جماعت ایندیکی اوشاقلاری و اونلارین نه‌لره قادر اولدوقلارینی گؤرنده بئله گومان ائلیرلر کی ایندیکی اوشاقلار قاباقکی
نسل‌لره گؤره
داها هوشلودولر. آما حقیقت بئله دئییل. بلکه اونلار چوخ یوخاری حجمده اطلاعات و بیلگی
معرضینده اولدوقلاری اوچون بئله گؤوروشورلر. مثلاً ایندیکی اوشاقلار گونده‌لیق دانیشیقلاریندا ائله سؤزلر و کلمه‌لردن استفاده ائلیرلر کی اونلارین یاشلاری اینن مناسب اولمور و اطرافداکیلاری
تعجبه واردار ائلیرلر. بیر حالداکی بو مسأله اونلارین مختلف سؤزلرین معرضینده
اولدوقلاری اوچوندور کی بعضاً یاشلارینا مناسب اولمور.
بعضی آتا آنالار دا اؤز عالملرینده بو یوخاری هوشدن داها آرتیق استفاده ائله‌ماق اوچون اوشاغی مختلف کلاسلارا قویوب اوشاغی فشار آلتیندا
قویورلار. بیر حالدا کی اوشاغین دوزگون تربیتی اصلا و ابدا اونا داها آرتیق
معلومات یوکله‌ماق
معناسیندا دئییل بلکه اونا الده اولان امکانلاردان لاپ دوزگون استفاده ائله‌ماق و لذت آپارماغی اؤرگتماقدیر.
اوشاقالاری مسئول و مدیر بارا گتیرماق لازمدیر یوخسا اونلاری قولچاق کیمی
مختلف کلاسلار و معلوماتینان بَزه‌ییب اؤزگه‌لر
یانیندا پوز وئرماق اونون گله‌جاغینی آرادان آپارماقدان ساوای هئچ نه دئییل.
اوشاغی مسئولیتلی بارا گتیرماق اوچون یاشینا مناسب اونا ایش تاپیشیرماق
لازمدیر. مثلاً اوچ یاشیندا اوشاق جورابلارین اؤزو گئیمه‌لی و یا پالتارلارینی اؤزو سئچمه‌لیدیر و یا دوستو اینن ساواشندا اؤزو اؤز حقّینی آلمالیدیر
و بؤیوکلری اؤزونه کؤمک چاغیرمامالیدیر.
اوچ یاشیندا اوشاغی رسمی کلاس قویماق دوز دئییل. حتی اوشاق اوچون (صفردن 11
یاشا قدر) رسمی فعالیت اصلاً مناسب دئییل و اونلارا آکادمیک مطلبلر ده غیر آکادمیک
فضادا انتقال وئریلمه‌لیدیر.
سالم انسان، روحی تعادله صاحب اولان و وارلیقلاریندان نهایت استفاده‌نی ائله‌یه بیلن انساندیر.
هئچ جامعه ترقی ائله‌یه بیلمز مگر اوشاقلاری‌نین تربیتی دوز اولا.