واختلاری
قیزیل اولانلار اونون مدیریتلی اداره اولونماسینی چوخ یاخجی بیلیرلر. فقط
آیلار و ایللرین تلف اولماسینا واختین تلف اولماسی دئییلمز بلکه ائله ثانیه‌لرین و ساعتلرین‌ده تلف اولماسی‌دا بعضی ارزشلی فرصتلری الیمیزدن آلا بیلر. بونا گؤره هر کس واختی‌نین تلف اولمادان دوزگون استفاده‌سینه تصمیم توتوب بو یازینی اووخوسون.
اتفاقاتی دفترچه‌ده یازین:
ایندی گونده‌لیق زمانیزدان نئجه استفاده ائلیرسیز؟ بونو بیلماق زمان مدیریتی‌نین بیرمینجی آددیمی ساییلیر. یعنی ایندی ایشه سالدیغی مئتودو تحلیل ائله‌ماغیز لازمدیر. بو ایشین ائله‌ده تخصصه احتیاجی یوخدور یعینی سیز اؤزوز ده بو ایشی گؤره بیلرسز. باشلانیش اوچون گونده‌لیق ایشلریزی بیر دفترچه‌ده یازین. دئمه‌یین
کی یادیمدا قالار یازماق لازم دئییل حتماً یازین. بو ایش سیزه لازم
اولمایان ایشلری تاپماغا کؤمک ائلر. بو ایشلری تاپماق بیرمینجی بؤیوک داشی
قاباغیزدان گؤتوره‌جاق.
مهمّ ایشلری تاپین:
هر
گون نه ایشلر گؤرورسوز؟ هانسی ایشلره اولویّت وئریرسیز و هانسی ایشلرین
اهمیتی داها آزدیر؟ زمان مدیریتینده بو ایکی سؤال چوخ مهم ساییلیر. زمانین
مدیریتی اوچون بیرمینجی آددیم ایشلری اولویت باخیمیندان دوزماقدیر. لذتلی
ایشلرین حذف اولماسینا قورخمایین. عکسینه گوجوز چاتمایان ایشلری فوری
ایشلرین لیستیندن حذف ائدین. گونده‌لیق مسئولیتلریزی معقول بیر مقدارا آزالداندان سونرا برنامه تؤکماق واختی چاتیر.
واختیزا مزاحم اولانلاری تاپین:
هر کسین دؤره‌سینده واخت مزاحملری اولا بیلر. اونلار گون بویو انسانلارین واختلارین تلف ائلیرلر. بئله سانمایین کی سیزین دؤره‌زده
بئله انسانلار یوخدو. بیر آز دقتلی باخساز اونلاری تاپارسیز. اونلارا
مشغول اولدوغوزو و آرتیق واختیزین اولمادیغینی آنلاتمالیسیز. بو گونون
زندگانلیغیندا مزاحملرین چوخو تلفن و یا اجتماعی شبکه‌لر واسطه‌سی اینن واختیمیز تلف ائلیرلر. یاخجی اولار ایشیز اولان زمانلار تلفونوزو خاموشلایاسیز و یا سس‌سیزه قویاسیز.
واختی یاراتماق یاخجی یول ساییلیر:
«قرار اولدو سیز زمانی مدیریت ائلیه‌سیز نه زمان سیزی» بو جمله‌نین معناسی بودور کی سیز اؤزوزه واخت یارادا بیلرسیز. تعجلنمه‌یین، لازم دئییل ساعتین عقربه‌لرین دالی‌یا چکه‌سیز. سیز اؤلو واختلاری تاپیب اونلاری فایدالی واختلارا چئویرمه‌لیسیز. بو ائله‌ده
بوروشوق ایش دئییل. بئش آلتی گون تمریندن سونرا بو ایشی باشاراجاقسیز. فقط
دقتیز واخت اوغورلولاریندا اولمالیدیر کی واختیزی سرقت ائله‌مه‌سینلر.
ایشیز دوزگون گؤرون:
چوخلاری ایشلری یئیین گؤروماغینان داها آرتیق واختلاری‌نین اولماسینی دوشونورلر. لطفا سیز بو اشتباهی ائله‌مه‌یین و اؤزوزدن داها آرتیق راضی اولماغیز اوچون ایشلرین دوزگون یئرینه گتیرماغینا فکر وئرین.
ایشلری
یالاندان یئیین گؤرنده دقّتیز آزالیر و چوخ واختلار همان ایشی تازادان
گؤرماق مجبوریتینده قالیرسیز. ائله بیر ایشی تازادان گؤرماق واختی تلف
ائلیر.
گونده‌لیق ایشلرین جورلرینی تانیین:
زمان
مدیرتینده ایشلرین نوعلرینی بیلماق چوخ مهمدیر. ایشلری اوچ مهم، آز
اهمیتلی و اهمیتسیز یئره بؤلماق اولار. مهم ایشلری تعویقه سالمایین چونکی
اونلاری واختیندا گؤرمه‌سز سونرا سیزین داها چوخ واختیزی آلاجاقلار و هئچ واخت‌دا همان ایش اولامایاجاقلار. اهمیتی آز اولان و اهمیتسیز ایشلری سونرایا ساخلایا بیلرسیز.
چتین و واخت توتان ایشلره بیر چاره تاپین:
نظریزه
بیر ایش چتین و یا واخت توتان گلسه اونون آلتیندان قاچمایین مخصوصاً مهم
ایشلرین سیراسیندا اولسا. بئله ایشلری واختیندا یئرینه گتیرماق لازمدیر.
یاخجی اولار امکان داخلینده بو ایشلرین گؤرمه‌سینه تازا و فرقلی یول تاپیلسین آما سونرایا ساخلانیلمالاری اصلاً مصلحت دئییل.
واختیزین مدیری اولماغا نئچه توصیه:
زمانین دوزگون مدیریتی اوچون خصلتلریزین بیر سیراسینی اصلاح ائتمه‌لی و یا حتی دَییشمه‌لیسیز. سیزین بعضی قاباقکی خصلتلریزی زمان مدیریتی اوچون ضررلی اولا بیلر.
1ـ برنامه تؤکن اولون:
ایش بیلنلرین دئدیگینه گؤره بیزیم قازانجلاریمیزین یوزده هشتادی چالیشماغییزین یوزده ایرمیسی اینن اله گلمه‌لیدیر. بو سیزین دوزگون برنامه تؤکدوغوز زمان اله گلر. برنامه تؤکه بیلمه‌سز مطمئناً زمان مدیریتینده موفق اولا بیلمیه‌جاقسیز.
2ـ اعتمادیز اولسون:
ایشلرین گؤرولمه‌سینده
آیریلارینا اعتمادیز اولماسا زمان مدیریتی سیزه چوخ چتین اولاجاق. بعضاً
سیز بونا گؤره ایشلریزی واختیندا گؤره بیلمیز سیز کی ایشین بیر قمستینی
آیریسینا تاپیشیرماغا جرأت ائله‌میرسیز. شاید ایشی تاپیشیردیغیز شخص او ایشی سیزین کیمی یاخجی و دقتلی یئرینه گتیره بیلمه‌سین آما ایشین اونلارین طرفیندن گؤرولمه‌سی اونلارین یئرده قالماسیندان و یا سیزین استراحت واختلاریزی آلماقدان داها یاخجیدیر.
3ـ یوخ دئماغی باشارین:
هر
سؤزون و ایستگین قاباغیندا تسلیم اولماق و «گؤزوم اوسته» دئماق نیّتیز
اولسا، یاخجی اولار زمان مدیریتیندن منصرف اولاسیز. سیز زمان مدیریتینی اله
گتیرماق اوچون «یوخ» دئماغی باشارمالیسیز. بونون آیری یولو یوخدور. بیر
ایشی گؤرماغا واختیز اولماسا چوخ احترامینان بونو مقابل طرفه چاتدیرین.
مقابل طرف نه قدر ده اصرار ائله‌سه گوجوز و یا واختیز چاتمایان ایشی عهده‌زه گؤتورمه‌یین.