مناسب حیات یولداشی سئچماق، زندگانلیغی لاپ مهم انتخابیدیر و بو زمینه‌ده بالاجا اشتباه انسانی بیر عمر پشیمان ائله‌یه بیلر. جماعتین چوخو لاپ یاخجی تصمیم توتدوقلارینی دوشوندوقلاری زمان، لاپ بؤیوک اشتباهلارینی ائله‌دیقلاری زمان اولور. بونا گؤره حیات یولداشی سئچماق ایسته‌سز بو ایشی عقل اوزو اینن گؤرون و یولوزون اوستونده دوزولموش اشتباه قویولارینا دوشماقدان چکینین.

ائولنماق نیّتینده اولساز بو دوققوز مسأله‌ده توولانماماغا دقّتلی اولون:

بیرینجی قویو: گؤزللیق

هامیمیز گؤزللیغی سئویب اونا جبد اولاروق. آما حیات یولداشی سئچماقدا بو مسأله‌نین حددن آرتیق نقشی اولسا ایشی اوتوزموشوق. یاخجی اولار ائولنماقدان اوّل سیزه نه‌لرین اولویّتده اولدوغونو بللی ائله‌یه‌سیز. هرچند گؤزللیغین سیزه اهمیتی وار آما نه‌لری گؤزللیقدان داها آرتیق اهمیتی وار؟ هانسی معیارلاری گؤزللیغا قربان وئره بیلرسیز و گؤزللیغی هانسی معیارلارا قربان وئرماغا حاضرسیز؟ بو انسان بو قدر گؤزل اولماسایدی یئنه‌ده اونونلا ائولنماغا حاضریدیز؟

ایکینجی قویو: اجتماعی موقعیت

اجتماعی موقعیت، حیات یولداشی انتخابیندا چوخلو اشتباهلارا سبب اولان مسأله‌لردندیر. گؤزه گلیم موقعیتلر، انسانلارین او بیری خصلتلرینی گیزله‌ده بیلر. بونا گؤره بئله انسانلاری حیات یولداشی سئچماق ایسته‌ینده آرتیق دقّت ائله‌مه‌لیسیز. دقّت اولونماسا سیز او طرفین «موقعیتی» اینن ائولنیب آما سیزه مجهول اولان «اؤزو» اینن بیر دام آلتیندا یاشیاجاقسیز.

بونا گؤره بئله آدامینان ائولننده دوشونمه‌لیسیز کی او انسانین بو مقعیتی اولماسایدی یئنه‌ده اونونلا ائولنماغا حاضر اولاردیز؟

اوچونجو قویو: حددن اؤتیق سئوماق

ائولنماغا لازم اولان ملزمه‌لرین بیری‌ده سئوماقدیر، آما  کفایت ائله‌مز. ائولنماغین انگیزه‌سی فقط سئوماق اولسا اونون نفرت اوزو اینن داغیلماسینی گؤزله‌ماق اولار.

حیات یولداشی سئچماغین لاپ قورخولو حاللاریندان بیری سئودالی اولماقدیر. بو حالدا، سیز احساسات و عشقین تأثیری آلتیندا واقعیتلری گؤرماغا گوجوز چاتماز. عاشق فقط گؤزللیقلاری گؤرر. عاشق انسانا دئسن بیر آزدا عقل اوزو اینن باخ، اصلاً قبول ائلیه بیلمز. چونکی مغز بو احساسات ایچینده طبیعی ایشینی گؤره بیلمز.

بئلنچی موقعیتلرده یاخجی اولار رابطه‌دن فاصله آچیب سئوگی تبی‌نین آزالماسینی گؤزله‌یه‌سیز سونرا عقل اوزو اینن گله‌جاغیز اوچون تصمیم توتاسیز.

دؤردونجو قویو: تکلیق حسّی

سوبالیغین تکلیغی بعضاً دوزولمز اولور. ائولی یولداشلار بیر یئره ییغیشاندا اولا بیلر سیز سوبای اولدوغوز اوچون اونلارین جمعینه داخل اولا بیلمیه‌سیز. فامیللیقجن گزماغا گئدیرسیز، همی اؤز حیات یولداشی اینن بیردیر آما سیز تکسیز. همکارلاریزین هامیسی ایشدن ائوه قاییداندا اونلاری اهل عیالی گؤزلور آما سیزی در-دیوار. بو آندا خطر زنگی چالاغا باشلیر.

بو تکلیق حسّی سیزی هر نه تئزراق ائولنماغا سوق وئره بیلر. سیز بو حسّین ایچینده اولان زمان بیری راستیزا گلسه اونو نجات فرشته‌سی بیله‌جاقسیز و آغینا قره‌سینا باخمادان ائولنماق قراری وئره‌جاقسیز.

بو حس چوخ راحت سیزی اشتباها سالا بیلر. بو حس سیزده یارانمیش اولسا یاخجی اولار اونو دوستلار و یا فامئل جمعینده اولماغینان آرادان آپاراسیز و سونرا ئولنماغا اقدام ائلیه‌سیز.

بئشینجی قویو: تلسماق

سیز طایفانین سوبای قالمیش تک جوانیسیز، هامی‌نین گؤزو سیزده‌دیر کی هاواخت ائولنه‌جاقسیز. سیز ائوین بؤیوک باجیسی‌سیز کیچیک باجیلار ائولنماق اوچون سیزی گؤزلورلر. آخی اونلارین‌دا ائلچیسی وار! و یا ائلنماغا یوبانمیسیز و ایندی بیردن بیره باخیب گؤرورسوز کی ائی وای قوجالدیم فوراً ائلنمه‌لی‌یم! بو مسأله‌لرین هئچ بیری سیزی تلسدیرمه‌مه‌لیدیر.

تَلَسیک زمانلاردا اولان انتخابلارین اشتباه احتمالی چوخ اولور. بونا گؤره حیات یولداشی سئچماقدا اصلاً تَلَسمه‌یین.

آلتینجی قویو: ناقص تانیماق

بیر انسانی کامل تانیمامیش اونونلا ائولنماق کاملاً اشتباه ایشدیر. اونو هفته باشلاری شام یئماغینان و یا فقط تلفونلا دانیشماغینان تانیماق اولماز. 20 ایل‌ده بیر اینن بوجور رابطه اولسا اونو تانیماق اولماز. بیری اینن ائولنماق ایسته‌سز اونون زندگانلیغینی، خانواده‌سینی، کئچمیشینی، اخلاقینی و دوشونجه‌سینی تانیمالیسیز.

یئددینجی قویو: روحی بحران

قایاقکی رابطه‌دن اورگیز سینیب، هله ده اونون یاراللاری ساغالماییب و عادی زندگانلیغا قاییتمامیسیز، ایندی اؤزوزه بیر همدم آختاریرسیز. آما بو وضعیتده ائولنماغا تصمیم توتماق و حیات یولداشی سئچماق اشتباه حرکتدیر.

روحی بحران آیری مسأله‌لره گؤره‌ ده یارانا بیلر. اولا بیلر تازالیقدا یاخین آدامیزی الدن وئرمیش اولاسیز و یا ایشسیز قالاسیز و یا سیزی بحرانا سالان هر مسأله قاباغا گله بیلر. بحران شرایطینده حیات یولداشی سئچماق سیزه گله‌جاقدا مشکله سالا بیلر. چونکی سیز بحراندا اولاندا یاشاییشا باخدیغیز زاویه فرقلیدیر و او آندا نظریزه مناسب گلن شخص بحراندان سونرا آیری جور گؤروشه بیلر. بحراندان سونرا آییلیب گؤره‌جاقسیز کی بو آدامینان اصلاً تفاهموز یوخدور و تعجب ائلیه‌جاقسیز کی نه جور اولوب اونونلا ائولنمیسیز.

سککیزینجی قویو: سرخوشلوق و هیجان

سیز خوش گئچن بیر قوناقلیقدا و یا تویدا نظریزه یوخولاردا آختاردیغیز و یئره سیزه راست گلن بیر اینن تانیش اولموسوز. اونون باره‌سینده دوشوننده ایچیز سئوینج اینن دولور و هیجانلانیرسیز. یاخجی احساسدیر آما ال ساخلایین و ائولنماغا تلسمه‌یین کی اوچورومون قیراغیندا دایانمیسیز.

مثبت هیجانلار، منفی هیجانلار کیمی انسانی دوز تصمیم توتماقدان یایندیرار. خوش لحظه‌لین سرخوشلوغو انسانین باخدیغی زاویه‌نی دَییشر و انسان اؤز همیشه‌لیق گؤزو اینن باخانماز. انسان او حالدا هر شئیی گؤزل گؤرر و هر شئیه مثبت باخار. یاخجی اولار بو حاللاردا ائولنماغا تلسمیه‌سیز. ذهنین آراملاشماسی اوچون بیر مدّت دؤزون.

دوققوزونجو قویو: بسه بسلیقق

بسه بسلیق انسانین گؤزونو واقعیتلرین اوزونه باغلار. انسان بیر اینن بسه بسلیق ائله‌ینده تصمیملری‌نین چوخو اشتباه اولار. چونکی او آندا تکجه هدفی بسه‌بسلیق ائله‌دیغی شخصدن قاباغا دوشماقدیر و بو یولدا چوخ شئیلری قربان وئره بیلر.

شاید بیری‌نین گؤزونده یوخاری گؤروشماق اوچون خاص بیر انسان اینان ائولنه‌سیز. و یا دوستوزون فلان طایفاداکی بیر شخص اینن ائولنمه‌سی سیزی داها یوخاری بیر طایفادان ائولنمگه هوسلندیره.  آما ال ساخلایین ! یاخجی اولار بسه‌ بسلیغا آیری یئر تاپاسیز، ائولنماق بوجور شوخلوقلار گؤتورمز.