هدیه وئرماق تاریخی، دئمک اولار انسانلیق تاریخی بویو عمرو وار. مینلر ایلدیر
کی انسانلار مختلف جشنلر و مراسملری یولا سالماغینان بیر-بیرلرینه هدیه وئریرلر.
جامعه‌لرده‌کی رابطه و تعامل‌لرین اهمیّتلی قسمتینی هدیه وئرماق اؤزونه اختصاص وئریر.
هدیه خانواده عضولری، دوستلار و حتّی تجاری طرفلرین‌ده رابطه‌لرین محکم‌لدیر. انسانلارین
بیر-بیرینه هدیه وئرمه‌سی‌نین بیرمینجی معناسی اونلارین بیر-بیرلرینه دَیَر و اهمیّت
وئرماقلاریدیر. بونون نتیجه‌سینه اونلار بیر- بیرلرینه داها آرتیق فکرلشیب دقّت
یئتیریرلر. هرچند مختلف فرهنگلرده و موقعیتلرده هدیه وئرماغین اؤزونه مخصوص معناسی
اولا بیلر آما اوست- اوسته هدیه وئرماق مقابل طرفه دقت یئتیرماق معناسیندادیر.
هدیه آلیب وئرماق
مقابل طرفه علاقه نشان وئرماغین لاپ آیدین
علامتی ساییلیر. حتیّ عکسینه بیری ایسته‌سه
بیرینن لاپ آز صدمه اینن رابطه‌‌سینی
قیرسین بونو هدیه وئرماغینان‌دا ائلیه بیلر. هدیه مسأله‌سینه دقت یئتیرمه‌ین
انسانلار معمولا بو اجتماعی علامتلر و اشاره‌لری الدن وئریرلر.
روانشناسلیق
باخیمدان‌دا هدیه وئرماغین یوخاری
اهمیتی وار. پای وئرماق هر ایکی طرفین روحی باخیمدان سالم اولماسینا کؤمک ائلر. بو
عمل هر ایکی طرفده خوشا گلیم حسّ یارادار و صمیمیّتی چوخالتماغینان امنیت حسینی‌ده چوخالدار. هدیه وئریب آلماق انسانلارین بئینینده
شادلیغا سسب اولان «سروتونین» هورمونونون ترشح تاپماسینا باعث اولار.
هدیه وئرماق
عوضسیز نیّت اینن اولدوغو زمان داها چوخ فایدالی اولور و هدیه وئرنین افسرده‌لیقدان اوزاق اولماسینا سبب اولار.
هدیه وئرماق
ساده ایش نظره گلسه ده اؤزونه مخصوص آدابی
وار. هدیه وئرماغین بیرمینجی چتین مقامی مقابل طرفین نه‌یه علاقه‌لی اولدوغو و نه‌یی سئودیغیدیر. حقیقتده بو راحتلیقدا اونون بئینینه نفوذ
ائدیب نه ایسته‌دیغی بیلمک اولماز. بعضاً ده بو مسأله هدیه‌نین آلانین طرفیندن ارزشسیز گؤروندوغونا سبب اولور.
آشاغیدا یاخجی
هدیه‌نین بیر سئری علامتلرینی
ساییریق:
غرضسیز هدیه
هر شئیدن اوّل
یاخجی هدیه، غرضسیز و توقّع اولمادان وئریلمه‌لیدیر. چونکی غرضلی اولسا و عوض-عوض نیّتی اینن وئریلسه
مقابل طرف، اؤزونو مقابلده آیری بیر هدیه آلماق مجبوریّتینده گؤره‌جاق هم‌ده اونا وئریلن هدیه‌نین صمیمیت اوزو اینن اولمادیغینا ایناناجاق.
مناسب قیمتی
اولان هدیه
وئریلن هدیه
مقابل طرفده یوخسول‌لوق حسّی یاراتسا، حقیقی
هدیه ساییلماز بلکه بو ایش هدیه وئرنین وارلی اولماسینی گؤرسدن عمل ساییلیر.
اناسنلارین هدیه آلماق همان اونون جبرانینا فکرلشدیقلاری اوچون باهالی هدیه اونلاری
دردسره سالار و لاپ آجی خاطره‌لرینه چئوریلر. بونا گؤره
هدیه آلاندا آرتیق دقّت ائله‌ماق لازمدیر.
مخصوص هدیه
بعضیلری هدیه‌نی مجبوری و بویونلاریندا دین اولدوغو اوچون وئریرلر کی
معمولاً بیر کؤینکلیق، جوراب و بو کیمی شئیلر اولار. بونلار لازم اولان شئیلر اولسا
دا بونلاری هدیه وئرماق مقابل طرفده اهمیتلی اولماق و مخصوص اولماق حسی یاراتماز. اوندا بو حس یاراتماق اوچون اونون
چوخ سئودیغی شئیلر مثلاً آلماق ایسته‌دیغی
بیر کتابی هدیه وئرماق لازمدیر.
هدیه نقد پول
اولمامالیدیر
بعضیلری هدیه
آلماق یئرینه پول وئریرلر. بو ایش مقابل طرفین هدیه وئرن اوچون اهمیتسیز اولدوغونو
القا ائلیر. یعنی او شخصین او قدر اهمیتی یوخیدی کی اونون اوچون فکرلشیب بیر هدیه
آلماغا زحمت چکیلسین. هدیه آلانین اهمتلی اولدوغونو بیان ائتمک لازم اولان یئرده
هئچ واخت هدیه نقد پول اولمامالیدیر.
هدیه‌نین ارزشینی پول اینن اولچماق اولماز. هدیه، مقابل طرفه
علاقه‌نی بروزا وئرماق
معناسیدندادیر. بونا گؤره همیشه بیر شئی آلماق لازم دئییل بلکه اونون سئودیغی
یئمگی حاضرلاماق و یا اونا مهم اولان بیر گون مثلاً تولّد گونونده، اونو قوناق
چاغیرماق، اونون سیزه نه قدر اهمیتلی اولدوغونو ثابت ائلر.
هدیه‌نین دالیسینداکی تفکر
هدیه‌نین اؤزو او قدر ده اهمیتلی دئییل بلکه اونون دالیسیندا
اولان تفکر مهمدیر. بونا گؤره مقابل طرفین سئودیغی بیر شئی اولمالیدیر. بو مسأله‌نی اونون دانیشیقلاریندان آنلاماق اولار. حتی بیر کنسرت، تئاتر
بلیطینی‌ده هدیه کیمی وئرماق اولار.
بئله‌لیغینان اونون ذهنینده
شیرین بیر خاطره یاراتماق اولار.
هدیه آلانین
باشی مشغول اولوب واختی آز اولان آدام اولسا اونا واخت ایسته‌ین هدیه مثلاً بئش مین قطعه‌لیق پازل آلماق دوز اولماز آما اونون ایش واختی قولاق آسا
بیله‌جاغی سسلی کتاب آلماق یاخجی
بیر هدیه ساییلار.
پیچتلی هدیه آلماقدان گؤزل بیر شئی یوخدور. حتی بو هدیه بیر بلیط
اولسا اونو بیر هدیه پاکتی‌نین ایچینده آلماق لذتلی
اولار. هم‌ده بو پاکت هدیه آلانین
سئودیغی طرحده اولسا لاپ یاخجی اولار.
گؤزل یازیلار
هدیه کاغذی‌نین اوستونده همیشه گؤزل سؤزلر یازماق لازمدیر. البته
تکراری و کلیشه یازیلار یازماقدا چکینماق یاخجی اولار. چونکی او جمله‌لر هدیه وئرنین اؤز ایچیندن گلمیش یازیلار اولماماسی بللی
اولار. بونا گؤره هدیه وئرن حتی ساده جمله‌لرینن اورک سؤزلرینی یازسادا مقابل طرفه اهمیتلی اولار.
اونا واخت
آییرماق
هدیه همیشه
بیر شئی آلماق دئییل. اولا بیلر زمان و واخت هدیه کیمی مقابل طرفه وئریله. مثلاً
اونون تولّد گونونده و یا اونا مهم ساییلان بیر گونده اونون گؤروشونه گئدیله و یا
اونون سؤزلرینه قولاق آسیلا.