هر زاد کیمی شاد یاشاماغین‌دا اؤزونه مخصوص اصوللاری وار کی اونلار اولمادان شادلیغا چاتماق اولماز. عالیملر شادلیق اوچون موختلیف تعریفلر دئییبلر. مثلاً ارسطو دئییر:«عادی اینسانلار لذّتی شادلیق بیلیرلر، موفّق اینسانلار دوزگون عملکردی شادلیغینان برابر بیلیرلر و عالیملر تفکّورلی و آختاریشلی حیاتی شادلیغینان موعادیل بیلیرلر».جان لاک شادلیغین حیاتدا لذتلر سایی‌سینا باغلی اولدوغونو اینانیر. موعاصیر عالیم «مک‌گیل»ده شادلیغی ایرضا اولموش مئییل‌لرین لذّتلرینده بیلیر. برتراند راسل دئییر: «رغبت، شاد یاشاماغین لاپ عمومی علامتی‌دیر».
بعضی‌لری‌ده همیشه گولماغی و دئییشمه‌سیز بیر حیاتی شادلیق بیلیرلر. آما شادلیقدان داها کامیل تعریف وئرمک اولار.
شادلیق، شخصی حیاتدا قالارگی خوشبختلیق حیسّی، اؤزونه و آیریلارینا فایدالی اولماق و آرزولارا چاتماقدیر. بو تعریف چوخ ایده‌آلا اوخشاسا دا اینسان الی چاتماز دئییل.
شاد یاشاماغین اصولو:
اؤز دَیَرلرینی تانیماق
آیریلارین یاخجیلیقلاری‌نین قدرینی بیلمک
بدنین تربیتی
آللاه نعمتلریندن لذت آلماق
اؤزوندن و آیریلاریندان شادلیق گؤزله‌ماق
حیاتدان نه ایسته‌دیگیمیزی بیلیب اونون یولوندا ایقدام ائتماق.
ایندیه قدر فیکیر وئرمیسیز یاخجی حیسّیمیز اولاندا آیریلاری‌دا اوّلدن داها یاخجی نظره گلیرلر؟ آرخایین اولون دونیا بیزیم اینعیکاسیمیزدیر.
بوتون دوشونجه و ایشلریمیزین نئجه‌لیغی اؤزوموزه نئجه باخماغیمیزدان آسیلیدیر. تجروبه‌لر، موفقیّتلر، شیکستلر و اؤزوموز باره‌ده اولان فیکیرلر هامیسی اؤزوموزدن اولان ذهنیمیزده‌کی تصویری یارادیر.
بونا گؤره حیاتی نه قدر سئودیگیمیزی و دقیقاً نه قدر موفّق اولماغیمیزی ذهنیمزده‌کی تصویریمیز تعیین ائلیر.
همیشه اینتیظاریمیز اولان شئیی جذب ائلیروق. دونیا اؤزوموزو لاییق بیلدیغیمیز کیمی بیزینن اولور.
اینسانین اؤزوندن اولان ذهنینده‌کی تصویری ترموستات کیمی عمل ائلیر و اونون رفتارلاری بو تصویرین محدوده‌سینده عملی اولور. بو مسأله ناخوشلوق ساییلان تکبّوردن فرقلیدیر.بونون معناسی اؤز سئورلیغین موثبت معناسیدیر. بو اؤز سئورلیک بیزی اؤزوموز و آیریلارین ایستکلرینه احتیرام قویماغا گوج وئرر. ائله کی بیز موفقیّتلریمیزین تعریفیندن اؤزوموزدن چیخماریق و ضعیف نوقطه‌لریمیزدن بدحال اولماییب اونلارین گوجلندیرمه‌سینه چالیشاروق. بو آیریلارین تعریفیندن تأثیر آلمادان اؤز ارزیشلریمیزین قدرینی بیلماق معناسینداندیر.
آیریلارین بیزینن ائله‌دقلاری رفتار همن بیزیم اؤزوموزله اولان رفتاریمیزدیر. رابیطه قوردوغوموز اینسانلار بیزیم اؤزوموزه احتیرام قویوب قویمادیغیمیزی چوخ تئز تشخیص وئررلر. بیز اؤزوموزه احتیرایم قویورساق اونلاردا بو ایشی گؤره‌جاقلار.
چالیشمالی‌ییق اؤزوموزو احتیراما لاییق بیلاق. غم حیسّیمیزی آغلاماغینان گؤرستدیغیمیز کیمی شادلیغیمیزی‌دا گولر اوزلو اولماغینان گؤرستمه‌لی‌یوق. اینانمالی‌ییق کی بیر زای آلما بیر قوتو ساغ آلمانی زای ائلر.
عشق و احتیراما لاییق اولدوغوموزو اینانمالی‌ییق. ذهنیمیزده اولان تصویریمیز ساغلام اولاماسا شادلیغی ردّ ائلر. ذهنیمیزدن خطور ائدن هر فیکیر بدنیمیزین شیمیایی ترکیبلرینه اثر قویار. موثبت اولسا بیزی سئویندیرر منفی اولسا غملندیرر.
رفتار اولگوسونو دگیشدیرماق
شاد یاشاماغین اوّل آددیمی، رفتار اولگوسونو دگیشدیرماقدیر. راحاتلیغینان اله گلمه‌سه‌ده ایمکانسیز دئییل. حیاتیمیزین هر هانسی مرحله‌سینده اولساق بئله، اونا ال تاپماغا ایمکان وار. همیشه اؤزوموز باره‌ده موثبت دوشونمه‌لی‌یوق.
«آن»دا یاشاماق
بوتون وارلیغیمیز، بو «آن»لاردیر. ذهنیمیزین دینجلیغی و شخصی موفقیّتیمیز، آنلاردان نئجه ایستیفاده ائله‌ماغیمزا باغلیدیر. دونن نه اولوب و صاباح نه اولا بیلره باخمیاراق ایندی‌کی آندا یاشاماغیمیز موهیمدیر. «ایندی»ده یاشاماق اونو ائشیگه آتماق یئرینه اونو اورگه یاتیم ائله‌ماق معناسیندادیر.
گولماق
گولنده هر زاد جیسمیمیز و ذهنیمیزین نفعینه اولور. گولماق آغریلارا تسکینلیق وئرر. شادلیق هونری چتینلیقلارا لاپ تئز زماندا گوله بیلماق گوجونه صاحیب اولماق معناسیندادیر.موشکوللره لاپ تئز گوله یبلن اینسان اومیدسیزلیغی داها تئز اؤزوندن اوزاقلادا بیلیب گولوش درمانیندان داها یاخجی ایستیفاده ائده بیلر. گولماق جیسمی ساغلاملادیب عؤمرو اوزون ائلر.