لذّتچیلیق مکتبی «شخصی لذّتی» اخلاق لازیملیغی و دَیَری‌نین منشأی بیلیر و قبول ائله‌دیغی اخلاقی حؤکملری اونون اساسیندا ثابیت ائدیر. اخلاقلی بیر ایش گؤرَنین، آپاردیغی لذّتین، ذاتی ارزیشی وار و آیری سؤزله، سعادت هر شخصین داها چوخ لذّت آپارماسیندان عیبارتدیر.
بو اخلاقی مکتبین تابعلری، لذتین ذاتی ارزیشه مالیک اولماسینی بئله ایستیدلال ائدیرلر کی اینسان طبیعتاً لذّت آختاریر و آغریدان قاچیر. هر فرد اوچون لذّت و خوشلوق مطلوبدور و هئچ کس اؤزو اوچون آغری و ناراحتلیق ایسته‌میر. بونا گؤره لذّتین مطلوبیّت و ذاتی ارزیشی‌نین منشأی، فرد اؤزودور.
نتیجه‌ده اخلاقلی فاعیله لذّتلی اولان ایشین، ارزیشی وار و اونا آغریسی اولانین، ارزیشی یوخدور. هابئله بیر یئره ییغیشمایان و بیر-بیریله تزاحومی اولان ایشلرین هر هانسی‌نین اونون اوچون داها چوخ لذّتی و یا داها آز آغریسی اولسا، او ایشین سئچیلمگه ارزیشی وار.
چوخ ساده لؤح تلقّیده، شخصی لذّت، حاضیر لذّتده خولاصه اولور. بو تلقّی‌یه گؤره، شخص بیر ایشین ارزیشینی بیلمک اوچون، او ایشین ایندی اونون اوچون لذّتلی و یا آغریلی اولماغینا باخمالیدیر و بو ایشین گله‌جکده اولان لذّت و یا آغریسی‌نین، اونا ارزیش قویماقدا تأثیری یوخدور. آما اینسانین طبیعتاً لذّت دالیسیجان اولماسینی قبول ائله‌ساق‌دا لذّتی فقط حاضیر لذّته مخصوص ائله‌ماغیمیز دوز دئییل.
لذّت مطلوب اولورسا، لاپ چوخ لذّت داها مطلوب اولار، ایستر حاضیر لذّت اولسون و یا گله‌جاقدا اله گلن لذّت اولسون. بلکه داها اوزون و داها شیدّتلی لذت، آز آغری‌یا دؤزماغینان اله گله بیلر و بلکه آز و حاضیر لذّتلر اوزون آغریلارا سبب اولا بیلر.
اینسان عقل صاحیبی اولدوغو اوچون گله‌جاقداکی لذّتلر و آغریلارا فیکیرلشه بیلر و داها چوخ لذّتلی اولان ایشی سئچه بیلر. میثال اوچون ناخوشلوغو شیدّتلندیرن دادلی یئمکلرین سایی چوخدور. بعضاً ده موختلیف لذّتلری اله گتیرماق اوچون تزاحوم یارانار و اونلاری بیر یئرده اله گتیرماق اولماز. میثال اوچون تنبللیغینان علم اؤرگشماق لذّتلری بیر یئره ییغیشمازلار.
بونا گؤره لذّتچیلرین چوخو هر ایشین ارزیشینی موعیّنلشدیرماق اوچون، اوندان حاصیل اولان لذّت و آغرینی، و ارزیشلرین آراسینداکی موقاییسه‌ده، اوندان علاوه، لذّتلرین موقاییسه‌سی و برتر لذّتی موعیّنلشدیرماغی لازیم بیلیبلر. هابلئه اونلار ایشلردن حاصیل اولان لذّت و آغرینی موحاسیبه ائتمک اوچون بیر پارا معیارلار وئریبلر و بو یوللارینان موختلیف ایشلرین ارزیشینی موعیّنلشدیرمه‌نین مومکون اولماسینی ایدّعا ائدیبلر.
بو معیارلارا اساساً هر فرد، عمللرین ایندی و گله‌جاقداکی بوتون لذّت و آغریلارینی نظرده آلماغینان، مجموعدا داها چوخ لذّتلی اولان ایشی و یا هئچ اولماسا داها آز آغریسی اولان ایشی سئچمه‌لیدیر و بو ایشین ارزیشی داها چوخدور.
لذّتچیلرین بعضیسی، لذتین ذاتی ارزیشینه تأکید ائله‌سه‌لر ده، لذّتلرین هامیسینی برابر بیلمیرلر، بلکه نفس ساکینلیغی کیمی روحی لذّتلری شهوت و جیسمی لذّتدن یوخاری بیلیرلر.
لذّتچیلر، لذتین طبیعتاً اینسان اوچون ارزیشلی اولدوغونا تأکید ائله‌ماغینان، بونا گؤره اونون ارزیشینی ذاتی بیلیرلر.
اونلار طبیعی ارزیش دئیَنده، اینسان طبیعیتی‌نین ایقتیضاسی اولان ارزیشی نظرده توتورلار. آیری سؤزله، لذّتچیلر بو اعتیقاددادیلار کی اینسانین طبیعتی لذّت آختاراندیر و لذّت هئچ وضعیّتده اینسان اوچون نا مطلوب دئییل. بونا گؤره لذّتین طبیعی ارزیشی وار.
البته عوام اینسانلار دونیا و مادّی مسأله‌لرینن مشغول اولدوقلاری اوچون، لذّتدن، جیسمانی و مادّی لذّتی تلقّی ائلرلر.
بو ایستیدلالین ایکینجی موقدّیمه‌سی دوز دئییل. چونکی بیر زادین طبیعی ارزیشی اولا بیلر آما بو اونون ذاتی ارزیشه مالیک اولماسی معناسیندا دئییل. نتیجه‌ده لذّتین طبیعی ارزیشی اولسا دا ذاتی ارزیشی یوخدور. لذتچیلر، لذّتین مطلوبلوغونو آیری زادین مطلوبلوغنا باغلی اولماماسینی ثابیت ائله‌میش، اونون ذاتی ارزیشه مالیک اولدوغونو نتجیه آلیبلار.
بونا گؤره لذّتچیلری لذّته ذاتی ارزیش ثابیت ائله‌ماق اوچون گتیردیقلاری ایستیدلال دوز دئییل.