ايسلامي تبليغات سازماني‌‌نين رييسي اؤلكه مداحلارين اوچونجو فصلي ييغينجاغيندا، ويلايت هفته‌سي و غدير خم بايراميني عزيز سايماغينان دئدي: مداحلارين ايشي ديني تشكيلات و مذهبي سيره‌لرده ويلايتمدارليغين پرچميني قووزاماقدير.

ايسلامي تبليغات سازمانين عمومي رابيطه‌لرين گوزاريشينه گؤره، حجت‌الاسلام والمسلمين سيد مهدي خاموشي تأكيد ائله‌دي: اگر ايسلام تاريخينده ايجازه وئره‌ايديلر ايماملار (ع) حكومت ائله‌سينلر اينسانليق جاميعه‌سي آيري بير وجه تجروبه ائدرديلر. آما دونياپرستلر ايجازه وئرمه‌ديلر بو ايش اولسون و ايماملاري بير-بير شهيد ائله‌ديلر و قويماديلار آللاه طرفيندن وئريلميش مسئوليتي يئرينه يئتيرسينلر. هرچند باطيني ويلايتلري واريدي آما ظاهيرده قويماديلار.

او بونو دئماغينان كي اينقيلابين دؤردونجو اون ايلليغيندا دگرلي تجروبه‌ميز وار آرتيردي: ايرانين ايسلامي حكومت مودلي بوگونكي دونيادا مطرحدير؛ بير زمان دونيادا ايسلامي اينسان ستيزليغا موتهم ائديرديلر، سونرا تركيبي نقشه‌لرينن مئيدانا گلديلر، نقشه‌لرين بيري بو ايدي كي ايسلامين ويجهه‌سين پيس گؤرستسينلر و اونون آدي «طالبانيزم» اينن تابلو اولدو و هر جورلوغونان اولموش اولسا چاليشديلار ايسلامين يولون باغلاسينلار.

حجت الاسلام خاموشي عربي اؤلكه‌لرده ايسلامي اينقيلابين دوشونجه‌سي ايشاعه‌سي‌نين قاباغين آلماقدا، انگليس و آمريكانين چاليشماسينا ايشاره ائديب دئدي: ايسلامي اينقيلابينان اون ايل جيدّي صورتده موقابيله اولدو و دونيانين هاميسي بير ايش گؤرنمه‌ييب و دالي اوتوردو. سونرا تصميم توتدولار ايچريدن ايستحاله ائله‌سينلر. فرهنگي تهاجوم موريدينده آقانين اوّل سؤزو 70-جي اون ايلليغين اوّل‌لرينده‌ايدي.

او دوشمنلرين، ايسلامي اينقيلابين جانماياسيني آرادان آپارماغا چاليشماقلارينا ايشاره ائديب دئدي: دوشمن چاليشدي ايسلامي اينقيلاب ساختماني‌نين دايانديغي دوزليشي تخريب ائله‌سين كي اونون بير طرفي سياسي دوزليشدير كي ايسلامي اينقيلابين فرهنگيندن آلينيب. سولطه نيظامي ايكينجي اون‌ايلليقدان بيزينن يوموشاق جنگه باشلادي. بو معنادا كي اينقيلاب ساختيمانين كؤكدن ييخسين و اونون ايچين كي فرهنگدير بوشالتسين.

ايسلامي تبليغات سازمانين رييسي ايسلامي نيظامدا ويلايت فقيهين يئرينه تأكيد ائديب دئدي: رييس جمهور گرك بيله كي ايختياراتي‌نين مشروعيتي ولي فقيهين ايذني‌اينندير و بو بيزيم مبناميزدير حتّي مجليس نوماينده‌لري گرك ديقّت ائده‌لر كي شرعي نيظامدا ويلايت فقيهين نه معناسي وار.

خاموشي غربين تحريكاتينا ايشاره ائديب دئدي: اونلار ياواش ياواش تركيه‌ني ايرانين رقيبي ائله‌ديلر. من اردوغانين حماسي دانيشيقلارين ائشيتميشم آما اوندا كي مصر و تونس اؤلكه‌لرينه پيام وئردي كي سيزين گرك حكومتيز ديندن آيري اولا آيدينلاشدي كي بو ايسلامي اينقيلابا ايكينجي نوسخه‌دير. يعني غرب بير طالبانيزم و بير اردوغانيزم دوزلديب.

ايسلامي تبليغات سازماني‌ رييسي تأكيد ائله‌دي: بيز آزادليق و بنده‌ليغي حقين موديريّتي آلتيندا ايستيريك و اعتيقاديميز وار كي اگر ريفاه او قدر ياييلا كي بيز موديريتسيز بو ريفاها نظر وئرميش اولاق بو ريفاه طوغيانا مونجر اولار. بيزيم اعتيقاديمزا گرك طيبه حيات اله گله كي اونون ايلزاماتي و تعريفي وار و اعتيقاديميز يوخدور كي دونيا هر قيمته ياخجيدير و ايندي گلك بيز مسجيد دوزلدك. ايسلام تاريخي آيديندير كي بني اميه و بني عباس چوخ مسجيد دوزلتديلر آما ويلاتسيز مسجيد نه‌يه لازيم؟

او آرتيردي: خوشبختانه اينقيلابين فرهنگي پيامي منطقه اؤلكه‌لرينه او قدر درين يئتيشيب كي اونلار هاميسي شريعتلي حكومت ايستيرلر و اوندان سونرا اردوغان بير عجيب سياسي سوسوماغا دوچار اولوب.

او ايسلامي اينقيلابين يوخاري هدفلرينه چاتماقدا رهبرين سؤزلريندن تبعيت ائله‌ماغا تأكيد ائديب و دئدي: موعظم رهبري مقام بو ايللرين بويوندا تهاجوم موريدينده دال‌به‌دال موختليف تعبيرلر ايشلتديلر و اخيراً «اينقيلابين فرهنگي جيبهه»سين دوشمن جيبهه‌سي موقابيلينده مطرح ائله‌ديلر، اونلار تأكيد ائله‌ديلر كي سولطه نيظامين بو زمينه‌ده بير فرماندهي وار كي گرك آييق اولاق. يوزدن چوخ فارس ديلينده كانال ايسلامي اينقيلابين علئهينه فعاليت ائديرلر كي بير-بيرلرينن آل-وئرلري وار.