تبریزین ایمام جومعه‌سی دئدی: قاباقداکی اینتیخاباتدا صلاحیّتلرین رد اولماسیندان سونرا بعضیلری نیققیلداماغا و میریلداماغا باشلاماسینلار.
فارسین تبریزدن وئردیغی خبره گؤره، آیت الله محسن مجتهدشبستری بو هفته‌نین ناماز جومعه خوطبه‌لرینده موعظم رهبرلیق مقامی‌نین کارگرلرینن گؤروشده مونتخب رییس جومهورون خصوصیتلرینه بویوردوقلارینا ایشاره ائدیب دئدی: رییس جومهورون گرک آللاها، جماعته و اساسی قانونا اعتیقادی اولوب روحیه‌سی موقاویم اولا.
رییس جومهورلوق داوطلبلری اؤلکه‌نین ایجرایی مودیریتی‌نین موقعیتینده کیریخمامالیدیلار.
او آرتیردی: مونتخب رییس جومهور دوشمنلر قاباغیندا قورخماز، شوجاعتلی و دایانان اولمالیدیر و گرک میداندان قاچماق اهلی اولمایا.
تبریزین جومعه نامازی خطیبی، تدبیرلی و برنامه‌لی اولماغی رییس جومهورون آیری خصوصیتلریندن ساییب آرتیردی: داخیلی و ایقتیصادی مسأله‌لرده هر طرفلی و اوزون مودّت باخیشا احتیاجیمیز وار. گرک ایقتیصادی مسأله‌لره گونده‌لیق باخماقدان و ایقتیصادی سیاستلری تئز تئز دگیشماقدان اوزاق گزیلسین.
ولی‌فقیهین شرقی آذربایجاندکی نوماینده‌سی دئدی: اینتیخابات میدانینا وارید اولانلار اؤلکه‌نین ایرجایی مودیریتی‌نین معناسینی بیلمه‌لیدلر و گرک بو مقامی دَیَرلندیماقدا کیریخمایالار. بو عرصه‌یه گلنلر دوزگون دَیَرلندیمه‌دن سونرا بو میدانا قدم قویسونلار.
حاشا کی صلاحیتلرین رد اولماسیندان سونرا یئنه بیر عیدّه‌نین نیققیلداماغی و میریلداماغی باشلایا.
او آرتیردی: راحیل ایمام(ره) و موعظم رهبرلیق مقامی‌نین دفعه‌لرینن تأکید ائله‌دیقلاری کیمی اؤلکه‌ده اینتیخابات ابزاری موستحکمدیر و نیگهبان شوراسی‌نین اینتیخاباتدا حاضیر اولماسی و صلاحیتلرین، عادیل و طرفسیز اینسانلار طرفیندن بررسلیق اولماسی موبارک بیر حضوردور.
تبریزین جومعه خطیبی دئدی: حاشا کی صلاحیتلرین رد اولماسیندان سونرا یئنه بیر عیدّه‌نین نیققیلداماغی و میریلداماغی باشلایا.
مجتهدشبستری تأکید ائله‌دی:رهبریمیز ! تبریزین و ایرانین ویلایت‌مدار جماعتی سیزین سؤزلریزی ائشیتدیلر و شراییطی اولمایانلارا و ایش باشامایانلارا و اینحیرافی و فیتنه‌چی گروهلارا باغلی اولانلارا موطلقا رأی وئرمیه‌جاقلار.