جام جم آنلاين: اؤلكه‌نين ثبت احوال سازيماني‌نين رييسي
دئدي: ميلّي هوشلي كارت ائلكترونيك دؤلته گيريش آچارادير كي ايندي پايلوت صورتده
گؤرولماقدادير.
ايسنانين گوزاريشينه گؤره دؤكتور محمد ناظمي اردكاني
كرمانشاهدا خبرنيگارلار جمعينده دئدي: ميلّي هوشلي كارتين صادير اولماق طرحي‌نين
موطاليعه ايشي 1389-نجو ايلدن باشلانيب و بو موطاليعه‌لردن 15 جيلد سند
حاضيرلانيب.
او دئدي: ميلّي هوشلي كارتين صادير اولماق طرحي ايندي قم
اوستانيندا پايلوت صورتينده ايجرا اولور. چون بو اوستاندا ائلكترونيك ايمكانلار
فراهمدير.
اردكاني آيدينلاتدي: اومودوم وار بو ايلين فجر دهه‌سينده بو
پايلوت طرحين ايجرايي نتيجه‌لري‌نين ياييلماسي و اونلارين موثبت اولماسي‌نن، گلن
ايلدن بو طرحين اؤلكه‌نين باشاباشيندا ايجرا اولماسينا شاهيد اولاق.
اؤلكه‌نين ثبت احوال سازيماني‌نين رييسي بونا ايشاره ائله‌ماغينان
كي توسعه‌نين بئشينجي قانونونا گؤره، ميلّي هوشلي كارتين صادير اولماق طرحي گرك
بئش ايله‌جن ايجرا اولا دئدي: بو اساسدا 1394-نجو ايلين آخيرينه‌جن هامي‌يا ميلّي
هوشلي كارت صادير اولاجاق.
او بو سوآلين جوابيندا كي ميلّي كارتلاري‌نين اعتيباري
قورتولانلار اونون دگيشمه‌سينه نه ائتمه‌ليديلر دئدي: چون قراردي ميلّي هوشلي
كارتلار صادير اولا، دؤلت هئيأتي اعتيبارلاري قورتولان كارتلاري 2 ايله‌جن تمديد ائديب
و بوتون ايداري و دؤلتي اورگانلارين وظيفه‌سي وار بو كارتلاري موعتبر بيلسينلر.
اردكاني بونو بيان ائله‌مگينن كي بو سازيمان كيمليك ايشلري
مرجعي‌دير دئدي: ميلّي هوشلي كارتين صادير ائله‌مگينن ائلكترونيك دؤلته طرف
گئديريك.
اؤلكه‌نين ثبت احوال سازيماني‌نين رييسي دئدي: بو كارتلارين
صادير اولماسي بو فورصتي يارالداجاق كي امن صورتده ديجيتال فضاسينا واريد اولاق.