سلیمانیه مسجیدی بؤیوک عثمانلی معماری, «سینان»ین تایسیز اثریدیر کی عیبادت یئری اولماقدان علاوه, خیریه مرکزی کیمی بوتون دینلرین یوخسوللاریندان حیمایت ائدیر.
فارس خبرگوزاریسی‌نین ترکیه‌دن وئردیگی گوزاریشه گؤره, سلیمانیه مسجیدی استانبول شهری‌نین جامیع مسجیدلریندن ساییلیر کی 1557-1550 ایللرینده بؤیوک عثمانلی معماری سینانین الی‌اینن دوزلیب.
بو مسجیدین دوزلمه‌سی بیرینجی سولطان سلیمانین دستوری ایله باشلاندی. سلیمانیه مسجیدی‌نین گونبذی‌نین اوجالیغی 53 متر و قوطری 27.5 متردیر. عثمانلی معمارلیغینا گؤره بو مسجیدین 4 میناره‌سی وار کی سولطان دستوری اینن دوزلمیش مسجیدین علامتی ساییلیر.
اونون معمارلیق سبکی, سینان و عثمانلی معمارلارین آیری ایشلرینه تای ایسلامی و بیزانس معمارلیق سبکیدیر.
او دؤره‌نین رسمینه اساساً بو مسجیدین اطرافیندا مدرسه, حامام, کیتابخانا, مریض‌خانا,عمومی آشپزخانا و کروانسرا کیمی جانیبی ساختیمانلار دا دوزلتدیلر و بو ساختیمانلارا«جامی کولیه‌سی» دئییلر.
بو مسجید عیبادت یئری اولماقدان علاوه خیریه مرکزی‌ده ساییلیردی. ائله کی مین نفردن چوخ یوخسول موسلمان, مسیحی و یهودی اینسانا ریفاهی سیستم حاضیرلیردی.
بو مسجیدین دالیسینداکی باغدا بیرینجی سلیمان, اونون آناسی, عیالی و باجیسی‌نین قبری و هابئله ایکینجی سلیمان و ایکینجی احمدین قبری وار.