اطرافیمیزدا اولان
سوبایلارین چوخ آزی منطیقلی و مؤحکم سببلره گؤره سوبای قالماغی ترجیح وئریرلر و او
بیریلری بو شراییطی مجبوراً و یالانچی سببلره گؤره تحمّول ائدیرلر.
بو افرادین فورصتلره «یوخ»
دئماقلاری‌نین اصلی عامیلی عادتلر و
قورخولاردان قایناقلانیر. سیز ده اوخشار دلیل‌لره گؤره سوبایلیق عالمینده قالمیش
اولساز, یاخشی اولار زیندگانلیغیزا بیرده باخاسیز و منطیقلی دلیل‌لر اساسیندا
تازادان تصمیم توتاسیز.
ایشله‌ماغی حددن آرتیق
سئویرسیز؟
شاید ایشله‌ماغی او قدر سئویرسیز
کی شوغلی موفقیّتی هر شئیدن اوستون توتورسوز.
بیر عیده وار کی قیرخ-اللی
یاشلاریناجن میزلری اوستونده‌کی پرونده‌اینن یاشیرلار, گؤره‌سن اونلار دوغرودان‌دان
خوشبختدیلر؟
چاره‌سی نه‌دیر؟
سیز بیر خانیم اولساز کی ایندیه‌جن
بوتون یاشاییشیز ایشیز اولوب. قرار دئییل کی ائولنماق همان خانه‌نیشین اولاسیز.
اؤزوزه ائله بیر کیشی سئچمه‌لیسیز کی سیزین ایشیزی درک ائده و شراییطی نظرده آلا.
اگر ایسته‌میرسیز کی یولون
یاریسیندا هم اؤزوزو و هم اونو نا اومید ائده‌سیز, پس چالیشین کی سیزه گلن ائلچی‌یه
هدفلر و شراییطیزدن دقیق تصویر وئره‌سیز. و البته بو کیفایت ائله‌مز. سیز اؤزوز ده
دگیشماغا حاضیر اولمالیسیز. سیز قبول ائله‌مه‌لیسیز کی ائولَنَندن سونرا شراییط
دگیشه‌جاق و قاباقکینا تای اولمایاجاق.
ائله ایستانداردلاریز وار
کی اونلاری دگیشماغا حاضیر دئییلسیز؟
شاید گله‌جاق یولداشیز باره‌ده
مؤحکم معیارلاریز وار کی اونلار سیزین اوچون حیاتی ساییلیرلار. احتیمالاً سیز
اطرافیزداکی کیشیلرین ایرادلارین گؤرورسوز و اورگیزده دئییرسیز کی من اولسام بئله
کیشی اینن ائولنمزدیم. و اوردان کی سیزین ده ائلچیلریز همن بو یئر کوره‌سیندندیلر
و اونلارین‌دا بوجور عیبلری اولا بیلر, اونلارا «بلی» دئیه بیلمیرسیز.
چاره‌سی نه‌دیر؟
صؤحبت بیر عؤمور یاشاماقدان
گئدیر. حتماً سیزین معیارلاردان بیگانه بیرینه «بلی» دئیه بیلمزسیز. آما بو
معیارلارا گؤره تک قالماغی بوینوزا آلمامیشدان قاباق اؤزوزه و معیارلاریزا دیقّتلی
باخین.
اوّلده اؤز ضعفلریزی و
ایرادلاریزی نظرده آلین. سونرا سیزی بیر عؤمور تک ساخلایان معیارلاری اهمیّت
ترتیبی ایله یازین.
باخین گؤرون بو خصوصیتلرین
هانسی‌سیندان واز کئچه بیلرسیز. و هانسیلاری واز کئچمه‌لی دئییل. ایندی ائلچیلریزه
باخین. شاید اونلارین بیرینده منفی خصوصیتلرین نئچه‌سی اولا آما اونون شخصیتی‌نین
اساس حیصه‌سی اولمایا. اوندا اولان بو خصوصیتلرین رنگی آز اولسا شاید یاخشی اولار
بو موریدده آرتیق دوشونه‌سیز.
دوستلاریزینان اولماق سیزه
کیفایت ائلیر؟
دوستلارسیز یاشایا بیلمه‌ین
اینسانلار اوچون ائولنماق محدودیّت معناسیندادیر. اونلار قبول ائیله بیلمزلر کی
ائولنَندن سونرا, دوستلاری‌نین دؤره‌سینه خط چکمه‌لیدیلر.
چاره‌سی نه‌دیر؟
بئله بیر اینسان اولساز,
ائولنماق سیزه چتین گلر.
آما یاخجی اولار بیر مودّت
سونرانی دوشونه‌سیز. بو صمیمی دوستلار ها واختاجن سیزینن اولاجاقلار؟ تجروبه نیشان
وئریب کی اینسانلاری بیر-بیرینه باغلاماغا داییمی و موشترک منفعتلر لازیمدیر کی
دوست گروهوندا بو مسأله دواملی اولماز.
البته ائولنماق دوستلاردان
قیریلماق معناسیندا دئییل.
داها یاخجی موقعیّت
آختاریرسیز؟
نظریزه بئله گلیر کی بیرینه
«بلی» دئماق او بیریلره «یوخ» دئماق معناسیندادیر و بونا خاطیر تصمیم توتانمیرسیز؟
شاید بئله گومان ائلیرسیز کی داها یاخجی فورصتلر قاباغا گله‌جاق و سیزین لیاقتیز
بوگونه‌جن اولان ائلچیلریزدن داها یوخاریدیر.
چاره‌سی نه‌دیر؟
داها یاخجی موقعیته قطعی حؤکم صادیر ائله‌ماق
اولماز. شاید سیزین حقّیز اولا و ایندی‌کی ائلچیلریزدن داها لیاقتلیسی اولا. آما
بیر آز منطیقلی باخساز گؤره‌جاقسیز کی اولا بیلر همان لیاقتلی ائلچی گله و سیز
اوندان‌دا لیاقتلینی گؤزله‌ماق باهانیسنا اونا دا یوخ دئیه‌سیز!
لاپ یاخجی اولماق فیکرینی باشیزدان آتین.
یازدیغیز اولویّتلره باخین و چالیشین او اساسدا اینتیخاب ائده‌سیز.
بوندان کی بیر واقعیتی
بیلسین قورخورسوز؟
شاید سیزین و خانیواده‌زین
چوخلی فرقی اولا. شخصی عقیده‌لردن توتدی ایجتیماعی یاشاماق سبکلرینه‌جن.
خانیواده‌نین سیزه پیشنهاد
ائله‌دیغی ائلچی سیز دئیَن دئییل و سیزی تانییان آیری ائلچی خانیواده‌زی تانیمیر.
نظزریزه بئله گلیر کی خانیواده تانیتدیران ائلچی‌یه «بلی» دئسز بیر عؤمور یازیق
اولاجاقسیز و خانیواده‌زی تانیمایان ائلچی‌یه «بلی» دئسز خانیواده‌زدن آیری و
اوزاق قالمالی اولاجاقسیز.
چاره‌سی نه‌دیر؟
کیریخمایین. ائولنماق بوتون
بیر پاکت کیمیدیر کی ایچینده‌کیلرین بعضیسینی سئچه بیلمزسیز. سیزین دوستلاریز و
خانیواده‌ز و اونون دوستلاری و خانیواده‌سی بو پاکتین ایچینده‌دیر. ایسته‌سز کی
موفّق زیندگانلیغیز اولسون بو شراییطین هامیسی ایله اوز به اوز اولمالیسیز.
ائلچیلریزه خانیواده‌زین
شراییطی باره‌ده دانیشین و فرقلری آیدینلادین. اونا دئیین کی خانیواده و رابیطه‌لریزی
ساخلاماق سیزه اساسلی اهمیتی وار و سیزین کناریزدا خوشبخت اولماق ایسته‌سه بو
فرقلری قبول ائتمه‌لیدیر.
بئله فیکیر ائله‌مه‌یین کی
بو خط نیشان چکماغینان اؤزوزو ارزیشدن سالیبسیز. عزیزلریزه و شراییطیزه وئردیگیز اهمیّت,
اونون نظرینده سیزین ارزیشیزی نئچه برابر ائلیر.