دنیانین بؤیوک آلیش- وئریش مرکزلری مصرف جامعه شناسلیق نظریه‌لریندن استفاده ائله‌ماغینان بازارلیق ائله‌ماغی داها راحت و لذتلی ایشه چئویرماق و داها چوخ ساتماق اوچون بو مرکزلرده تفریح ابزارلاری‌نین آرتیرماسینا چالیشیرلار.
ایکیمینجی دنیا ساواشیندان سونرا انسانلارین بازارلیق شیوه‌سی ساتیجیلارین تازا برنامه‌لرینه گؤره دَییشدی. او زماندان بو طرفه مصرف جامعه شناسلاری مشتری‌لرده آلماغا رغبتی آرتیران تازا پتانسیل‌لری گؤردولر.
اونلار هر آلیش وئریش مرکزینه گئدن مشتری‌نین همیشه بیر شئی آلماق قصدینده اولمادیغینی بیلدیلر بلکه اونلار آلیش وئریش اینن تفریح ائله‌ماق قصدلری وار. جامعه شناسلار بازارلیغا، بیر طرفی لازم اولان بازارلیقلار و او بیری طرفی تفریح اوچون اولان بازارلیقلارا شامل اولان بیر طیف حاضرلادیلار. گونده‌لیق بازارلیقلار و فنی بازارلیقلار بیرمینجی طیفده یئر آلیر و بزک وسایلی و پالتار کیمیلرین آلماسی ایکیمینجی طیفده یئرلشیر.
بو زمینه‌ده نظریه صاحبی اولان «استون» مشتری‌لری دؤرد یئره بؤلور: اقتصادی، شخصی، قومی و علاقه‌سیز. اونون نظرینه گؤره اقتصادی مشتری‌لرین آلماق منظورلاری فقط کالانی اله گتیرماقدیر و آیری منظورلاری یوخدور. شخصی مشتری‌لر بازارلیغا شخصی بیر تجربه کیمی باخیرلار و فقط اجتماعی رابطه قورماق اوچون تجارت مرکزلرینه گئدیرلر. قومی مشتری‌لر ده فقط خانواده تجارت مرکزلرینده آلیش وئریش ائله‌ماق ایسترلر و آیری یئردن هئچ نه آلمازلار. علاقه‌سیز مشتری‌لر ده آلیش وئریش مرکزلره فقط بیر شئی آلماق اوچون گئدرلر و اوردا واخت گئیچیتماغا اصلاً بازلیقلاری اولماز.
بو زمینه‌ده آیری نظریه صاحبی اولان «بلاچ» دا مشتری‌لری دؤرد مختلف دسته‌یه بؤلور: بیرمینجی دسته تجارت مرکزلرینده چوخ واخت گئچیردن سّنتی شخصلر کی بازارلیغین سنّتی منفعتلرینه بازلیقلاری وار. اونلار تجارت مرکزلرینه خاص خدماتدان استفاده و بازارلیق ائله‌ماق اوچون گئدرلر. او بیری دسته تجارت مرکزلرینه گزیب دولانماق و واخت گئچیرماق اوچون گئدرلر. مصرف نظریه‌لری بو دسته اوچون و اونلارا داها چوخ وسایل ساتماق اوچون چوخلو برنامه‌لری وار. آخر دسته‌ده لاپ آزا بازلیقلاری اولانلاردیلار کی تجارت مرکزلرینده لاپ آز واخت گئچیرتماغا بازلیقلاری اولار.
آلماقدان لذّت آپاران شخصلر تورا دوشورلر
مصرف نظریه‌لری تجارت مرکزینه تفریح اوچون گلن شخصلرین اوستونده مطالعه ائله‌ییب اونلارا داها چوخ کالا ساتماغا چوخلو طرحلری وار. اونلار بیر عدّه‌یه آلیش- وئریش ائله‌ماغین لذّتلی اولدغونون آنلاییبلار.
بو نظریه‌نین قاباغا گدتمه‌سی اینن دنیانین باشا باشیندا آلیش- وئریش اینن بازارلیق آراسیندا باغلیلیق یارادان آدلیم تجارت مرکزلری یاراندی. بو مرکزلرده داها چوخ کالا ساتماق اوچون بو ایکی موضوعون آراسینداکی اوچ جور فعالیته تأکید ائله‌دیلر:
1ـ بوش واختلار اوچون بازارلیق ائله‌ماق. خرید مرکزلرینده فیلم، موسیقی، کتاب و سایر کیمی محصول‌لار ساتانلار. مشتری لازملری اولان محصول‌لاری آلماغین کناریندا بو محصول‌لاری‌دا آلیب بوش واخلاریندا اونلاردان استفاده ائلیرلر.
2ـ بازارلیق زمانیندا بوش واختلاری دولدورماق اوچون رابطه. مشتری‌لر آلیش- وئریش زمانیندا تفریح اوچون مختلف محصول‌لار آلیرلار. مثلاً رستورانلار، سینما سالونلاری و اویون سالونلاری تجارت مرکزلرینده مشتریلره خدمات وئریرلر.
3ـ تجارت مرکزلرین او قدر جذّاب و گؤزل ائلیرلر کی مشتری‌لر اوردا دولانیب تماشا ائله‌ماغینان لذّت آپاریب داها چوخ محصول آلماغا تشویق اولورلار.