کتابا رغبت اولماسا کتابی چاپ ائله‌ماق و یا اونو موفته‌سینه پایلاماغین فایداسی اولمایاجاق. رغبت اولمایان یئرده موفته پایلاماق کتابی ارزشدن سالماق اولور.

بعضی ارگانلار و سازمانلار کتابی ناشردن آلیب نفرلرینه هدیه کیمی پایلاییرلار. بو جور ایشلر هزینه‌لری هدر وئرماقدان غیری ایش دئییل. جامعه‌نین انسانلاری اؤزلرینی علمی ترقّی‌یه محتاج بیلمه‌لیدیلر کی کتاب اوخوماغا رعبتلری اولسون و اونون نتیجه‌سینده دهفایدالی کتابلار یازیلیب ترجمه اولونسون.

جامعه‌میزده کتابا رغبتین اولماماسی‌نین اساس سببلریندن بونلاری سایماق اولار:

1- انسانلاریمیز جامعه‌ده یاشاماغا و موقعیت قازانماق اوچون علمی سطحلرینی چوخالتماغا احتیاج گؤرمورلر و بو سببدن کتابا طرف میل‌لری اولمور.

2- جامعه‌میزده شفاهی فرهنگ هله یئرینه کتبی فرهنگه وئرمه‌ییب. جماعتیمیز سواد اولمایان کئچمیشلره تای ائشیتماغا داها رغبتلیدیلر تا اوخوماغا. اونلار سخنرانلیغا قولاق آسماغی اوخوماقدان داها چوخ راحت بیلیرلر. هر شئیی شفاهی صورتده ائشیتماق ایستیرلر. مثلاً بیز دین فرهنگینی ترویج وئرماق اوچون کتابدان چوخ خطیبلره و دین متخصصلرینه میدان وئریروق.

3- انسانلاریمیزین ذهنی قدیمی و سنتی‌دیر. یعنی موجود مسأله‌لرین تکرارینی سئویر و بو تکراردان یورولمور. بیر حالداکی انسانین ذهنی مسأله‌لره تحلیلی و انتقادی باخمالیدیر و تکراری بَیَنمه‌مه‌لیدیر.

4- اجتماعی علملر بیر جامعه‌ده بومی اولماییب و اونلارین درکی جماعتیمیزه چتین اولور. اجتماعی علملر آیری یئرده تولید اولور، رشد ائلیر و بیزیم جامعه‌ده ساده‌جه مصرف اولور و اونون تشکیل تاپماسیندا نقشیمیز اولمور. بونا گؤره بو علملر انسانلاریمیزا غیربه گلیر.

5- مخصوصاً کتاب صحنه‌سینده تک تریبونلوق کاملاً گؤزه گلیر. جامعه‌ده نظریه وئرماغا و بحثه میدان آچیلمالیدیر. البته بو تک تریبونلوغو اساس عاملی کتاب یازانلاریمیزدیر کی تازا سؤز دئماقدان عاجزدیلرو  قاباقکیلاری سؤزلرینی چئینه‌ماقدان ساوایی ایش باشارمیرلار.

6- سیاسته بولانماق: جامعه‌ده اولان گروهلارین سؤزلری منطقسیز و دلیلسیز ده اولسا طرفدارلارین خوشونا گلیر. فقط بونا خاطر کی مقابل طرفین سؤزلرینیه ضد اولور.

7- کتابا تماماً تجاری باخیلماق: کتابا جامعه‌میزده اولان باخیش تماماً اقتصادیدیر. مثلاً مؤلف‌لره کتاب بُنی تعلق تاپاندا اونلاردان گئدیب تهران نمایشگاهیندان آلماغا ایسته‌‌نیلیر یوخسا اونلارا بُن وئریلمیر. بو برنامه‌نین قصدی بودور کی کتاب نمایشگاهی‌نین اقتصادی آماری یوخاری اولسون و آیری هدف نظرده توتولماییب.