ایش و یاشاییش آراسیندا تعادول قورماق چوخوموزا چتیندیر. ایشیمیز چوخ اولاندا بیر آز دا چتینله‌شر. ائودن ائشیکده‌کی حددن آرتیق ایشلر, خانیواده و دوستلار رابیطه‌لرینی مودیریت ائله‌ماق نظره چوخ چتین گلیر. بو وضعیت بیزلرین چوخوندا وار و بونونلا بئله هدفیمیز بودور کی بو فیشارینان سالیم یاشاییشیمیز اولسون.
بوتون انرژیمیز ایش اوچون صرف اولسا روح و بدن سلامتلیغیمیز چوخ راحت یاددان چیخار. ایشین فیشاری اثرینده بیلمه‌دن دیقّتیمیز آزالار و ایشیمیزین کیفیتی آشاغی یئنر, ایضطرابا دوچار اولاروق و گئتدیقجان شخصی و ایجتیماعی رابیطه‌لریمیزه ضرر ووراریق.
ایش فیشاری داییمی اولسا بدنین مودافیعه سیستمی ضعیفلر و اینسان جور به جور ناخوشلوقلارا موبتلا اولار. سویوق دگمه‌دن و بئل آغریسیندان توتدو جور به جور سکته‌لر و قورخولو ناخوشلوقلار اینسانی تهدید ائدر. ایسترس تکلیقدا قان فیشارین چوخالدار.ایسترس اؤز اؤزلوغوندا پیس دئییل ! ایسترس موفقیت عامیللریمیزدن بیری ساییلیر,چونکی بیزه آرتیق چالیشماغا انگیزه وئریر. تکجه او زمان ایسترسین ضرری وار کی یاشاییشیمیزن بوتون لحظه‌لرینی دولدورسون و حتّا کیچیک ایشلر بیزه نیگرانچیلیق گتیره.
ایسته‌سز کی زیندگانلیق و ایشیزین فیشارینی کونترول ائده‌سیز گرک هر شئیده موتعادیل اولاسیز. تعادول سیزه کؤمک ائلر کی شاد و یاخجی ایشله‌یه‌سیز. گوجوزون میقدارینی بیلسز و اونون اساسیندا ایشلریزه یئتیشسز داها موفق اولارسیز. شاید ایش باره‌سینده اؤزوزو زورا سالاندا بئله دوشونورسوز کی ایستکلریزه چاتاندا –کی اکثراً مادّی ایستکلر اولار- هامیسی‌نین عوضی چیخار, آما گرک مسأله‌یه آیری پنجره‌دن باخاسیز؛ گؤره‌سن اصلاً ارزیشی وار؟
بوردا ایتسرسین آزالتماسی اوچون فایدالی نوکته‌لر وار. بو نوکته‌لری اوخویوب بو گوندن زیندگانلیغیزدا ایشه سالین:
ایش موحیطینده
1.هر گونکی هدفلریزی آراشدیرین. ایشلریزی اولویّت اساسیندا گؤرون, چونکی آغیر ایشلریزی قورتاراندان سونرا سیزه راحاتلیق احساسی ال وئرر و آیری ایشلریزه چوخ راحات یئتیشه بیلرسیز. هر هانسی بیر ایشده کؤمگه احتیاجیز اولسا چوخ راحات مطرح ائدین.
2.ایشلریزی واختیندا گؤرون و اونلاری دالی ساخلامایین. ایشی دالی سالاندا اولدوغوندان داها چوخ نظره گلیر و شاید سیزی او قدر نیگران ائلیه‌کی دوشونه‌سیز اولمایا بو ایشی گؤره بیلمه‌یه‌سیز. دوغرودان‌دا چتین ایش اولسا اونو زمان بویو انجام وئرین. ایشین هر بؤلومو قورتولاندان سونرا اؤزوزه ایستیراحت وئرین و قالانینی سونرا انجام وئرین. 5 دقیقه گؤزلریزی یومون و یا دوستلاریزینان دانیشین و ایمکانیزدا اولسا آچیق فضادا قدم وورون.
3.گونده‌لیق ایشیز دوغرودان دا چوخ اولسا و سیزی واقیعاً یورسا, رئیسدن ایسته‌یین کی ایشیزی دگیشسین و یا ایشیزی آزالتسین. ایشیزین میقدار و واختینی تنظیم ائلیه بیلسز دوستلار و خانیواده‌اینن اولماغا داها چوخ واختیز اولار.
4.گونون موشخص ساعتینی ایشله‌یین و بقیّه‌سین ایستیراحت و خانیواده‌یه ایختیصاص وئرین. رئیسیزه ایجازه وئرمه‌یین سیزین بوش و آزاد واختلاریزدان سوءایستیفاده ائله‌سین.بو فقط سیزسیز کی اؤز آزاد واختیزا تصمیم توتمالیسیز. البته ائلیه بیلرسیز کی رئیسین ایستگینه گؤره ایضافه ایشله‌یه‌سیز آما گرک گؤره‌سیز او سیزین آزاد واختیزا نه قدر قیمت وئریر و ایضافه ایشی نه‌قدر پولون قاباغیندا گؤرورسوز.
5.بوگونلوقدا گونده‌لیق ایشین واختی دگیشیر. بعضی ایشلرده بو سیزسیز کی تعیین ائلیرسیز کی گونده نئچه ساعت ایشله‌یه‌سیز. سیزین ایشیزین موقعیتی بئله اولسا راحاتلیغینان گونده‌لیق ایشیزی موعین ائلیه بیلرسیز. آما بو مسأله گرکمز باعیث اولا کی ایشیزی دوزگون یئرینه یئتیرمه‌یه‌سیز. شاید سیزین گوجوز او قدر اولا کی 6 ساعتلیق ایشی 3 و یا 4 ساعتده گؤره‌سیز آما بو مسأله باعیث اولمامالیدیر کی ایشیزی واختیندا تحویل وئرمه‌یه‌سیز.
6. ایشین آراسیندا دینجلین. دینجلماق سیزه شادلیق و انگیزه وئرر. چوخ ایش سیزی یورار و دیقّتیزی آزالدار و باعیث اولار گوجوز آزالسین. بیر آز دینجلمک سیزه کؤمک ائلر کی عصبلریز راحاتلاشسین.
7. گؤردوگوز ایشین سس‌سیزلیغا احتیاجی اولماسا ایش گؤره-گؤره موسیقی‌یه قولاق آسا بیلرسیز. شاید بو بیر طبیب اوچون دوز اولمایا آما بیر توکانچی و یا حسابدار اوچون فایدالی اولار. ایش یئرینده موسیقی‌یه قولاق آسماغا ایمکانیز اولماسا ائوینن ایش آراسی مسیرده موسیقیدن فایدالانین. موسیقی سیزه آرامیش وئرر.
8. همکارلار و رئسیزینن یاخجی رابیطه‌ز اولسون. چونکی فیشاردا اولان زمانلار اونلارین کؤمگینه احتیاجیز اولاجاق.
9.صبریز چوخ و شیکایتیز آز اولسون. الیزین آلتینداکیلار و حتّا موشتریلرینن رفتاریز دوز اولسون. هردن اؤزوزو اونلارین یئرینه قویون, اوندا گؤره‌جاقسیز کی سیزه گلن فیشار آیریلاریندان چوخ دئییل. فایدالی ایشله‌ماق یوللاری باره‌ده همکارلاریزینان دانیشین.
10.ایشیزی دوزگون یئرینه گتیره بلمه‌سز ده نیگران اولمایین. شراییط همیشه بیر اولماز و لازیم دئییل کی سیز همیشه کامیل اولاسیز آما سیز گرک بوتون گوجوزونن چالیشاسیز و نتیجه‌یه اومیدوار اولاسیز.
ائوده
1.ائو ایشلرینه برنامه‌ز اولسون. ائوین معمولی ایشلرینی تانی‌یین و هر گون موشخص بیر واختی اونلار اوچون نظرده آلین.
2.بوتون مسؤولیتلری بوینوزا آلمایین. یولداشیزدان‌دا کؤمک آلین و اوندان ایسته‌یین سیزینن همکارلیق ائله‌سین. او دا ائودن ائشیکده ایشله‌سه سیزین وضعیتیز داها یاخشی درک ائلر یوخسا, بو سیزسیز کی گرک آیدین صورتده سیزه گلن فیشاری توضیح وئره‌سیز.تک یاشاساز برنامه یازماغیز راحت اولار چونکی معمولاً آز فیشار تحمول ائله‌مه‌لی اولارسیز و مسؤولیتیز آز اولار.
3.یوخ دئماقدان قورخمایین. یورقون اولساز خانیواده عضولری و یا دوستلاریزدان ایسته‌یه بیلرسیز کی سیزی درک ائله‌سینلر. البته «یوخ» دئماق جسارتی باعیث اولمامالیدیر کی هئچ مسؤولیت قبول ائله‌میه‌سیز. سیز گرک آیری فورصتلرده اونو جوبران ائده‌سیز.
4.آیریلارین مالی و عاطیفی حیمایتلریندن فایدا آپارین. ایشیزده دوزگون برنامه‌ز اولسا اوستوزده‌کی فیشار آزالار و راحاتلیغینان موعاشیرتدن لذّت آپاراسیز. سالیم موعاشیرت سیزین روحی و جیسمی سلامتلیغیزی تضمین ائلر.
5.داعوا دالاشی قیراغا قویون کی ائویز اورگه یاتیم اولسون. نئچه ساعت چتین ایشدن سونرا امنیتلی ائوه گئتماق یاپیشار. خانیواده‌زینن ایختیلافیز اولسا اونون حلّینه چالیشین . قویمایین حل اولمامیش قالسین. ایختیلاف ذره-ذره سیزی اینجیدر و ائوین موحیطینی سویوق و آغیر ائلر.
6.ورزیشی گونده‌لیق برنامه و وظیفه‌زده نظرده آلین. ایشیزین تحروکی چوخ اولسا دا ورزیشدن ال چکمه‌یین. اوندان علاوه آیری تفریحلریز ده اولسون.
7.بوش واختلاریزدا سیزی هیجانا گتیرن ایشلر گؤرون کی گونده‌لیق ایسترسی آزالداسیز.تفریحی یاشاییشیزدان سیلمه‌یین. باش قاتماغا بیر شئییز اولسون و اونو علاقه‌لریزینن موناسیب سئچین. مثلاً سینما, تئاتر و طبیعتده دولانماغا گئدین و یا گونده‌لیق پیادا یئریماغی برنامه‌زده یئرلشدیرین.
8.قوناق چاغیرین و قوناق گئدین. شاید دئیه‌سیز او قدر یورقونسوز کی قوناغا حوصله‌ز یوخدور. آما بو سیزین روحیه‌زی دگیشماق اوچون لازیمدیر.
9.ناخوشلوقلاری جیدّی توتون. باشیز آغریسا زورونان اونو تحمول ائتمه‌یین و هر جوره مقطعی ناخوشلوقلاری موعالیجه ائدین. چونکی اونلارین هر بیری سیزی عصبی ائلیه بیلر.
10.احساس ائله‌سز کی همیشه ایضطیرابیز وار و ایشیزه مانع اولور حتماً بیر موشاویرینن مشورت ائدین.