سرسکند دیزه آبشاری
چوخدا اوجا اولمایان بو
آبشار, میشودا شبستره تابع اولان سرسکند دیزه کندی‌نین 2 کیلومترلیغیندا یئرله‌شیب.
بو آبشارین سویو میشو اوجالیقلاریندان گلیر و یاغیشلی فصل‌لرده سویو چوخ اولار.
اونون گؤزل منظره‌سی و اطرافدا کی گؤرمه‌لی یئرلری اوستانین طبیعی جاذیبه‌لریندن
ساییلیر.
خارابا دگیرمان
خارابا دگیرمان (آسیاب
خرابه) شرقی آذربایجانین گؤرمه‌لی یئرلریندن ساییلیر. بو آبشار, داغیلمیش بیر
دگیرمانین قالیقلاری‌نین اولدوغونا گؤره, خارابا دگیرمان آدینا معروف اولوب. بو
اورک آچان یئره چاتماق اوچون, مرند-جولفا جادّه‌سیندن علمدار گرگر شهرینه وارید
اولوب, ایران و آذرباجان جمهوریّتی مرزینده بیر خاکی جادّه‌دن کئچمکله بیر فرعی
یولونان صفالی بیر دره‌یه گئتمک اولار کی بو آبشارین قرار تاپان یئریدیر. تبریزدن
جولفا-علمدار جادّه‌سینه جن 106 کیلومتردیر و علمداردان خارابا دگیرمانا دا 27
کیلومتر خاکی یولدور.
بو منطقه‌ده بیر چشمه وار کی سویو
کَمکی داغیندان گلیر. چشمه‌نین قاینایان یئرینده انجیر آغاجلاری وار. سو, گؤزل بیر
آبشارا تبدیل اولاندان سونرا دره‌نین آشاغیسیندا کیچیک بیر چایا قاریشیر و دره‌نین
شیمالینا طرفه گئدیر. دره آشاغیسی‌نین ساغ طرفینده چوخلی آبشارلار یارانیب.
دیوارلارین هامیسینی خزه اؤرتوب. یوزلرجه کیچیک و بؤیوک آبشارین شیریلتیسی, گؤزل
منظره و سرین هاوا, اورانین اورگه یاتان جاذیبه‌لریندن ساییلیر.
خارابا دگیرمان آبشاری‌نین
اوجالیغی 10 متردیر و اطرافی‌نین مساحتی تقریباً 200 متردیر.
عیش‌آباد آبشاری
بو آبشارین اوجالیغی 15
متردیر و مرندین مرکزی بخشینده میشو داغلاریندا عیش آباد کندی‌نین کناریندا
یئرله‌شیب. اورا گئدن یولون بیر قیسمتی ماشین یولو و بقیه‌سی داغ یولودور. 300 متر
موربع وسعتی وار و داغ و دره یانیندا گؤزل طبیعی منظره یارالدیب.