اوشاقلارین سؤزه باخماماغی والدینین مهم مسأله‌لریندن ساییلیر. اوشاق روانشناسلاری‌نین نظرینه گؤره، ظاهرده کؤنزلیق کیمی گؤرونن رفتارلارین هامیسی مسأله ساییلمیر.
اوشاقلارین مختلف بؤیومه زمانلارینی تانیماق اونلارین عمل‌لرینی داها یاخجی تانیماغا سبب اولار. حقیقتده اوشاغین سؤزه باخماماغینی هر یاشدا کؤنزلیق آدلاندیرماق اولماز. اریکسون روانشناسلیق نظریه‌سینه گؤره ایکی یاشلا اوچ یاش آراسی اوشاقلارین مستقل اولماق زمانلاریدیر. بو یاشلاردا اوشاق سرعتله بویویر و بو فعالیتلر اوشاغین قدرت نشانه‌سی ساییلار. بو اوزدن اوشاق استقلال و خو مختارلیق دالیسیجان اولور.
اوشاغی بو یاشداکی گوجلری اونو خودمختارلیق رفتارلاری بروزا وئرماغا سوق وئرر. مثلاً اؤز اطرافینی آختارا، آـیلیب دوشر، نئچه آددیم آتار و نئچه کلمه سؤز دانیشار. بو اوزدن اوشاقلاردا خودمختارلیق و هویّت آختارماق اوشلاردا لاپ یوخاری حدّینه چاتار و کؤنزلیق کاملا طبیعیدیر. مگر غیر طبیعی حالدا باش وئره.
بعضاً بؤیوکلر اوشاقلارین قورخماسینی کؤنزلیغینان اشتباه سالیرلار. اوشاقلار دا بؤیوکلره تای قورخدوقلاری یئردن قاچارلار و اورا یاخینلاشماقدان چکینرلر.
اوشاقلارین ذاتی خصوصیّتلری اونلاری کؤنزلیغیندا دا تأثیرلیدیر. بعضی اوشاقلار او بیریلره نسبت داها چوخ داعواچیل اولورلار. بو اوشاقلار دوغوم آنیندان قرارسیز اولورلار و بیر بالاجا محرّکین قاباغیندا آراملیقدان جیغان ویغانلیغا چاتیرلار. آما ذاتی تفاوتلارا رغماً اوشاقلارین کؤنزلیغی داها چوخ تربیته باغلیدیر و چوخ آز ژنیتیکه مربوط اولور. ائله بونا گؤره تربیت یوللاری و اطراف عامل‌لری کنترل ائله‌ماغینان بو مشکلین قاباغینی آلماق اولار.
کؤنز اولشاقلارین علامتلری هانسیلاردیر؟
1ـ تئز حرصلنیرلر.
2ـ بؤیوکلره جواب قایتاریرلار.
3ـ بؤیوکلرین ایستکلریه قاباغیندا فعال شکلده دایانیرلار و قانونلارا بویون وئرمیرلر.
4ـ آیریلارین اینجیتماق اوچون عمداً بعضی ایشلر گؤرورلر.
5ـ اؤز رفتار و اشتباهلارینا گؤره اؤزگه‌نی دانلیرلار.
6ـ تئز انیجییندیلر و اطرافداکیلاردان تئز ـ تئز کوسرلر.
7ـ حرصلی و غضبلیدیلر.
8ـ کینه‌لی و انقام آلاندیلار.
دئدیکلریمه اساساً دوزگون تربیت اوشاقلارین کؤنزلیغینی آزالدا بیلر و والدین اوشاقلارین سؤزه باخماماق و کؤنزلیقلارینی بیر سئری تکنیکلرینن آرادان آپارا بیلرلر:
•ـ اوشاغیزا آرتیق محبت ائله‌یین. اوشاقلار بعضاً دقت مرکزینده اولماق اوچون غیر سالم رفتارلارا ال وورورلار.
•ـ اوشاقلارا اؤزلرین آراملاتماغی اؤیردین. اوشقلار و مخصوصاً کؤنز اوشاقلار تئز ـ تئز قرارسیزلاشارلار. اونلاری بیر اویونجاغا و یا ایستی پتویا دلبسته ائله‌ماغینان، اؤزونو نئجه آؤاملاتنماغی اؤیرده بیلرسیز.
•ـ اوشاغین یاخجی ایشلرینی یادا سالین. هر رفتاری دقّت مرکزینده ساخلاماق اونون دواملی اولماسینا سبب اولدوغونا گؤره نه یاخجی کی اوشاغین پیس عمل‌لری‌نین یئرینه یاخجی رفتارلاینا دقّت ائله‌یاق. هر بیر دوز نا صحیح رفتارا دقت یئتیرمه‌ماغینان اونون آرادان گئتمه‌سینه سبب اولا بیلر.
•ـ والدینین رفتاری قاباقجادان بللی اولمالیدیر. اوشاغین بللی رفتاری قاباغیندا آتا ـ آنانین ثابت عکس العملی اولماسا اوشاق گیج قالار. مثلاً اوشاغین پیس رفتاری قاباغیندا بیر دفعه گولماق و بیر آیری دفعه حرصلنماق اونو گیج قویار.
والدینین رفتارلاری هماهنگ اولماسی‌دا اونلارین عکس‌العمل‌لری‌نین قاباقجادان بللی اولماسی قدر اهمیّتلیدیر. آتا ـ آنانین عکس‌العمل‌لری‌نین نا هماهنگ اولماسی اوشاغین کؤنزلیغینا سبب اولا بیلر.
•ـ اوشاغا امر وئرماق یئرینه خواهش ائله‌ماغی اؤیردین. اوشاقلار چوخ تئز اؤیرنرلر و والدینین رفتاریندا اولگو گؤتوررلر. اونلارین یانیندا ادبلی و معرفتلی دانیشماغین چوخ یوخاری تأثیری وار.
اوشاقلارا امر وئرماق یئرینه اولاردان اقتدارینان خواهش ائله‌سز اوندان امر وئرماق یئرینه خواهش ائله‌ماغی‌دا گؤزله‌یه بیلرسیز.
• اوشاقلارا همکارلیغی و مسئولیت قبول ائله‌ماغی اؤیردین. بو ایش اوچون اونلارا مختلف یاشلاردا اونلارا مناسب مسئولیت تاپیشیرین.
جبران ائله‌ماغین لازملیغی، بعضی ایشلرین جبران اولماق قابلیّتی‌نین اولماماغینی و رفتارلارین عینی نتیجه‌سینی اونلارا اؤیرتماق، اونلاری مسئولیّتلی و همکارلیق روحیّه‌سینه مالک بیر اوشاق ائلر.
اونلارا بو مضموندا ناغیل‌لار تعریفله‌ماق‌دا فایدالیدیر آما اونلاری، یاشلارینا مناسب فعالیّتده شرکت وئرماغین داها آرتیق تأثیری وار.