آرتیق تحلیل ائله‌ینسیز. بونا گؤره جماعت سیزی سویوق و خودبین حسابلار. بونلاردان علاوه سیزده اضطرار حسّین آز اولماسی، تصمیملریزین سرعتینی آزالدار و نتیجه‌ده عشق آلوولانمامیش ساکتلر.
بونلارینان بئله جماعتین سیزی داها یاخشی باشا دوشه بیلمه‌سی اوچون اونلارا آرتیق توضیح وئرمه‌لیسیز. بئله‌لیغینان ایده‌لریزی مطرح ائله‌ییب عمله یاخینلاتماق اوچون داها آرتیق امکانیز اولار.