اسلامی فرهنگده سلامتلیق و معنویّت، بیر-بیرینه ساریلمیشدی و طبیب اولماق اوچون فلسفه و کلام کیمی او گونون انسانی علملرین عالی درجه‌لرینه چاتماق لازمیدی. بئله‌لیغینان طبیب فقط جسم ناخوشلوغونو مداوا دایره‌سینه محدود اولماییب حکیم اولماغا سوق تاپیردی.
عمومیّتده سلامتلیغا مربوط اولان تعریفلر نئچه الگودن تشکیل تاپیر. بو زمینه‌ده اوچ اساس الگو نظرده آلینیر:
الف: طبابت الگوسو: بو الگو داها چوخ سلامتلیغین فیزیولوژی جنبه‌سینی تبیین ائلیر.
ب: محیط الگوسو: بو الگو اکوسیستمین تحلیلی و محیطین انسان ساغلاملیغینا ووران ضرردن بحث ائلیر. بو الگو، محیط دَییشنده شخصین شرایط اینن نئجه تطبیق یئیه بیلدیغی اساسدا تعریف اولوب.
ج: جامع الگو: بو الگو سلامتلیغی شخصین بوتونلوغو اینن تعریف ائلیر و اکو سیستم، فیزیولوژی، روحی، هیجانی، اجتماعی و معنوی جنبه‌لرینه شامل اولوب ناخوشلوقلارین قاباغینی آلماقدا متمرکز اولور.
بو الگویه گؤره، سلامتلیق دایانماییب بلکه حرکتده اولان بیر پروسه‌دیر کی بوتون گونده‌لیق تصمیملر و فعالیّتلری انعکاس وئریر. بو الگونون مستقر اولماسی رشته‌لر آراسی منطقه‌نین یارانماسیندان خبر وئریر کی حل اولمایان معمالارا جواب تاپا بیله‌جاق.
اسلام ادبیاتیندا بو مسأله‌یه دقّت یئتیرماق آشکار گؤرونو. امام سجاد (ع) صحیفه سجادیه‌ده سلامتلیغا دعا ائله‌ییب بویورور: اَللَّهُمَّ صَلِّ عَلى مُحَمَّدٍ وَالِهِ، وَاَلْبِسْنى عافِيَتَكَ، وَ جَلِّلْنى عافِيَتَكَ، وَ حَصِّنّى بِعافِيَتِكَ، وَ اَكْرِمْنى بِعافِيَتِكَ؛ الله ! محمد و اونون اهلینه سلام گؤندر و عافیت لباسینی منه گئییندیر، و منی عافیته بوروندور و منی عافیت اینن حفظ ائله و عافیت اینن منی تکریم ائله» بو کلامدا سلامتلیغین تأثیرلری هر زمینه‌ده منعکس اولور.