شرقي آذربايجان
اوستانداري دئدي: تبريز – زنجان اوتوباني‌نين
آخيرنيجي قطعه‌سي‌نين دوزلمه مراحيلي‌نين تكميل‌لشمه‌سينن، ايجرايي ايشلري
آذر آيي‌نين 25-جن قورتولور.
فارس خبرگوزاريسي‌نين
شرقي آذربايجان اوستانداريسي عومومي روابيطيندن نقل ائله‌ديغي گوزاريشه گؤره، احمد
عليرضا‌بيگي بو اوتوبانين آخيرينجي قطعه‌سي‌نين دوزلمه مراحيلي و دوغلو شيبلي
تونللردن بازديد ده دئدي: بو پروژه 98 درصد پيشرفتينن ايجرا حاليندادير.
او بونو دئماغينان كي
بو قطعه‌نين دوزلمه‌سينه ايكي‌يوز ميليارد تومن هزينه اولوب، دئدي: بو قطعه‌نين
اوزونلوغو 16 كيلومتردير كي اونون بئش كيلومتريني دوغلو تونللر تشكيل وئرير.
بيگي آرتيردي: هر
تونلين دوزلتمه هزينه‌سي 50 ميليارد تومن اولوب و بوننان بئله كي اونون بؤيوكلوغو
تهرانين توحيد تونليندن چوخدي اوندان آز زماندا احداث اولوب.
او دئدي: پروژه‌نين
اصلي مرحله‌لري قورتولوب و 15 گونه‌جن تونلين چيراقلاري و بعضي مسيرلرين آسفالتي
كيمي بقيه موريدلر انجام تاپاجاق.
شرقي آذربايجان
اوستانداري دئدي: تبريز – زنجان اوتوبان پروژه‌سي، پروژه‌نين ايجرايي شراييطي و
يوخاري سورعتينه گؤره، اؤلكه‌ده تاسيزدير.
بيگي ايظهار ائله‌دي:
بونا توجّوه ائله‌ماغينان كي بو قطعه‌نين ايجرايي ايشلري دوققوزونجو و اونونجو
دولتده انجام تاپيب، بيزه چوخ ارزيشي وار كي اونون ايفتيتاحي دوكتور احمي‌نژادين
حوضورينن اولسون.
شرقي آذربايجان
اوستانداري بونا ايشاره ائله‌ماغينان كي دوكتور احمدي‌نژادين تبريزده حوضورونون
دقيق تاريخي بللي دئييل، دئدي: رئيس‌جومهور تبريز بازاري‌نين جهاني ثبت اولما
مراسيمينده حاضير اولماغا مئيليني ايبراز ائله‌ييب و بيز ده چاليشيروق پيامبر اعظم
اوتوبانين ايفتيتاح مراسيمنده حاضير اولسونلار.
تبريز – زنجان
اوتوبانينا كي «پيامبر اعظم» آدي قويولوب، تهران – قزوين – زنجان – تبريز –
بازرگان اوتوباني‌نين بير قيسمتي‌دير و هابئله ايپك يولونون بير قيسمتي‌دير كي
اونون احداث ايشلري 1375 دن باشلانيب.
بو اوتوبان 285
كيلومتر اوزونلوغوندا بيرينجي داغليق اوتوباني
و اؤلكه‌نين يول‌دوزلتمه طرحلري‌نين لاب بؤيوكلريندن بيريدير. شيبلي‌نين
دوغلو تونللري بو اوتوبانين آخيرينده و
تبريزين 25 كيلومترليغيندا احداث اولوب و هر بيري‌نين 5.2 كيلومتر اوزونلوغو و 11
متر اَني‌دير.
بو تونللرين
قورتولماسينن پيامبر اعظم اوتوباني كاميل بهره‌برداليغا چاتاجاق.