لیتوانی اؤلکه‌سی‌نین تیجاری تحقیقاتی تیمی شرقی آذربایجانا
سفر ائله‌ماغینان ایپک یولو و کهریبا یولونون فرهنگی موبادیله‌لری‌نین تازادان
رونق‌لشمه‌سینه اومودوارلیرق اعلام ائله‌دیر.
فارسین تبریزدن وئردیغی
گوزاریشه گؤره, کهریبا یولونون بامتیک شیرکتی‌نین خدمات بؤلومونون رئیسی شرقی
آذربایجانین ال ایشلری, فرهنگی میراث و توریسم سازمانی‌نین رئیسی‌اینن گؤروشده
دئدی: کهریبا و ایپک یولونون اصلی شهرلرندن اولان تبریزین, بو تحقیقاتی سفرده
بیزیم اوچون یوخاری اهمیتی وار.
روکاس والونگویشس بو
گروه و شیرکتین تحقیقاتی سفرلردن نظرده آلدیغی هدفینه ایشاره ائدیب دئدی: بیزیم
اجدادیمیز یوزلر ایل بوندان قاباق لیتوانیدا کهریبا داشی تیجارتی ائلیردیلر و بیز
ایللر سونرا بو تیجارتی ایپک یولو و کهریبا یولوندان تازادان باشلامیشوق.
او کهریبا یولونون
تحقیقاتی گروهونون تبریزه گلماقلارینی لیتوانی ایله شرقی آذربایجان آراسیندا
بیرینجی رابیطه یارانماسی بیلیب آرتیردی: بو سفر فقط تانیشلیق سفری ایدی و تبریزین
موختلیف فرهنگی و تیجاری زمینه‌لردن پوتانسیئل‌لرین نظرده آلماقلا بو رابیطه داها
دا گئنیشله‌نه‌جاق.
والونگویشس هابئله بونو دئماغینان کی گروهون اعضاسی ایراندا
و مخصوصاً تبریزده یاخجی صورتده امنیت احساسلاری واریدی, دئدی: سیزین اؤلکه‌نین
جماعتی مهریبان, چوخ یاخجی و فرهنگلی جماعتدی و بیزه چوخ جالیب ایدی کی هر کیمدن
سوروشودوق لیتوانی هاردادی, بیلیردیلر کی هاردادیر.
بو تحقیقاتی گروهون رئیسی دئدی: بو اوستانا اولان گله‌جاق
سفرلریمیزده تبریزدن علاوه آیری شهرلر و منطقه‌لره‌ده گئده‌جاییق.
کهریبا یولونون تحقیقاتی تیجاری گروهو آذربایجان موزه‌سی,
مشروطه موزه‌سی, جومعه مسجیدی و تبریزین بؤیوک تاریخی بازاریندان گؤروش ائله‌دیلر.