سازمانلار و تشکیلاتلارین رئیسلری‌ده آیریلارینا تای استرس معرضینده اولورلار. استرس اؤز اؤزلوغوندا پیس دئییل. استرس سیزی متمرکز ائلر، سیزده رقابت حسّینی یارادار و عکس‌العمله مجبور ائلر.
مشتری‌لریزینن بؤیوک جلسه‌ز اولسا و یا بؤیوک سخنرالیغیز اولسا و عین حالدا سیزین استرسیز اولمازسا، ایشیزین نتیجه‌سی ائله‌ده یاخشی اولمایاجاق.
آما استرسی کنترل ائله‌یه بیلمه‌سز ضررلی‌ده اولا بیلر. استرسی دوزگون مهار ائتمک اوچون بو ایشلری گؤرون:
1. چشم اندازین اولماسی: استرسین مدیریتی چتینلیقلاری چشم اندازا سالماغینان باشلانار. بیلمه‌لیسیز کی چوخلاری دها چتین شرایطده اولوبلار آما مشکل‌لری رفع ائله‌یه بیلیبلر. بو ماجرالاری بیلماق سیزه چتینلیقلاردان قورخماماغا کؤمک ائلر.
2. بدنین فیزیکی حاضرلیغی: ازون مدّت استرس قاباغیندا دوام گتیرماق ایسته‌سز، ورزش ائله‌ماق سیزه واجبدیر. تجربه‌لر منظم ورزش ائله‌ین مدیرلرین داها یوخاری مرتبه‌لره چاتماسینی گؤرسدیر. ورزش استرسین قاباغیندا گوجلو ابزار ساییلیر. ورزش سیزه عاطفه‌لریزی کنترل ائله‌ماغا کؤمک ائلر. سیزی آراملادار و انرژیزی آرتیرار. ایشیز چوخ بئله اولسا، وسطده ورزشی یاددان چیخارتمایین.
3. رّک و صادق اولون: چوخ مسأله‌نی ایچیزده ساخلادیغیز زمان استرسیز داها چوخ اولور. مدیرلر معمولاً بحران زمانلاری بوتون اطلاعاتی اؤزلرینده ساخلامالی و بوتون تماسلاری اؤزلری قورمالی اولدوقلارینی دوشونرلر. آما ضررسیز یئرلرده دوز و صادق اولماق ایشی راحتلادار. شفافیت ظاهرده سیزه صدمه یئتیرنم اولا بیلر آما کلیّتده سیزه قازاناندیر. نییه‌کی مخاطبلریز سیزی صادق انسان گؤرلر و سیزدن اطاعت ائلرلر. هر نه قدر اؤزوزو بوشالتساز او قدر ده راحت اولارسیز. بحران شرایطینده همکارلاریزین وضعیتدن خبرلری داها آرتیق اولدوقجا سیزین خیالیز داها راحتلشر و آراملاشاسیز.
رُک و صادق اولماغا آیری بیر ایش‌ده ضروریدیر: انتقادلاردان و عکس‌العمل‌لردن استقبال ائله‌ماق. سیز اؤز گوج و ضعفلریزدن خبریز اولدوق قدر داها آز استرسیز اولاجاق.
اختیاریزدا داها چوخ فرصت و نظر اولدوقجا، سیزین گوجلو اولماق حسّیز آرتاجاق و نتیجه‌ده استرسیز آز اولاجاق.
4. منظم ائله‌ماق: استرسی آزالتماغین لاپ مهم یوللاریندان بیری‌ده یاشاییشیزا نظم وئرماقدیر. زندگانلیغیزین حرفه‌ای و شخصی برنامه‌لرینی اولویت اساسیندا دوزون. چوخوموزون زندگانلیغی برنامه‌سیز و نظمسیز اولوب. ذهنیمیزده چوخلو ایشلری لیست ائله‌میشوق و چوخ چالیشماغینان هامیسینی یئرینه گتیرماغا چالیشیروق. بو مودئل چوخ چتین نتیجه وئره. موفق مدیرلرین گؤرولمه‌لی ایشلرین برنامه‌سیندن علاوه، گؤرولمه‌مه‌لی ایشلرین لیستی‌ده اولور. بئله‌لیغینان یالانچی استرسدن اوزاق اولورلار.
5. تجدید قوا ائتمک: انسانین هر دن بیر استراحته احتیاجی وار. مدیر اولماق معمولاً اوزون ساعتلری ایش باشیندا کئچیرماغینان توأم اولور. آما اؤزوزه آرتیق فشار گتیرمه‌ماغا دقت یئتیرمه‌لیسیز. زمانینیز بیر قسمتینی عزیزلریز و خانواده‌زله بیرلیکده اولماغا آییرین. کتاب اوخویون. قیس تعطیلاتا گئدین. سازمانیز سیزسیز داغیلمایاجاق قورخمایین.