تبریز شهرداری امامزاده سید جمالین تبریزین گؤزل مکانلاریندان بیرنه چئوریلمه‌سیندن خبر وئردی. فارسین تبریز شهرداریسی‌نین عمومی رابطه‌لریندن وئردیغی خبره گؤره، صادق نجفی تبریزین راستا کوچه محله‌سینده امامزاده ابوالحسن موسی الجمالین احیا و توسعه پروژه‌سیندن گؤروشده دئدی: دین بؤیوکلری و مجتهدلرین تأییدینه گؤره بو کرامتلی امامزاده‌نین نسبتی دؤرد نسل اینن امام موسی بن جعفره (ع) یئتیشیر. ائله بو سابقه، بو مکانین تبریزین تاریخی، مذهبی و گزمه‌لی یئرلریندن بیرینه چئوریلمه‌سینی واجب ائلیر.

تبریز سهرداری آرتیردی: بو مکانا کئچمیشده لازمی قدر دقّت اولونماییب آما ایندی شهرداری و شهر شوراسی‌نین تعاملی اینن اونون احیا و توسعه‌سی سرعت اینن قاباغا گئدیر.

نجفی آرتیردی: تقریباً سککیز آی بوندا قاباق بو مکاندان گؤروش ضمنینده بو امامزاده‌نین احیاسینا تصمیم توتولدو و نظره گلیر یاخین گله‌جاقدا بورا تبریزین گؤزل یئرلریندن بیرینه چئوریله.

او، ایندیکی نسلین تبریزین کئچمیش افتخارلاری‌ اینن تانیش اولماسی‌نین ضرورتینه تأکید ائله‌ماغینان دئدی: بیزیم بو طرحلرین اجراسیندان اساس هدفیمیز ایندیکی نسلی اسلامین افتخارلی تاریخی اینن تانیش ائله‌ماقدیر. چونکی همیشه کئچمیش گله‌جاغین چیراغی اولوب و کئچمیشی تانیماق قاباغا گئتماغا انگیزه یارادار.

نجفی هابئه تبریز بازار مجدوده‌سینده اجرا حالیندا اولان پروژه‌لره اشاره ائدیب دئدی: صادقیه‌نین احیاسی، راستا کوچه‌نین فلسطین خیابانینا متصل اولماسی طرحلری‌ده اجرا حالیندادیر کی بو گؤزل‌لندیرمه طرحلری اینن تبریزین تاریخی بازار منطقه‌سینی اؤزونه یاراشان رونقینه قئییتمه‌سینه اومودوموز وار.

امامزاده موسی‌الجمال، امام موسی کاظمین (ع) نوه‌لریندندیر کی نسبی دؤرد نسل اینن او حضرته یئتیشیر.

بو امامزاده ابن‌اعرابی و صاحب طوق و صاحب حاجات آدینا دا تانینیر.