تازا ایلین گلمه‌سی اینن اونا برنامه تؤکماق بیزیم لاپ مهم دغدغه‌لریمیزدن ساییلیر. ایلین اوّلینده تازا ایل اوچون برنامه تؤکوروق آما بیر واخت باشیمیز آییلیر گؤروروق ایل یاری‌یا چاتیب آما بیز برنامه‌میزی قاباغا آپارا بیلمه‌میشوق و کئچن ایل اینن ائله‌ده فرق ائله‌مه‌میشوق.
بو برنامه‌سیزلیغین و یا داها دوغروسو برنامه‌نی یئرینه قویا بیلمه‌ماغین سببی گؤره‌سن نه اولا بیلر؟
1. برنامه تؤکماغینان مشکلوموز وار
چوخوموز برنامه‌لی اولماغی مکانیکی یاشاماغینان عینی بیلیروق. برنامه‌سیزلیغین ضررلی اولدوغونو بیلدیغیمیز حالدا، برنامه‌لی اولماغی زندگانلیغا سویوق روح قاتدیغینا اینانیریق. بئله‌لیغینان قورخوروق یاشاماق لذّتی الیمیزدن گئتسین. نتیجه‌ده برنامه تؤکماغی فایالی اولماسیندان آرتیق استرس یارادان کمی یتانیریق.
2. اهما‌ل‌کاریق
برنامه تؤکماغین اهمال کارلیغی آرادان آپارا بیله‌جاغینی دوشونوروق بیر حالداکی برنامه تؤکماق اهمال‌کارلیغی راحاتلادان و اونو توجیه ائله‌ین اولور.
3. کمال آخاتاران بیری‌یوق و برنامه و اجرادا واسواسییز وار
کمال آختارماق چوخلارمیزین مشکلی ساییلیر. چاتا بیلمه‌یه‌جاغیمیز هدفلر سئچیریق. کیچیک هدفلری اؤز شأنیمیزدن آشاغی بیلدیغیمیز اوچون عالی و یوخاری هدفلر و برنامه‌لر تؤکماغینان عملده امکانسیز بیر ایشه تصمیم توتوروق. بئله‌لیغینان برنامه‌میز ده فایداسیز اولور، اجرامیز دا نتیجه وئرمیر.
4. برنامه‌لی اولماقدان پیس خاطره‌میز وار
برنامه تؤکماق بعضاً کنکور و یا درس اوخویان گونلری یادیمیزا سالدیغینا گؤره اونا پیس باخیریق. بو ذهنی زمینه‌لر انسانی برنامه شوقوندان آپارار.
برنامه تؤکماقداکی اشتباهلاریمیز
1. آز یاتیب چوخ ایشله‌ماق
آز یاتیب داها چوخ ایشله‌یه بیله‌جاغیمیز دوشونساق چوخ بؤیوک اشتباه ائله‌میشیق. برنامه تؤکماقدا الیمیزده اولان واختدان نئجه فایدالی استفاده ائله‌ماغی آراشدیرمالی‌ییق.
2. اوزون فهرستلرین یازیلماسی
برنامه یازاندا لازم دئییل بوتون کیچیک و بؤیوک ایشلری لیسته یازاق. زمان آپارمایان ایشلری لیسته یازماساق اونو قیسالتمیش و ذهنیمیز دورو ائله‌میش اولاریق. بئله‌لیغینان استرسدن‌ده اوزاق اولاریق.
3. برنامه‌یازماق اوچون نئچه فرقلی وسیله‌دن استفاده ائله‌ماق
بعضاً گؤرورسن کامپیوتر، موبایل و دفترچه کمی مختلف وسیله‌لردن برنامه یازماغا اقدام ائلیروق. بو ایش ذهنیمیز تشویش‌لندیرر.
4. نئچه ایشی عینی آندا برنامه‌لندیرماق
نئچه ایشه بیر یئرده برنامه یازماق و اونلاری عینی آندا اجرا ائله‌ماق انسانین ال آیاغینی بیر بیرنه دولاشدیرار و ایشلرین دایانماسینا سبب اولار.
5. بوتون آنلاری مدیریت ائله‌ماق
بوتون آنلارا و ساعتلره برنامه تؤکماق ایل آندا انسانا یاخجی حسّ وئرسه ده، گئتدیکجه انسانین ذهنین یورار و برنامه‌دن خارج اولماغا سببیّت یارادار.
6. آیریلارینا ایش تاپیشیرماماق
بیر ایشین تماماً دوز گؤرولمه‌سینی ایسته‌ینده اونون بوتون مرحله‌لرینی اؤزوموز یئرینه گتیرماغا چالیشاروق و هئچ ایشینی اؤزگه تاپیشیرماروق. بئله‌لیغینان الدن دوشروق و برنامه‌نین ادامه‌سینه توانیمیز قالماز.