زاویه، جولفانین کَمکی داغی‌نین اتکلرینده یئرلشن مشهور و گؤزل مرزی کنددیر. بوتون گؤرنلری حیران قویان قدیم شکلده تاریخی کند.
بو توریستی و تاریخی کند جولفانین مرکزی بخشی‌نین تابعلریندندیر و موناسیب یولو وار. بو کند، آب و هاوا، باغلاری‌نین گئنیشلیغی و پیلّه‌کانلی ائولرینن مخصوص آللاه وئرگی و طبیعی گؤزللیغی وار. آما موتأسیفانه آز آداملار بورانی توریستی مقصد کیمی سئچیرلر.
زاویه کندی شرقی آذربایجانین تاریخی و مذهبی کندلریندن اولوب هادیشهردن یئددی و جولفادان اوچ کیلومتر فاصیله‌سی وار.
بو کندده ایمام موس کاظمین (ع) نوه‌لریندن اولان ایمامزاده سید اسماعیلین مزاری یئرلشیب.
ایمامزادانین حیاطیندا میلّی اثرلر سیراسیندا ثبت اولموش ایکی عدد مین ایللیق چینار آغاجی وار. بو آغاجلار ایمامزادانین جنوب ضیلعینده و بیر-بیریندن دؤرد متر فاصیله‌لری وار. آغاجلارین دؤره‌سی اوچ متر یاریم و اوجالیغی 15 متره چاتار کی اونلارین باشلاری بیر-بیرینه توخونوب.
کندلیلرین دئدیگینه گؤره اوّللر بو آغاجلارین دیبیندن سو جاری اولوردو آما نئچه ایل بوندان اوّل بو آغاجلاری سووارماغا یئر آلتی سیستمی قوشولوب.
زاویه‌نین گئنیش باغلاری، پیله‌کانلی ائولری، ثمره‌لی گیرده‌کان، گیله‌نار، اریک و گیلاس آغاجلارینا گؤره خانیواده‌اینن خوش گونلر کئچیرماغا لاپ گؤزل یئر حسابا گلیر.
ایمامزادا سید اسماعیل(ع) کندین ائولرینه باخان بیر تپه‌نین اوستونده یئرلشیب. بوقعه‌نین قدیمی بیناسی 4*4 متردیر و گونبذی اونون ائنلی دیوارلاری اوستونده قویولوب. ایمامزادانین موطهّر مزاری اوستونده موشبّک تاختادان ضریح قویولوب کی 120 ایل بوندان اوّل نخجیوانلی بیر مهارتلی نجارین الینن دوزلیب.
ضریحین کناریندا عوثمانلی قوشونونا موتعلیق اولان باشچی‌نین قبری وار کی صفوی دؤرونده اؤلدورولوب. بوقعه‌نین داخیلی ساده گچکارلیقلارینان بزه‌نیب.
بوقعه‌نین گیریشی شیمال طرفدندیر. زاییرلرین ریفاهینا گؤره حیاطین جنوبی ضیلعینده بیر نئچه اوتاق وار و غربی ضیلعده ده 200 مترلیق بیر مسجید وار.