شرقی آذربایجانین فرهنگی
میراث, ال ایشلری و توریزم ایداره‌سی‌نین رئیسی بونو دئماغینان کی چالیشیروق
کندیوان کندی 2014-جن جهانی ثبت اولسون, دئدی: فرهنگی میراث, ال ایشلری و توریزم
سازمانی گرک بو کندین ثبتی اوچون آیری کندلردن اوّل ایقدام ائلیه‌ایدی.
تراب محمدی بونا ایشاره ائله‌ماغینان
کی کندیوان هوتئلی دونیانین تایسیز مجموعه‌لریندن ساییلیر, آرتیردی: بو هوتئلین
بیرینجی فازی شرقی آسیا و اوروپا تورلارینا -کی معمولاً 25-30 نفردیرلر- جواب وئره
بیلمیردی کی اومودوموز وار ایکینجی فازین ایشه باشلاماسی‌اینن بو موشکول حل اولسون.
او کندیوان هوتئلی‌نین ایکینجی فازی‌نین ایفتیتاح مراسیمینده بونو دئماغینان کی
شرقی آذربایجانین تاریخی و توریستی پوتانسیئلی یوخاریدیر, مهر خبرنیگارینا دئدی: بو
اوستاندا ال ایشلری و توریستی شاخیصلرین هامیسی وار و بو اوستاندا ایکی جهانی ثبت
اولموش اثر وار. تبریز بازاری دونیانین لاپ بؤیوک کرپیجدن دوزلمیش و سقفلی بازاری و
آیری تاریخی مجموعه‌لر کی بو اوستانین توریستی شاخیصلریندن ساییلیرلار.
شرقی آذربایجانین فرهنگی
میراث, ال ایشلری و توریزم ایداره‌سی‌نین رئیسی بونا ایشاره ائله‌ماغینان کی
کندیوان کندی دونیادا اوچ داشدان یونولموش کندلرین بیریدیر, دئدی: بو کندلرین بیری
شیمالی آمریکادا, او بیری ترکیه‌ده و اوچونجوسو ده کندیوان کندی‌دیر کی فقط بو
کندده عادی یاشاییش جاریدیر و 195 خانیواده‌دن چوخ بو داشلارین آراسیندا
یاشاییرلار.
او کندیوان هوتئلین ایکینجی فازی‌نین
ایفتیتاحینا ایشاره ائدیب دئدی: کندیوان هوتئلی دونیانی تایسیز مجموعه‌لریندندیر کی
اوّلجن قراریدی موزه اولسون آما فرهنگی میراث و توریزم سازمانی‌نین تصمیمینه گؤره
هوتئل اولدو و اونون بیرینجی فازی 1386-دا ایشه باشلادی. اؤلکه‌نین توریستی مشورت
شوراسی‌نین عضوی دئدی: خاریجی توریستلر سئویرلر کی شهرین های-کویوندن اوزاقدا,
تاریخی و کند ائولرینده قالسینلار. محمدی بونو دئماغینان کی بیز بو هوتئلی دوزلدنده
شایعه سالدیلار کی بیزیم قصدیمیز وار کندلیلری بوردان کؤچورداق, ایدامه وئردی: گلن
آیدان کندیوان یئرلری‌نین هامیسینا سند وئریله‌جاق و کندیوان اؤلکه‌نین بیرینجی
کندی اولاجاق کی رسمی سندی وار.
او آرتیردی: بو کندده صنعتی
فاضلاب سیستمی, سیم‌سیز اینترنت و برق وار آما تاریخی بینالاردان موغایات اولماق
اوچون اورا گاز چکماق اولماز کی البته تازا کندده بو مسأله نظرده آلینیب. او
ایدامه‌ده توریستلرین آرتیق جذبینه گؤره هوتئل‌لرین اوجوزلاشماسین ایسته‌دی. شرقی
آذربایجانین فرهنگی میراث, ال ایشلری و توریزم ایداره‌سی‌نین رئیسی آرتیردی:
کندیوانین داش هوتئلی‌نین ایکینجی فازیندا بیر میلیارد تومن خرجله‌نیب کی پیمانکارا
تاپیشیریلسایدی 10 میلیارد تومنینن‌ده قورتولمازدی.