خانیواده عضولری‌نین سیگار, موخدیره مادّه‌لر و ...اعتیادی اوشاقلارا اثر قویور. هر چند بیر نفرین اعتیادیندان خانیواده‌نین بوتون عضولری ناراحات اولارلار, آما اونون منفی تأثیری اوشاقلارا داها چوخ اولار. بو اوشاقلار ائوده هرکی-هرکیلیق و پیش‌بینلیق اولمایان شراییطله اوز به اوزدولر و بو مسأله اونلارین ایندیکی و گله‌جک یاشاییشلاریندا موشکول یارادار. آتا آناسی مؤعتاد اولان اوشاقلار بو موشکول‌لرله اوز به اوز اولارلار:

اؤرگشمه گوجونون آزالماسی, فیزیکی ناخوشلوقلار, روحی ناخوشلوقلار, چاقلیق و اطرافا گؤره دیقّتین آزالماسی

اوشاغین کیرداریندا منفی تأثیر

والیدینین اعتیادی اوشاغین کیرداریندا پیس تأثیر قویار کی اونلارین بعضی‌سینه ایشاره ائدیریک:

مؤعتادلارین یاشاییشی عادی اینسانلارلا چوخ فرقلی اولور. بوجور خانیواده‌لرده اوشاقلار ائوده خشونت, جیسمی و جینسی سوءایستیفاده, افسورده‌لیق, روحی ناخوشلوقلار, طلاق و . . .زادلارا شاهید اولورلار و اونلاردا بو ایشلری گؤرماغا تمایول, چوخ اولار و شیدتلی صورتده ایضطیراب, افسورده‌لیق و حتّا اینتیحار معرضینده اولارلار. اکثر زمانلار اونلارین بو رفتارلاری ائودن ائشیگه‌ده مونتقیل اولار و اونلار اؤز یاشیتلاری‌اینن چوخ چتین رابیطه قورا بیلرلر و معمولاً غیر ایجتیماعی و اوتانجاق افرادا تبدیل اولارلار.

اوشاقلیق دؤره‌سینی یاددان چیخارتماق

وضعیت چوخ پییس اولان زمان, آتا آنا اوشاغین اساسی ایستکلرینه دیقّت ائله‌مزلر و اونلار مجبور قالارلار مدرسه‌نی بوشلاییب و برنامه‌سیز یاشایالار. بعضاً بالاجا کیشیلره و خانیملارا چئوریلرلر کی مجبوردولار خانیواده‌نین و یا کیچیک باجی قارداشین مسئولیّتینی بویونلارینا آلالار.

گوناه احساسی

بعضاً آتا آنا اوشاغین اوستونه قیشقیراندا, او اؤزونو ائوین بوتون حادیثه‌لرینه گؤره گوناهلی بیلیر. بو احساس اونون گله‌جکده‌کی رفتارلارینا اثر قویور.

والیدینین دیقّتسیزلیغی

چوخ واختلار حتّا والدینین فقط بیری مؤعتاد اولاندا, آتا و یا آنا اوشاغا کیفایت قدر دیقّت یئتیشه بیلمیر, نیه کی بوتون دیقّتی اؤز موشکولونه مصرف اولور. اوشاغا دیقّتسیزلیق اونون افسورده‌لیغی و آیری موشکوللرینه سبب اولا بیلر.

اوشاغین خشونتی

بئله خانیواده‌لرده اوشاقلار همیشه والیدینین داعواسینا شاهید اولورلار و اؤزلری‌ده جیسمی و یا روحی سوءایستیفاده معرضینده اولورلار و بو شراییط اونو روحی و یا جیسمی ناخوشلوغا چاتدیرا بیلر.

اؤزونه اینمانماماق

والیدینین بیری مؤعتاد اولان خانیواده‌لرده, اوشاقلار همیشه ساکیت اولمالیدیلار کی والدینی حیرصلندیرمه‌سینلر؛ بونا گؤره قورخاق و اؤزونه اینانمایان اولارلار و هر شئیدن و هر کسدن قورخارلار.

اؤزگه‌نین ریضایتی

مؤعتاد والیدینین اوشاقلاری چالیشارلار ساکیت اولسونلار و اونلاری راضی ساخلاسینلار. بئله اولاندا اونلار گله‌جاقدا دا هامینی اؤزلریندن راضی ساخلاماغا چالیشاجاقلار و هئچ کسه یوخ دئماق جورأتلری اولمایاجاق, مخصوصاً گوجلو آداملارا؛ بئله‌لیکله اؤز هویّتلرین الدن وئره‌جاقلار.

اوشاقلار بوجور خانیواده‌لرده یالان دانیشماغی, خیانتی, اوغرولوغو و آیری جورملری اؤرگشیرلر.

اوشاغین مؤعتاد اولما احتیمالی

مؤعتاد والیدینین اوشاقلاری همیشه اعتیاد معرضینده‌دیلر و بونا گؤره اونلارین مؤعتاد اولما احتیمالی چوخ یوخاری اولور.

آیریلارینا اینانماماق

بو اوشاقلار اوتانجاق اولدوقلاری اوچون دوستلاری ایله چوخ آز رابیطه‌لری اولور و یاشاییشلاری معمولاً گیزلی اولار. بئله‌لیکله هئچ کسه اینانمازلار و بو اینانماماق اونلارین گله‌جکده‌کی رابیطه و یاشاییشلارینا منفی تأثیر قویار.