اسلام دینی انسانلاری یئر به یئر علم اؤرگشماغا و دوشونماغا چاغیریر. دینی متنلر مختلف یئرلرده علمین اهمیّتی و عالمین منزلتینه تأکید ائله‌ییبلر و علمین یوخاری رتبه‌یه صاحب اولدوغونا تأکید ائدیبلر.

حضرت علی (ع) علمین درجه‌سی و رتبه‌سی باره‌ده بویوروب: «علم فضیلتلرین لاپ یوخاریسندادیر».[1]

بیر گون بیر نفر او حضرتدن دولاما سؤل سوروشور. (یعنی قصدی اؤرگشماق یوخ بلکه امتحان ائله‌ماغیدی.) حضرت جوابدا بویورور: «اذیّت ائله‌‌ماق اوچون یوخ بلکه اؤرگشماق اوچون سوروش؛ چونکی اؤرگشماق قصدی اینن سوروشان جاهل، عالم کیمیدیر. و اَیری یولا آددیم قویان عالم، سهو آختارماقدان اؤترو سوروشان جاهل کیمیدیر».[2]

امیرالمؤمنین علی علیه السلام علم و ادب اؤرگشماغا بئله چاغیریر: «ای مؤمن، علم و ادب سنین قیمتین و دَیَریندی، اونلاری اؤرگشماغا چالیش کی علم و ادبین چوخ اولدوقجا سنین قدرین و قیمتین چوخالار».[3]

هابئله الله پیغمبری (ص) علم و بیلماغین رتبه‌سی باره‌ده بویوروبلار: «بیلماق، بوتون یاخجیلیقلارین باشیندا گلیر و جهالت بوتون پیسلیقلارین باشیندا گلیر».[4]

حضرت علی‌ده (ع) بو باره‌ده تأکید بویورورلار: «البته علم، اورکلری یاشادان، کور گؤزلری ایشیقلاندیران و گوجسوز بدنلری گؤجلندیرندی».[5]

---

[1] . غرر الحکم: 6379 منتخب میزان الحکمة: 448

[2] . نهج البلاغة: الحکمة320 منتخب میزان الحکمة: 260

[3] . مشکاة الأنوار: 135 منتخب میزان الحکمة: 14

[4] . بحارالأنوار: 77 / 175 / 9 منتخب میزان الحکمة: 396

[5] . أمالی الصدوق: 493 / 1 منتخب میزان الحکمة: 396