تبريز شهرداريسينين اينترنتي
تيلويزيونون موديري:
تبريزلي‌لرين فيلملري بو شهرين اينترنتي
تيلويزيونوندان ياييلاجاق.
تبريز شهرداريسينين اينترنتي
تيلويزيونون موديري، تبريز جماعتيندن ايسته‌دي؛ تبريز و اونون جاذيبه‌لرينه باغلي
اؤز گؤرمه‌لي و جاليب فيليم و عكسلريني نوماييش اوچون شهرداري‌نين اينترنتي
تيلويزيونونا گؤندرسينلر.
فارس خبرگوزاريسي‌نين تبريز شهرداري
عومومي رابيطه‌لريندن نقل ائدن گوزاريشه گؤره، میر اعتماد عمادی دئدي: تبريز
شهرداريسينين اينترنتي تيلويزيونو، تبريز شهري و اونون قوجا تاريخ و فرهنگيني و
بو شهرين فرهنگي-هونري جاذيبه‌لرين تانيتديرماق و تبريز شهري‌نين موديريتي
گوجلريني تانيتديرماغا موناسيب فضا ياراتماق اوچون يولا ساليندي و اونون ايشه
باشلاماسيندان آز زمان كئچسه‌ده، اؤلكه‌نين ايچي و ائشيگينده گؤزه گليم
ايستيقبالينان اوز‌به‌اوز اولوب.
او سؤزلري‌نين آيري بؤلومونده، اينترنتي
تيلويزيوندا نوماييش وئرمك اوچون اؤرگتمه‌لي، فرهنگي و تاريخي فيلملر و برنامه‌لرين
طراحليق و دوزلتمه‌سينه خاطير، تبريز شهرداريسينين كلان برنامه‌سينه ايشاره
ائديب، دئدي: بو چاليشمالارين كناريندا بو تيلويزيونون موديريّتي آماده‌دير
جماعتين و رسانه و فيلم زمينه‌سينده چاليشانلارين، تازا و قديمي فيلم و عكسلريني
آليب مخصوص بؤلومده عوموم اوچون نوماييشه قويسون. شهرداري‌نين بين‌الميلل عومومي
رابطه‌لرين موديري ايدامه‌ده، بو شبكه‌نين تقويت اولوب تبريز و اؤلكه‌نين لاب چوخ
موخاطبي اولان شبكه‌يه چئوريلمه‌سي يولدا، تبريزين شهري موديريتي‌نين
چاليشماسيندان خبر وئردي و آرتيردي: آذربايجان و تبريز تاريخ و فرهنگي‌نين
تانينماسينا جامع و موختليف برنامه‌لرين دوزلديب يايماسي، اوستانين آداب و سونتّي
رسملري، تبريزين تاريخي-فرهنگي و توريستي جاذيبه‌لري، تازا و گونده‌ليق ايطيلاعاتي
ايرائه وئرمك، تبريز شهري و اوستاندان گونده‌ليق خبرلر و گوزاريشلر، اؤرگه‌دن،
فرهنگي و تاريخي فيلملر، تبريز شهرداريسي و اونا تابع اولان منطقه و سازمانلار،
شهرده ياشاماق آدابي باره‌ده قيسا اؤرگه‌دن فيليملر و اونلارجا آيري ايمكانلار بو
اينترنتي شبكه‌نين ايشلريندندير.
تبريز شهرداريسينين اينترنتي
تيلويزيونون موديري آرتيردي: تبريز شهرداريسينين اينترنتي تيلويزيونو Tvtabriz.ir آدي‌اينن مجازي فضادا يولا سالينيب و
عزيز جماعتيميز ائليه بيلرلر اؤز عكس و فيليملرين بو آدرسينن هامي‌نين گؤرمه‌سي
اوچون يوللاسينلار.