فردی و اجتماعی زندگانلیقدا انضباطلی اولان انسانین فکرلری نظملی دوزولر و ائله بونا گؤره‌ده ترقّی پلّه‌لرینی راحتلیغینان یوخاری گئدر و روحی فشاردان آماندا اولوب شادلیغی چوخ اولار.
وارلیق عالمی انتظام اساسینا دایانیب، بوتون مخلوقات دنیا سیستمینده مخصوص یئرلری و روللاری وار. گئجه-گوندوز، ایلین فصللری و گؤیده‌کی اجرامین دولانماسی، هامیسی انتظامین اهمیّتیندن بیر نشانه ساییلیرلار. کائناتدا انتظامی یارادان قادر الله، اونو انسانین فردی و اجتماعی زندگانلیغیندا دا سئور.
انضباط جامعه‌نین تحرّکونو چوخالدیب ترقّیسینه سبب اولار. آما انضباطین فردی و اجتماعی یاشاییشدا یارانماسی یوللاری‌نین نئجه‌لیغیندا مختلف نظرلر وار. چونکی بو مسأله‌نین ملّتلر کئچمیشی و عادتلرینه دایانیر. الله تعالا بقره سوره‌سی‌نین 49-جو آیه‌سینده بویورور: بیر هر شئیی اندازه‌سی قدر یاراتمیشیق.
انسانین انضباطلی اولماسی اونون کائناتینان اویماسی معناسیندادیر. یعنی انسان بو شرایطه کائناتین مناسب بیر عنصری کیمی وظیفه‌سینی یئرینه یئتیرر. آما نظمدن اوزاق اولاندا ایشلرین گئدیشی‌نین دوزگون اولماسینا مانع اولار.