موطالیعه میقدارینی تعیین ائله‌ماغا هئچ قانون یوخدور, آما موطالیعه‌نین واختی اوزون اولمامالیدیر. چالیشین بیر ساعت یاریم موطالیعه‌دن سونرا بیر آز دینجله‌سیز. موختلیف افرادین فرقلی هوش و حؤصله‌سی وار.

دیقّت لازیم اولان موطالیعه‌لری یوخودان سونرا ائدین. موطالیعه‌نین لاپ یاخجی واختی –کی اؤرگشماغین میقداری یوخاریدیر- سحر تئزدن (آییلماقدان  یاریم ساعت سونرا) و آخشام اولور.

گونون باتماسینا ایکی ساعت قالمیش کیهانی اشعه‌نین آزالماسینا گؤره و گونون یئرله رابیطه‌سی‌نین نوعینه گؤره, حواسّین ایختیلالی آزالار و اؤرگشماق داها یاخجی اولار.

گئجه‌نین آخیر ساعتلرینی ائله موطالیعه‌لر ائدین کی ذهنی فعالیته احتیاجی اولماسین و اونلارا علاقه‌ز اولسون. گئجه‌نین آخیری بونا گؤره کی یوخودان سونرا یاتیرسیز, مطلبلرین فورصتی اولور ساغ یاریم‌کوره‌دن (قیسا مودّت حافیظه یئری) سول یاریم‌کوره‌یه (اوزون مودّت حافیظه یئری) وارید اولسونلار.

چوخ آج و یا توخ اولاندا موطالیعه ائله‌مه‌یین چونکی اؤرگشماغی آزالدار. اورگیز گئتسه شیرین بیر زاد یئیین.

موطالیعه یئری‌نین حرارتی و رطوبتی موناسیب اولمالیدیر. رطوبت 50 درصد و حرارت‌ده نه چوخ سویوق و نه چوخ ایستی. (23-19 درجه)

موطالیعه یئرین ایشیغی موناسیب اولمالیدیر. گوندوزون ایشی لاپ یاخجی ایشیقدیر, آما گئجه‌لر موطالیعه ائله‌سیز چالیشین ساری و آغ ایشقدان بیر یئرده ایستیفاده ائده‌سیز. موناسیب ایشیق 400 لوکسدیر. (بیر دانا 18 واتلیق کم‌مصرف لامپین 200 لوکس ایشیغی اولار.)

موطالیعه یئری ساکیت و آرام اولمالیدیر. سس-صدالی و شولوق یئرده موطالیعه ائتمه‌یین.

موطالیعه یئری ایمکان داخیلینده ثابیت و دگیشمز اولمالیدیر. چالیشین اؤزوزو ثابیت و یکنواخت موحیطه عادت وئره‌سیز. گؤرماق فضاز هر نه‌قدر آز اولسا بیر او قدر دیقّتیز چوخ اولار.

موطالیعه اوچون ثابیت و خاص بیر یئریز اولسون و چالیشین مونظم و تمیز اولسون.

تلویزیون, رادیو و تیلیفون کیمی زادلاری کی دیقّتیزی داغیلدا بیلر موطالیعه یئرینه قویمایین.

یاخجیسی بودیر کی موطالیعه اوچون میز و صندلدن ایستیفاده ائده‌سیز. هئچ واخت یورقان دوشکده موطالیعه ائتمه‌یین.

اؤرگشماق ایختیلالین آرادان آپارماق اوچون مخصوصاً نشتاب واختی بیر لیوان ایچمه‌لی و یا میوه سویو ایچین. موطالیعه واختی راحات لیبلاس گئیین.

موطالیعه واختی هوشوز باشیزدا اولسون. بعضیلری موطالیعه واختی آییق اولارلار آما هوشلری باشلاریندا اولماز.

موطالیعه اوچون بدنی و ذهنی حاضیرلیق لازیمدیر. بللی‌دیر کی ذهنی و روانی حاضیرلیق جیسمی حاضیرلیغا ارجحیتی وار. موطالیعه‌دن ایکی دقیقه قاباق موطالیعه و اونا مربوط اولان زادلارا فیکیرلشین, سونرا بئش دفعه درین نفس چکین, بیر آز ساخلایین سونرا اؤتورون.