تعطیل سفرینه گئتماق، ایش یورقونلوغونو چیخارتماغا و ذهنی دورولتماق اوچون لاپ یاخجی ایشلردن ساییلیر. تعطیلیز یاخجی و خوشلوغونان کئچسه گونده‌لیق زندگانلیغیزا داها آرتیق انرژی اینن باشلایا بیلرسیز.
مسافرت دسته جمعی اولاندا لذته و بهره‌سی داها دا آرتیق اولار. سیز عایله و یا دوستلاریزین کناریندا یاخجی و لذتلی زمان کئچیرده‌سیز. ائله بونا گؤره‌ده همسفرلریزین کی اولدوغو چوخ مهمّدیر.
سفرده سیزین یولداشیز «خوش سفر» بیری اولسا سیزین بو سفریز لذتلی و خوش خاطره‌لرینن همراه اولاجاق. آما همسفریز مناسب اولماسا سفر نه اینکی خوش اولماز بلکه انسانین بورنوندان گلر.
مسافرته چیخاندا دقّت ائله‌یین همسفریز آشاغیداکی نفرلردن اولماسین:
1. همیشه یونانا انسانلار
بئله انسانلار سؤز وئردیقلاری زمان گلمزلر و همیشه‌ده بو ایش اوچون مختلف بهانه‌لری اولار. اونلارینان سفره چیخساز واختیندا حاضر اولمازلار و برنامه‌نی بیر بیرینه وورارلار.
بئله انسانلارینان مسافرت مجبوریتینده اولساز گؤرماق ایسته‌دیغیز ایشلره اونلارین داها تئز حاضر اولماسینی ایسته‌یین.
2. چوخ دانیشان انسانلار
سکوت قیزیلدیر. آما بو سؤز چوخلاری اوچون آنلامسیزدیر. دوزدور مسافرتده دانیشماق لحظه‌لری لذتلی و خاطره‌لی ائلر، آما بعضاً انسان ساکت دایانیب گؤزل منظره‌لری سیر ائله‌ماق ایستر.
آما چوخ دانیشان انسانلار بو آنلامازلار و حتی سیزین مطالعه و یا استراحت زمانی ویرر - ویرر دانیشارلار.
3. اؤزونو بَیَنمیش انسانلار
اؤزونو بَیَنن انسانلار فقط اؤز ایستکلرینه دقت ائلرلر و سیزی اونلارا قازانان ایشلرین گؤرمه‌سینه مجبور ائلرلر.
مثلاً نه یئیه‌سیز، هارا گئده‌سیز و نه اویونلار اوینایاسیز و حتی هاردا استراحت ائله‌ماغیزی‌دا اونلار قرار وئرماق ایسترلر.
4. تنبل و حوصله‌سیز انسانلار
دوزدور تعطیلات استراحت و آرامش اوچوندور آما تنبل انسانلار هفته‌نین 7 گونونون 24 ساعتینی هئچ ایش گؤرمزلر.
اونلار مسافرتده ده گون اورتایاجان یاتارلار، ناهاردان سونرا یاتارلار البته چوخ شانسلی اولساز آخشام سیزینن بیر ایکی کلمه دانیشماغا غیرت گؤرسده بیلرلر.
بئله‌لیغینان سفریز خاطره‌سیز و تجربه‌سیز باشا چاتار.
5. حددن آرتیق حرکتلیدیلر
بو انسانلار تنبل‌لیغین ترسه‌سیدیلر. یعنی تنبل‌لر تفریط ائله‌سه‌لر بونلار دا افراط ائلرلر. اونلار سفریزین خوش آ«لارینی کورلایا بیلرلر. مثلاً سحر ساعت 4 قالخیب داغا گئتماق ایسته‌یه‌جاقلار.
دریانین لاپ پیس یئرینده اوزماق ایسته‌یه‌جاقلار و حتی سفر بویو خطرلی ایشلر گؤرماق ایسته‌یه‌جاقلار.
گؤزل و خاطره‌لی مسافرت آختارساز بئله انسانینان سفره چیخمایین.
6. اؤزلری اینن بوللو چمدان آپاران انسانلار
گؤرورسن بیر قفته‌لیق سفر اوچون اوچ عدد بؤیوک چمدان گؤتورورب. بوجور همسفر ال آیاغا دولاشار و حتی بعضاً اضافه هزینه‌لره سبب اولار.
بو گونکی گونده هارا گئده‌جاغیز و اورانین هاواسی‌نین نئجه اولاجاغی چوخ راحت بللی اولار و نیاز دئییل مبادا گون اوچون هر زاد گؤتوره‌سیز.
7. سِلفی دلیسی اولان انسانلار
مسافرته گئتماغی قالارگی خاطره‌لرین بیری‌ده عکس سالماقدیر. آما ائله زمانلار اولار کی انسان دوربینی کنارا آتیب طبیعتدن لذت آپارماق ایستر. بئله‌نچی آنلاردا سلفی دلیسی همسفریز اولسا، بو آنلاری سیزه زهر ائلر.
بئله‌نچی انسانلارینان همسفر اولماسیز داها لذتلی سفریز اولار.
8. حددن آرتیق مقیّد و منظم انسانلار
هر ایشی برنامه‌لی گؤرماق یاخجی اولار آما بعضاً تازا موضوعلار قاباغا گلر کی برنامه‌نی دَییشماغا ارزشی اولار. اوّلکی برنامه‌یه مقیّد همسفریز اولسا تازا و سورپریز لذتلری الیزدن آلار.
9. چوخ افاده‌لی انسانلار
هئچ هوتئلی بَیَنمزلر. هر رستورانا گئتسز اورانی کیفیر و مزخرف سایارلار و اؤزلرینی داها یوخاری یئره لایق گؤرلر.
بئله انسانلار اضافه هزینه‌لری تحمیل ائله‌‌یندن سونرا هله نهایتده ده ناراضی قالارلار.
10. دئیینگن و ناراضی انسانلار
بعضیلری هر زادی بهانه ائلرلر. مثلاً طیاره یاریم ساعت یوبانسا او قدر میزیلدانارلارکی آدامین سفرینه هئچ ائلرلر. بئله انسانلار همیشه بیر شئیدن سکایتچیدیلر و هئچ واخت راضی اولمازلار.
بئله انسانلاری همسفرکیمی سئچمه‌سز داها راحت سفریز اولار.